ޔޫތް ނެޓްބޯޅަ ޗެމްޕިއަންޝިޕަށް ނެޓްބޯޅަ ޓީމް އެކުލަވާލައިފި

އޭޝިއަން ޔޫތު ނެޓްބޯލް ޗެމްޕިއަންޝިޕުގައި ވާދަކުރާ ގައުމީ ނެޓްބޯލް ޓީމުގެ ސްކޮޑު އިއުލާންކޮށްފި އެވެ.

މި މުބާރާތުގައި ވާދަކުރުމަށް މި އަހަރުގެ ޖެނުއަރީ މަހު ފަރިތަކުރުންތައް ފެށި ޓީމުގައި ގިނަ އަދަދެއްގެ ކުޅުންތެރިން ތިބި ނަމަވެސް މިހާރު ވަނީ 12 ކުޅުންތެރިންނަށް މަދުކޮށްފަ އެވެ.

މިފަހަރުގެ ޓީމްގައި ސީނިއާ ޓީމަށް ކުޅެފައިވާ ކުޅުންތެރިންނާއި، މުޅިން އަލަށް ނެޓްބޯޅަ ގައުމީ ޓީމުން ފުރުސަތު ހޯދި ކުޅުންތެރިންވެސް ހިމެނެ އެވެ.

މުބާރާތަށް ޓީމު ވަމުންދާ ތައްޔާރީތަކާ ބެހޭ ގޮތުން ނެޓްބޯލް އެސޯސިއޭޝަންގެ ސީއޯއޯ އަހުމަދު އަދުހަމް ވިދާޅުވީ ޓީމުގެ ފަރިތަކުރުންތައް ކޮންމެ ދުވަހެއްގެ ވެސް ހެނދުނާއި ރޭގަނޑު ކުރިއަށްދާ ކަމަށެވެ.

އަދުހަމް ވިދާޅުވީ މިފަދަ ބޮޑު މުބާރާތަކަށް ޓީމު ތައްޔާރުވާއިރު، އެ ކުޅުންތެރިންނަށް މެޗުތަކެއްގެ ތަޖުރިބާ ބޭނުންވާނެ ކަމަށާއި އެހެން ނަމަވެސް މިވަގުތު އެސޯސިއޭޝަންގެ ބަޖެޓު ތަން ނުދިނުމުގެ ސަބަބުން ބޭރުން ތަމްރީނު ދަތުރެއް ހަމަޖެހިފައި ނުވާ ކަމަށެވެ. ނަމަވެސް އަމިއްލަ ގައުމުގައި ކުރިއަށްދާ ފަރިތަކުރުންތަކުން ބޮޑު ކުރިއެރުމެއް ލިބޭނެ ކަމަށް އުންމީދުކުރާ ކަމަށް އަދުހަމް ވިދާޅުވި އެވެ.

ރާއްޖޭގެ ނެޓްބޯޅަ އަންހެން ޓީމު ވަނީ މީގެ ކުރިން ވެސް ބޮޑު މުބާރާތެއްގައި ވާދަކޮށް ރަނގަޅު ހިސާބަކަށް ދަތުރުކޮށްފަ އެވެ. އެ ޓީމުގައި ވެސް ޒުވާން ކުޅުންތެރިންތަކެއް ހިމެނުނު އިރު، އޭގެ ތެރެއިން ބައެއް ކުޅުންތެރިން މިފަހަރުގެ ޓީމުގައި ވެސް ހިމެނެ އެވެ.

އޭޝިއަން ޔޫތު ނެޓްބޯލް ޗެމްޕިއަންޝިޕް އޮންނާނީ އަންނަ މަހުގެ 6 އިން 13 އަށް ދެކުނު ކޮރެޔާގެ ޖިއޮންޖޫގަ އެވެ. މުބާރާތުގައި އޭޝީޔާގެ ދިހަ ގައުމަކުން ވާދަކުރާނެ އެވެ.

ކޮރެއާގައި އަންނަ މަހުގެ 6 ވަނަ ދުވަހު ފެށުމަށް ހަމަޖެހިފައިވާ މި މުބާރާތުގައި ވާދަކުރުމަށް ނެޓްބޯލް ޓީމު ފުރުމަށް ހަމަޖެހިފައި ވަނީ އަންނަ މަހުގެ 3 ވަނަ ދުވަހު އެވެ.