އުތުރުގެ ރަށެއްގައި ކުޑަ ފިރިހެން ކުއްޖަކަށް ބުލީކޮށް، އޭނާ ލައްވާ ޓިކްޓޮކް ވީޑިއޯތައް ހަދަނީ
އެކަމާ ގުޅިގެން އިތުރަށް ބަލަންޖެހޭ ކަންކަން ބަލާނެކަމަށް ފުލުހުން ބުނެފައިވޭ
ޓިކްޓޮކް އެޕްލިކޭޝަން
އުތުރުގެ ރަށެއްގައި ކުޑަ ފިރިހެން ކުއްޖަކަށް ބުލީކޮށް، އޭނާ ލައްވާ ޓިކްޓޮކް ވީޑިއޯތައް ހަދަމުންދާ މައްސަލައެއް ފެންމަތިވެއްޖެއެވެ.
ކުޑަ ފިރިހެން ކުއްޖަކު ޓިކްޓޮކްގައި ލަވަ ކިޔައި، ވާހަކަ ދައްކާ ވީޑިއޯތައް އާންމުވެފައި ވާއިރު، ވީޑިއޯއިން ފެންނަ ގޮތުގައި އޭނާ އެކަން ކުރަނީ ބަޔަކު މަޖުބޫރު ކޮށްގެންނެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެ ކުއްޖާއަކީ އާއިލާގެ ފަރާތުން އެންމެ އެކަށީގެންވާ އަޅާލުން ނުލިބޭ ކުއްޖެކެވެ.
އަދި އޭގެ ތެރެއިން ބައެއް ވީޑިއޯތަކަކީ ހަގީގަތުގައިވެސް އެކުއްޖާއަށް އޭނާއާ އެއް އުމުރުފުރާގެ ކުދިންތަކެއް ބުލީކޮށް، މަޖުބޫރު ކޮށްގެން ކުޅުވާފައިވާ ވީޑިއޯތަކެއްކަން އެކަމުގެ މައުލޫމާތު އެނގޭ ފަރާތަކުން ރާއްޖެއެމްވީއަށް ކިޔާދިނެވެ.
އެކަމާ ގުޅޭގޮތުން ރާއްޖެއެމްވީން ފުލުހުންނާ ގުޅާލުމުން ފުލުހުން ބުނީ، ދިވެހި ފުލުހުންގެ ޚިދުމަތުން އެކި ފަހަރުމަތިން އާއިލާއާވެސް ބައްދަލުކޮށްފައިވާ ކަމަށާއި، ކުޑަ ކުއްޖަކަށްވާތީ ފުލުހުންގެ ނިޒާމުގެ ތެރެއިން އަޅަންޖެހޭ ފިޔަވަޅުތައް އަޅާފައިވާ ކަމަށެވެ. ނަމަވެސް އެކަމުގެ އެދެވޭ ނަތީޖާއެއް މިހާތަނަށްވެސް ފެނިފައިނުވާކަން ފުލުހުން ފާހަގަ ކުރެއެވެ.
އެކަމާ ގުޅިގެން އިތުރަށް ބަލަންޖެހޭ ކަންކަން ބަލާނެކަމަށް ފުލުހުން ބުނެފައިވެއެވެ.
މައުލޫމާތު ލިބޭ ގޮތުގައި އެ ކުއްޖާއަކީ ސްކޫލަށްވެސް ދާ ކުއްޖެއް ނޫނެވެ. ނަމަވެސް އެ އުމުރުގެ ކުއްޖަކު ސްކޫލަށް ނުގޮސް އުޅޭއިރު، ޖެންޑަރ މިނިސްޓްރީ ފަދަ އިދާރާތަކުގެ ސަމާލުކަމަށް އެކަން ނާދޭތޯ ބައެއް ފަރާތްތަކުން ދަނީ ސުވާލު އުފައްދަމުންނެވެ.
