ކެންޑިޑޭޓުންގެ ޝަރުތު ބަދަލުކުރުމަކީ ޤަބޫލުކުރާ އުސޫލެއް ނޫން: އެމްޑީޕީ
ރައްޔިތުންނަށް މިނިވަން އިންސާފުވެރި އިންތިޚާބެއް ލިބިންޖެހޭނޭ
އެމްޑީޕީގެ ފަރާތުން ކައުންސިލް އިންތިޚާބުގައި ވާދަކުރާ ބައެއް ކެންޑިޑޭޓުން
ލޯކަލް ކައުންސިލް އިންތިޚާބުގައި ވާދަކުރާ ކެންޑިޑޭޓުންގެ ޝަރުތު ބަދަލުކުރުމަކީ އެމްޑީޕީ ޤަބޫލުކުރާ އުސޫލެއް ނޫން ކަމަށް އެމްޑީޕީން ބުނެފިއެވެ.
ބުދަ ދުވަހު އެމްޑީޕީގެ ޕާލިމެންޓަރީ ގްރޫޕުން ނެރުނު ބަޔާނުގައި ބުނެފައިވަނީ "ލޯކަލް ކައުސިލުތަކުގެ އިންތިޚާބާ ބެހޭ ޤާނޫނު" އަށް ބަދަލު ގެނައުމުގެ ބިލަށް އެމްޑީޕީ ޕާލަމެންޓްރީ ގްރޫޕުން ވޯޓު ނުދީ ރަތް ޖެހުމަށް ނިންމައި އެގޮތަށް ޢަމަލުކޮށްފައިވަނީ އިންތިޚާބެއްގެ މެދުތެރެއިން ކެންޑިޑޭޓުންގެ ޝަރުތުތަކަށް ބަދަލު ގެނައުމަށާއި، ކެންޑިޑޭޓުންނާއި އަދި ރައްޔިތުންނަށް އިންސާފުވެރި އިންތިޚާބެއް ލިބުމުގެ ޙައްޤަށް އަރައިގަނެ، ޑިމޮކްރެޓިކް އެންމެހައި ހަމަތަކާ ޚިލާފަށް އެ ބިލް ހުށަހަޅާފައިވާތީ ކަމަށެވެ.
އެމްޑީޕީގެ ޕީޖީ ގުރޫޕުން ޤަބޫލުކުރާ އުސޫލަކީ، ބަޔާނުގައި ބުނެފައިވާ ގޮތުގައި، އިންތިޚާބުގައި ވާދަކުރާ ކެންޑިޑޭޓުންނާއި ރައްޔިތުންނަށް މިނިވަން އިންސާފުވެރި އިންތިޚާބެއް ލިބިގެންދިއުމެވެ.
ޕީޕީއެމްގެ ރައީސް އަބްދުﷲ ޔާމިންގެ ފެކްޝަނުން އިންތިޚާބަށް ތައްޔާރު ނުވެވުމުގެ ސަބަބުން ދައުލަތުގެ މުވައްސަސާތައް ނަހަމަ ގޮތުގައި ބޭނުންކޮށް ގާނޫނުގައިވާ ތާރީޚަށް ކައުންސިލުތަކުގެ އިންތިޚާބު ނުބާއްވައި، އެކި ފަހަރު މަތިން ލަސްކުރަމުންދާ ދިއުމަކީ ކެންޑިޑޭޓުންނާއި ރައްޔިތުންނަށް މިނިވަން އިންސާފުވެރި އިންތިޚާބެއް ލިބުމުގެ ޙައްޤަށް އަރައިގަތުންކަމަށް އެޕާޓީން ބުނެއެވެ. އެ ޢަމަލު އެގޮތަށް ހިންގުމުގެ އިތުރުން، އިންތިޚާބެއްގެ މެދުތެރެއިން ނުވަތަ އިންތިޚާބެއް ކުރިމަތިވެފައިވަނިކޮށް ކެންޑިޑޭޓުންގެ ޝަރުތުތައް ބަދަލުކުރުމަށް ޤާނޫނަށް ބަދަލުގެނައުމަކީ އިންސާފުވެރި އަދި ޑިމޮކްރެޓިކް އެންމެހައި ހަމަތަކާ ޚިލާފު ޢަމަލެއްކަމަށް އެމް.ޑީ.ޕީ ޕީޖީ ގްރޫޕުން ދެކެއެވެ.
ޝަރުތުތަކަށް ބަދަލު ގެނައި އިރު، ޤާނޫނުގައިވާ ތާރީޚާ އެއްގޮތަށް އިންތިޚާބަށް ތައްޔާރުވެ، ކެންޑިޑޭޓުން ނެރޭ ޕާޓީއެއްގެ ގޮތުން އެމްޑީޕީން މާކުރިން ޕްރައިމެރީ ބާއްވައި ކެންޑިޑޭޓުން ހޮވާފައިވަނިކޮށް، އަނެއްކާ އެހެން ގޮތަކަށް ކެންޑިޑޭޓުންގެ ޝަރުތު ބަދަލުކުރުމަކީ އެމްޑީޕީ ޕާލަމެންޓްރީ ގްރޫޕުން ޤަބޫލުކުރާ އުސޫލެއް ނޫން ކަމަށާއި އެ ޝަރުތުތަކަށް ގެނައި ބަދަލުގައި މަންފާއެއް އޮތްނަމަ އެ މަންފާއެއް، ޤާނޫނުގައިވާ ތާރީޚަށް އިންތިޚާބަށް ތައްޔާރުވި ޕާރޓީއަކަށް ނުލިބި، ޤާނޫނުގައިވާ ތާރީޚަށް އިންތިޚާބަށް ތައްޔާރު ނުވި ޕާރޓީއަކަށް ލިބުމަކީ ވެސް އެއްވެސް ހަމައެއް އޮތްކަމެއް ނޫން ކަމަށް ބަޔާނުގައި ވެއެވެ.
ގާނޫނަށް ގެނައި ބަދަލު އަނެއްކާ ވެސް ލޯކަލް ކައުސިލުތަކުގެ އިންތިޚާބު ލަސްކުރުމަށް ހުއްޖަތެއްގެ ގޮތުގައި ބޭނުންކޮށް އިތުރަށް އެ އިންތިޚާބު ލަސްކުރުމަކީ ގާތްކަމެއް ކަމަށާއި އެހެން އިންތިޚާބުތަކުގެ މެދުތެރެއިން ވެސް ކެންޑިޑޭޓުންގެ ޝަރުތުތައް ބަދަލުކުރުމުގެ ފެށުމެއްކަމަށް މިކަން ވެގެންދާނޭކަމަށް ދެކޭ ކަމަށް އެމްޑީޕީން ބުނެއެވެ.
ލޯކަލް ކައުންސިލް އިންތިހާބަށް ބަދަލު ގެނައުމުގެ ބިލް ބުދަ ދުވަހު ބޭއްވި ޖަލްސާގައި ފާސްކޮށްފައިވަނީ، ރައްޔިތުންގެ މަޖިލީހުގެ ޢާންމު އުސޫލު އެއްފަރާތްކޮށް، ތިން މަރުޙަލާ އެއްކޮށްލައި، އަދި ވޯޓުލާ ގަޑިއަށް ބަދަލު ގެނައުމަށް ފަހު އެވެ.
