ސަރުކާރުގެ ހުރިހާ އިދާރާއަކަށް ޖެންޑާ އެޑުވަކޭޓުން އައްޔަންކޮށް ޖެންޑާ މެއިންސްޓްރީމް ކުރުމަށް ވިއުގައެއް ގާއިމްކުރަނީ
އެމްޖެމްގެ ނަމުގައި މިހާރު ވަނީ ނިޒާމެއް އެކުލަވާލެވިފައި
ބައިނަލްއަގްވާމީ އަންހެނުންގެ ދުވަހުގެ ޖަލްސާއަށް ރައީސް އިބްރާހިމް މުހައްމަދު ޞާލިހު ވަޑައިގެންނެވުމުގެ ތެރެއިން
ސަރުކާރުގެ ހުރިހާ އިދާރާއަކަށް ޖެންޑާ އެޑްވަކޭޓުން އައްޔަންކޮށް ޖެންޑާ މެއިންސްޓްރީމް ކުރުމަށް ވިޔުގައެއް ގާއިމްކުރާނެ ކަމަށް ޖެންޑަރ މިނިސްޓްރީގެ ސްޓޭޓް މިނިސްޓަރ ޒިފްލީނާ ހަސަން ވިދާޅުވެއްޖެއެވެ.
ބައިނަލްއަގްވާމީ އަންހެނުންގެ ދުވަހުގެ ޖަލްސާގައި ސްޓޭޓް މިނިސްޓަރު ޒިފްލީނާ ވިދާޅުވީ އަމާޒަކީ މިންތީގެ ހަމަހަމަކަމަށް ވަކާލާތުކޮށް އިދާރީ ހިންގުމުގެ ތެރެއިން މިންތީގެ ނަޒަރިއްޔާތަށް ވަދެ، އަންހެނުން ބާރުވެރިކުރަނިވި ސިޔާސަތުތައް ކޮންމެ ދާއިރާއެއްގައި ވެސް އެ ދާއިރާއެއްގައި ހިމެނޭ މުއައްސަސާތަކުން އިސްނަގައިގެން ކުރުމަށް ބާރުއެޅުމަށް ކަމަށެވެ.
އެގޮތުން އިދާރާތަކުން މިންތީގެ ހަމަހަމަކަން ގާއިމްކުރުމަށާއި، ޖެންޑާ މެއިންސްޓްރީމް ކުރުމަށް ބާރުއަޅައި، ކުރަމުންދާ މަސައްކަތް ވަޒަން ކުރުމަށް މޯލްޑިވިއަން ޖެންޑާ އީކުއަލިޓީ މޮޑެލް ނުވަތަ "އެމްޖެމް" ގެ ނަމުގައި ނިޒާމެއް އެކުލަވާލާފައިވާ ކަމަށް ޒިފްލީނާ ވިދާޅުވިއެވެ. ރައީސް އިބްރާހިމް މުހައްމަދު ޞާލިހު ރިޔާސަތު ބަލަހައްޓަވާ ޖީއޭޕީގެ ސްޓިއަރިން ކޮމެޓީން މިދިޔަ އަހަރު ފާސްކޮށްދެއްވި އެމްޖެމް ގެ ތެރެއިން ސަރުކާރުގެ ހުރިހާ އިދާރާއަކަށް ޖެންޑާ އެޑްވަކޭޓުން އައްޔަންކޮށް، ޖެންޑާ މެއިންސްޓްރީމް ކުރުމަށް ވިޔުގަ ހެދިގެންދާނެކަން ފާހަގަކުރައްވައި ޒިފްލީނާ ވިދާޅުވީ ކޮންމެ ދާއިރާއެއްގައި ވެސް ހާސިލްވެފައިވާ ކަންކަމާއި އިތުރަށް މަސައްކަތް ކުރަންޖެހޭ ދާއިރާތައް ދެނެގަތުމަށް މޯލްޑިވިއަން ޖެންޑާ އީކުއަލިޓީ އިންޑެކްސްގެ ނަމުގައި ކޮންމެ އިދާރާއަކުން މިންތީގެ ހަމަހަމަކަމާއި ގުޅިގެން ކުރާ މަސައްކަތުގެ ސްކޯއެއް ކަނޑައެޅިގެންދާނެ ކަމަށެވެ.
ރާއްޖޭގައި މިންތީގެ ހަމަހަމަކަން ގާއިމްކުރުމަށް ހުރި އެންމެ ބޮޑު ގޮންޖެހުންތަކަށް އިޝާރާތް ކުރައްވައި ޒިފްލީނާ ވިދާޅުވީ ސިޔާސީ އަދި އިގްތިސާދީ ދާއިރާގައި އަންހެނުންގެ ބައިވެރިވުން މަދުކަމަށެވެ. ރައްޔިތުންގެ މަޖިލިސް، ޖުޑިޝަރީ، ކުންފުނިތަކުގެ ބޯޑާއި، އެގްޒެކެޓިވް ލެވަލް އަދި ވަޒީފާ އަދާކުރާ ތަންތަނުގެ މެނޭޖްމެންޓްތަކުގައި އަންހެނުން އިތުރުކުރުމަށް ޖީއޭޕީގައި ލަނޑުދަނޑިތައް އެކުލަވާލާފައިވާ ކަމަށް ޒިފްލީނާ ވިދާޅުވިއެވެ.
މިދިޔަ އަހަރު ލޯންޗު ކުރެވުނު ޖެންޑާ އީކުއަލިޓީ އެކްޝަން ޕްލޭނަށް އިޝާރާތް ކުރައްވައި ޒިފްލީނާ ވިދާޅުވީ ސަރުކާރުން ކުރާ މަސައްކަތްތައް ހަރުދަނާކޮށް ހަލުހި ކުރުމަށް މިދިޔަ އަހަރު ލޯންޗު ކުރެވުނު ޖެންޑާ އީކުއަލިޓީ އެކްޝަން ޕްލޭން ތަންފީޒު ކުރަން ފެށުމަކީ ލިބުނު ވަރަށް ބޮޑު ކުރިއެރުމެއް ކަމަށެވެ. މިއެކްޝަން ޕްލޭން އެކުލަވާލުމުގެ މައިގަނޑު ބޭނުމަކީ މިންތީގެ ހަމަހަމަކަން ގާއިމްކުރުމަށް ކުރާ މަސައްކަތް މެއިންސްޓްރީމްކޮށް އެކި ދައިރާތަކުން ގުޅިގެން ފުރިހަމައަށް ނަތީޖާ ވަޒަން ކުރެވޭނެ ގޮތް ރާވައި ތަންފީޒު ކުރުން ކަމަށް ޒިފްލީނާ ވިދާޅުވިއެވެ. އަދި ވިދާޅުވީ އީކުއަލިޓީ އެކްޝަން ޕްލޭން ތަންފީޒު ކުރުމުގައި ލާމަރުކަޒު ކުރުމަކީ އިސްކަން ދޭ ކަމެއް ކަމަށެވެ.
މީގެ އިތުރުން ޒިފްލީނާ ވަނީ ބައިނަލްއަގުވާމީ އަންހެނުންގެ ދުވަހެއް ފާހަގަކުރުމުގެ މުހިންމު ކަމުގެ މައްޗަށް ވެސް އަލިއަޅުއްވާލައްވާ ވާހަކަދައްކަވާފައެވެ. ޒިފްލީނާ ވިދާޅުވީ މަގުސަދަކީ މުޖުތަމައުގައި އަންހެނުންގެ އަގުވަޒަންކޮށް އެކި ދާއިރާތަކުގައި އަންހެނުން ހާސިލްކޮށްފައިވާ ކުރިއެރުންތަކާއި ކާމިޔާބީތައް ފާހަގަކުރުން ކަމަށެވެ. އަދި އަންހެނުންނަށް ކުރިމަތިވާ ގޮންޖެހުންތަކާއި މުޖުތަމައުގައި ހުރި ފުރުސަތުތަކާއި ބެހޭ ގޮތުން ވާހަކަދެކެވި ހުރި ހުރަސްތައް ނައްތާލައި މިންތީގެ ހަމަހަމަކަމަށް ބާރުއެޅުން ކަމަށް އޭނާ ވިދާޅުވިއެވެ.
