ވެރިކަން ކުރާ ޕީޕީއެމުން ވަކިވެވަޑައިގެންނެވީ ދާއިރާގެ ރައްޔިތުންނާއި، ޚާއްޞަކޮށް ދާއިރާގެ ޒުވާނުންގެ ޙައްޤުގައި ކަމަށާއި ކިތައްމެ ބޮޑު ހުށަހެޅުމަކާއި ބިރެއް ދެއްކިއަސް ނިންމުން ބަދަލު ނުކުރައްވާނެކަމަށް ޕީޕީއެމުން އަންގާރަ ދުވަހު ވަކިވެވަޑައިގެންނެވި ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު ޢަބްދުއް ލަތީފް މުޙައްމަދު ވިދާޅުވެއްޖެއެވެ.

ރާއްޖެޓީވީއަށް ދެއްވި ޚާއްޞަ އިންޓަރވިއުއެއްގައި ލަތީފް ވިދާޅުވީ މި ޤައުމުގެ ހާލަތު އޮތްގޮތުން މިވަގުތު ޤައުމަށާއި ޕީޕީއެމަށްވެސް އެންމެ ފައިދާ ބޮޑުގޮތަކީ ޕީޕީއެމުން ވަކިވުން ކަމަށާއި ދާއިރާގެ ރައްޔިތުންނަށާއި ޚާއްޞަކޮށް ޒުވާނުންނަށް އެންމެ ރަނގަޅު ގޮތަކީ، މިވަގުތު އެންމެ ތާއީދު ލިބިފައިވާ، އެންމެ ގިނަބަޔަކު ލޯބިވާ ޓީމާއި ގުޅިގެން މަސައްކަތް ކުރުން ކަމަށެވެ.

ލަތީފް ވިދާޅުވީ ކިތަންމެ ބޮޑު ހުށަހެޅުމެއް ހުށަހެޅި ނަމަވެސް އަދި ކިތަންމެބޮޑު ފިއްތުމެއް ކުރިމަތި ކުރިކަމުގައި ވީނަމަވެސް އެގޮތުގައި ސާބިތު ކަމާއެކު ދެމިހުންނަވާނެ ކަމަށެވެ.

ޕީޕީއެމްގެ މުސްތަޝާރު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްގައްޔޫމްއަށް އެޑްރެސް ކުރައްވާ ލަތީފް ފޮނުއްވެވި ސިޓީފުޅުގައި ވިދާޅުވެފައިވަނީ ދިއްދޫ ދާއިރާގެ ގޮނޑި ލަތީފް ކާމިޔާބު ކުރެއްވީ އަމިއްލަ ގޮތުން ކަމަށާއި އޭނާ ޕީޕީއެމާއި ގުޅުނީ ސަރުކާރާއި ގުޅިގެން ގައުމާއި ދިއްދޫގެ ރައްޔިތުންނަށްޓަކައި ޚިދުމަތް ކުރެއްވުމުގެ ފުރިހަމަ އަޒުމާއި އުއްމީދުގައި ކަމަށެވެ. އަދި އެއީ ތަރައްގީއާއި ކުރިއެރުމަށް ބޭނުންވެފައިވާ ދިވެހި ޒުވާނުންގެ ހުވަފެންތަކުގައި ހަގީގީ ކުލަޖައްސައިދިނުމަށް ރައްޔިތުންގެ މަޖިލީހުގެ ތެރެއިންނާއި ބޭރުން މަސައްކަތްތަކެއް ކުރުމުގެ ނިޔަތުގައި ނިންމެވި ނިންމެވުމެއް ކަމަށްވެސް ލަތީފް ވިދާޅުވިއެވެ.

ނަމަވެސް ފާއިތުވި ދެތިން އަހަރު ދުވަހުގެ ތެރޭގައި ރައްޔިތުންގެ މަޖިލީހުގެ ތެރޭގައި، ޕީޕީއެމް އިސްކޮށްއޮވެ، ނިންމާފައިވާ ބައެއް ނިންމުންތަކަކީ ޒުވާނުންނާއި ރައްޔިތުންގެ ހެވާއި ލާބައަށް ނިންމާފައިވާ ނިންމުންތަކެއް ނޫންކަން އިހުސާސް ކުރެއްވޭ ކަމަށް ސިޓީފުޅުގައިވެއެވެ. އެހެންނަމަވެސް ޕީޕީއެމްގެ މެމްބަރަކަށް ވީތީ، މިހާތަނަށް ޕީޕީއެމްގެ ޕާލިމެންޓްރީ ގްރޫޕުން ނެރެފައިވާ ހުރިހާ ވިޕްލައިނަކާއި އެއްގޮތަށް ވޯޓް ދެއްވާފައިވާނެ ކަމާއި ސަރުކާރުގެ ދިފާއުގައި އެންމެ ވަރުގަދައަށް އެކިއެކި މީޑިއާތަކުގަ އާއި ޕޯޑިއަމްތަކުގައި އަޑު އުފުއްލަވާފައިވާ އެއް މެމްބަރު ކަމުގައިވާނެ ކަމަށްވެސް ލަތީފްގެ އެސިޓީފުޅުގައިވެއެވެ.

ނަމަވެސް މަޖިލީހުގައި ޕީޕީއެމުން ނިންމާފައިވާ މުހިއްމު ބައެއް ނިންމުންތަކާއި ސަރުކާރުގެ ސިޔާސަތުތަކަށް ޕީޕީއެމްގެ އާއްމު މެމްބަރުންގެވެސް މާބޮޑު ތާޢީދެއް ނެތްކަން ނިމިދިޔަ ލޯކަލް ކައުންސިލް އިންތިހާބުގެ ނަތީޖާއިން ވަރަށް ސާފުކޮށް ފެނިގެން ހިނގައްޖެކަން އެއީ އެންމެނަށްވެސް ގަބޫލުކުރެވޭނެ ހަގީގަތެއްކަމަށް ލަތީފްގެ ސިޓީގައި ފާހަގަކުރެއްވިއެވެ.

"ވީމާ، ދިއްދޫގެ ޒުވާނުންނާއި ރައްޔިތުންގެ ހައްގުގައި ސާބިތުވެހުރެ، އިތުރަށް މަސައްކަތްކުރަން ބޭނުންވާތީ، ޕީޕީއެމް ޕީޖީ ގްރޫޕުން ނެރޭ ކޮންމެކޮންމެ ވިޕްލައިނަކާ އެއްގޮތަށް ވޯޓް ދިނުމަކީ އަޅުގަނޑަށް ކުރެވިދާނެ ކަމަކަށްނުވާތީ، ޕީޕީއެމްގެ މެމްބަރުކަމުން މިއަދުން ފެށިގެން އަޅުގަނޑު ވަކިވެފައިވާ ވާހަކަ ދެންނެވުމަށް މިފުރުސަތުގެ ބޭނުން ކުރަމެވެ،" މިދިއަ ޖޫން މަހު ރައީސް ޔާމީންއަށް ލަތީފް ފޮނުއްވި ސިޓީފުޅު ނިންމަވާލައްވަމުން ވިދާޅުވެފައިވެއެވެ.

ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލަމެންޓްރީ ގްރޫޕުން ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުރުބާރު ނެތްކަމުގެ މައްސަލަ 45 މެމްބަރުންގެ ސޮޔާއެކު ހޯމަ ދުވަހު ހުށަހެޅިއިރު، އެލިސްޓުގައި ލަތީފްވެސް ސޮއި ކުރައްވާފައިވެއެވެ.