ހަކަތަ ސަމަކާރަ ކުރުމާއި ހަކަތަ އިގްތިސާދު ކުރުމަކީ ގައުމީ ފެންވަރުގައި ކޮންމެހެން ކުރަންޖެހިފައިވާ މަސައްކަތެއް ކަމަށާއި، ސަރުކާރާއި ރައްޔިތުން ގުޅިގެން މަސައްކަތް ކުރަންޖެހޭ ކަމަށް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޯޖީގެ ސްޓޭޓް މިނިސްޓަރު ޚަދީޖާ ނަސީމް ވިދާޅުވެއްޖެއެވެ.
"ހަކަތަ ސަމަކާރަ" ގައުމީ ކެމްޕެއިން އިފްތިތާހް ކުރުމަށް ބޭއްވި ރަސްމިއްޔާތުގައި ސްޓޭޓް މިނިސްޓަރު ޚަދީޖާ ނަސީމް ވިދާޅުވީ ހަކަތަ ސަމަކާރަ ކުރުމާއި ހަކަތަ އިގްތިސާދު ކުރުމަކީ ގައުމީ ފެންވަރުގައި ކޮންމެހެން ކުރަންޖެހިފައިވާ މަސައްކަތެއް ކަމަށާއި، މި ލަނޑުދަޑި ހާސިލުކުރެވޭނީ ސަރުކާރާއި އާއްމު ރައްޔިތުން ގުޅިގެން މަސައްކަތްކުރެވޭނެ ގޮތްތަކެއް ހޯދާ ރޭވިގެން ކަމަށެވެ. އަދި ވިސްނުމާއި ފިކުރުގެ އިތުރުން އާދަކާދަ މި މަގަށް ބައްޓަންކުރަންޖެހޭ ކަމަށް ޚަދީޖާ ވިދާޅުވިއެވެ.
ހަކަތަ ސަމަކާރަ ކެމްޕެއިނަށް އިޝާރާތް ކުރައްވައި ޚަދީޖާ ވިދާޅުވީ މި ކެންޕޭނަކީ، ރައްޔިތުންގެ ބައިވެރިވުމާއި އެއްބާރުލުމާއެކު އެފިޝެންޓު ގޮތެއްގައި ހަކަތަ ބޭނުންކުރުމަށް ގައުމީ ފެންވަރެއްގައި ހިންގުމަށް ރާވާފައިވާ ކެންޕޭނެއް ކަމަށެވެ. އަދި މި ފަދަ ކެންޕޭނުތަކުގެ މުހިއްމުކަމާއި ބޭނުންތެރިކަން ނުހަނު ބޮޑު ކަމަށް ވިދާޅުވިއެވެ.
ތިޔަ އެންމެހާ ބޭފުޅުންނަށްވެސް އެނގިވަޑައިގަންނަވާނެ ފަދައިން، މޫސުމަށް އަންނަ ބަދަލުތަކުގެ ސަބަބުން މުޅިދުނިޔެ މިއަދު ވަނީ ގިނަގުނަ ގޮންޖެހުންތަކަކާ ކުރިމަތިލާން ޖެހިފަ. މިކަމުގެ ނުރަނގަޅު އަސަރު ދަނީ ދުނިޔޭގެ ހުރިހާ ޤައުމުތަކަށްވެސް ކުރަމުން. އަދި، ދިވެހިރާއްޖެފަދަ ބިންތިރި، ކުދި ޖަޒީރާ ޤައުމުތަކަށް، މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރު އެތައް ގުނައަކުން ބޮޑު.މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޯޖީގެ ސްޓޭޓް މިނިސްޓަރ ޚަދީޖާ ނަސީމް
ރާއްޖޭގެ ތަރައްގީގެ ޕްރޮގްރާމްތައް ހިންގުމުގައި، ތިމާވެއްޓަށްކުރާ ނޭދެވޭ އަސަރު ކުޑަކޮށް، ދެމެހެއްޓެނިވި ތަރައްގީ ހާސިލުކުރުމަކީ މި ސަރުކާރުން ޚާއްސަ އަހައްމިއްޔަތުކަމެއް ދޭ ކަމެއްކަން ފާހަގަކުރައްވައި ޚަދީޖާ ވިދާޅުވީ ރާއްޖެއަކީ 2030 ވަނަ އަހަރުގެ ނިޔަލަށް "ނެޓުޒީރޯ" ގައުމަކަށް ހެދުމަށް ގިނަ މަސައްކަތްތައް ކުރަމުންދާ ކަމަށެވެ. އަދި މި ލަނޑުދަނޑި ހާސިލުކުރުމަށް ކުރެވޭ މަސައްކަތްތަކުގެ ތެރޭގައި ހިމެނޭ ހަކަތަ ސަމަކާރަކުރުމާއި، ހަކަތަ އުފެއްދުމުގައި އިއާދަކުރަނިވި ވަސީލަތްތައް ބޭނުންކުރުން އިތުރުކުރުމަށް، ގާނޫނީ ގޮތުން ގެންނަންޖެހޭ އިސްލާހުތައް ގެނެސް ގިނަ ޕްރޮޖެކްޓްތައް ހިންގަމުންދާ ކަމަށް އޭނާ ވިދާޅުވިއެވެ.
އެގޮތުން، އަވިން ކަރަންޓު އުފައްދާ ނިޒާމުތައް ރާއްޖޭގެ އެކިހިސާބުތަކުގައި ގާއިމުކުރުމުގެ މަސައްކަތް ކުރަމުންދާ ކަމަށާއި، ވޭތުވެދިޔަ 4 އަހަރު ދުވަހުގެ ތެރޭގައި ޖުމްލަ 34.7 މެގަވޮޓްގެ އަވިން ކަރަންޓު އުފައްދާ ނިޒާމު ރާއްޖޭގެ އެކި ރަށްރަށުގައި ގާއިމްކުރެވިފައިވާ ކަމަށް ޚަދީޖާ ވިދާޅުވިއެވެ. މީގެ ސަބަބުން ގާތްގަނޑަކަށް ސާޅީސް ހާސް މެޓްރިކްޓަނުގެ ކާބަންޑައިއޮކްސައިޑް ޖައްވަށް ބޭރުކުރުން މަދުކުރެވި 16 މިލިއަން ލީޓަރުގެ ތެޔޮ ބޭނުންކުރުން މަދުކުރެވޭނެކަން ވެސް ޚަދީޖާ ފާހަގަކުރެއްވިއެވެ.
މީގެ އިތުރުން ޚަދީޖާ ވިދާޅުވީ ބިލްޑިންގ ސެކްޓާރގައި ބޭނުންކުރާ ހަކަތަ ސަމަކާރަ ކުރުމަށް ވެސް ޚާއްސަ މަސައްކަތްތަކެއް ކުރިއަށް ގެންދާ ކަމަށެވެ. އިމާރާތްތަކުގައި ބޭނުންކުރާ ހަކަތައިގެ މިންވަރު މަދުކޮށް، އެފިޝެންޓުކޮށް ހަކަތަ ބޭނުން ކުރުމަކީ ވެސް އިސްކަންދީގެން ކުރަންޖެހޭ ކަމެއްކަން ފާހަގަކުރައްވައި ޚަދީޖާ ވިދާޅުވީ މިކަމުގެ ސަބަބުން ކަރަންޓަށް ކުރެވޭ ޚަރަދުން ބޮޑުބައެއް ކުޑަ ކުރެވޭނެ ކަމަށެވެ.
މި ކެމްޕޭނުގެ އެއް އަމާޒަކީ މިނިސްޓްރީއިން ފަށާފައިވާ ހަކަތަރި ޕްރޮގްރާމުގައި ގިނަ އާންމުންގެ ބައިވެރިވުން ހޯދުމަށް ކުރެވޭ މަސައްކަތުގެ ތެރެއިން ވެސް ރާއްޖޭގެ ރަށްރަށުގެ އިންޖީނުގެ ތަކުގައި ބޭނުންކުރާ ތެލުން ބޮޑު ނިސްބަތެއް ސަލާމަތްކުރެވި، އެ ތެޔޮ އެންދުމުގެ ސަބަބުން ޖައްވަށް ބޭރުވާ ވިހަ ގޭސް މަދުކުރުމެވެ. ހަކަތަރި ޕްރޮގްރާމު ކާމިޔާބު ކަމާއެކު ހިންގުމުން، 2030 ވަނަ އަހަރާ ހަމައަށް ބޭނުންވާ ޖެނެރޭޝަން ކެޕޭސިޓީގެ ތެރެއިން 147 މެގަވޮޓް ދަށްކުރެވޭނެ އެވެ. މީގެ ސަބަބުން އައު އިންޖީނުތައް ގަނެ އިތުރު ކަރަންޓުގެ ނިޒާމުތައް ބިނާކުރުމަށް ކުރަންޖެހޭ ހަރަދުގެ ތެރެއިން 800 މިލިއަން ރުފިޔާ ސަލާމަތްކުރެވޭނެ ކަމަށް މިނިސްޓްރީން ބުނެއެވެ. ހަކަތަ ހެޔޮގޮތުގައި ބޭނުންކުރުމުގެ ކެމްޕެއިނުގެ ސަބަބުން ކަރަންޓަށް ކުރަންޖެހޭ ހަރަދު ކުޑަކުރެވި، ޖީބަށް ލުއިވާނެއެވެ.
