ޕީޕީއެމުން ސިޔާސީ ހަރަކާތްތަކުގައި ސުކޫލް ކުދިން ބައިވެރިކުރުވަނީ

ހއ. އިހަވަންދޫ ޕީޕީއެމްގެ ޖަގަހަ ހުޅުވުމަށް ބޭއްވި ރަސްމިއްޔާތުގައި ޔުނިފޯމްގައި ސުކޫލް ކުދިން ބައިވެރިކޮށްފި އެވެ.

ރައީސުލްޖުމްހޫރިއްޔާގެ އަނބިކަނބަލުން ފާތިމަތު އިބްރާހިމް، އިހަވަންދޫ ޕީޕީއެމްގެ ޖަގަހަ ހުޅުއްވައިދެއްވިއިރު، ސްކޫލް ޔުނީފޯމްގައި ކުދިން ވަނީ ބައިވެރިކޮށްފަ އެވެ. އަދި ރަސްމިޔާތުގެ އެކި ހުށައެޅުންތައްވެސް ހުށައަޅައިދިނީ ސްކޫލް ކުދިންނެވެ.

ރާއްޖެ.އެމްވީއާ ވާހަކަދެއްކި އިހަވަންދޫގެ ބައެއް ބެލިނިވެރިން ބުނީ، ރައީސުލްޖުމްހޫރިއްޔާގެ އަނބިކަނބަލުން، ފާތިމަތު އިބްރާހިމްއަށް މަރުހަބާ ކިޔުމަށް ޖެޓީ ސަރަހައްދަށް އެއްވުމަށްވެސް ބައެއް ސުކޫލް ކުދިންނަށް މަޖުބޫރުކުރުވި ކަމަށެވެ. އަދި ޕީޕީއެމްގެ ޖަގަހަ ހުޅުވުމަށް ބޭއްވި ރަސްމިއްޔާތުގައި ދާއިރާގެ މެމްބަރު މުހައްމަދު އަބްދުﷲ (މުހަންމާކަލޯ) އާއެކުގައި ބައިވެރިވުމަށްވެސް ބައެއް ކުދިންނަށް އެންގިކަމަށެވެ.

ދިވެހިރާއްޖޭގައި އެކުލަވާލެވިފައިވާ ޤާނޫނުތައް ބުނާގޮތުން ސިޔާސީ ހަރަކާތްތަކުގައި ސުކޫލް ކުދިން އަދި ކުޑަކުދިން ބައިވެރިކުރުމަކީ ޤާނޫނީ ކުށެކެވެ. އަދި އެފަދަ މައްސަލަ ބަލައި، ފިޔަވަޅު އަޅަންޖެހޭނެކަމަށްވެސް ޤާނޫނުތަކުގައި ބުނެފައިވެއެވެ. ޤާނޫނުތަކުގައި، ރައީސުލްޖުމްހޫރިއްޔާގެ އަނބިކަނބަލުން ބައިވެރިވާ ސިޔާސީ ހަރަކާތްތަކުގައި ސުކޫލްކުދިން ބައިވެރިކުރެވޭނެކަމުގެ އެއްވެސް އިސްތިސްނާއެއްދީފައެއް ނުވެއެވެ.

ޕީޕީއެމްގެ ސިޔާސީ ހަރަކާތްތަކުގައި ކުޑަކުދިން ބައިވެރިކުރުވާ މައްސަލާގައި ގިނަ ބައެއްގެ ފާޑުކިޔުންތައް ވަނީ އަމާޒުވެފައިވީ ނަމަވެސް މީގެ ކުރިން މިފަދަ މައްސަލަތައް ހަލުއިކަމާއެކު ބަލާ މުއައްސަސާތަކުން މިހާރު މިކަންކަމަށް އަޅާނުލާ ކަމަށް ގިނަ ބަޔަކު ބުނަމުން ދެއެވެ.