ސާފް ޗެމްޕިއަންޝިޕަށް ބިދޭސީ ޓީމުތައް، ޕާކިސްތާނާމެދު ޔަގީންކަމެއް ނެތް

ޖޫން މަހު އިންޑިޔާގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ސަރަހައްދަށް ނިސްބަތްނުވާ ދެ ގައުމެއް ބައިވެރިކުރަން މަޝްވަރާކުރަމުންދާ ކަމަށް ސާފުން ބުނެފި އެވެ.

އޯލް އިންޑިޔާ ފުޓްބޯޅަ ފެޑަރޭޝަނުގެ ރައީސް ކަލްޔަން ޗައުބޭ ވިދާޅުވީ ސާކް ސަރަހައްދުގެ ގައުމުތަކުގެ މުބާރާތަށް އެހެން ސަރަހައްދެއްގެ ދެ ގައުމަކަށް ދައުވަތުދޭން ވިސްނަނީ މުބާރާތުގެ ފެންވަރު ރަނގަޅު ކުރުމުގެ ގޮތުންކަމަށެވެ.

އޭނާ އިޝާރާތް ކުރެއްވީ ސާފް ޗެމްޕިއަންޝިޕުގެ 13 މުބާރާތް ބާއްވާފައިވާއިރު 8 މުބާރާތް އިންޑިޔާ ކާމިޔާބުކޮށްފައިވާތީ އެވެ. ބާކީ ފަސް މުބާރާތުގެ ތެރެއިން ދެ މުބާރާތް ދިވެހިރާއްޖެ ކާމިޔާބުކޮށްފައިވާއިރު، އަފްގާނިސްތާނާއި، ބަނގްލަދޭޝް އަދި 1995 ވަނަ އަހަރު ލަންކާ މުބާރާތް ކާމިޔާބުކުރި އެވެ.

ޕާކިސްތާނާއި އިންޑިޔާގެ ސިޔާސީ ކޯޅުންތަކުގެ ސަބަބުން ޕާކިސްތާނަށް ފުޓްބޯޅަ ކުޅެން އިންޑިޔާ އަށް ދެވޭނީ އިންޑިޔާގެ ފޮރިން މިނިސްޓްރީ އާއި އެ ގައުމުގެ ގަވާއިދުތަކާ އެއްގޮތްވާ ގޮތުގެ މަތީން ކަމަށް ވެސް ޗައުބޭ ވިދާޅުވި އެވެ. މި މޭރުމުން ވާހަކަ ދައްކަމުން އޭނާ ވިދާޅުވީ އެއްވެސް ގައުމަކަށް ފުޓްބޯޅައިން ފުރުސަތު ގެއްލުވާލަން ބޭނުންނުވާ ކަމަށެވެ.