ރައީސް ޔާމީންގެ އިސްތިއުނާފްގެ މައްސަލަ އިސްލާހުކޮށް އަނެއްކާވެސް ހައިކޯޓަށް

ރިޝްވަތު ގަބޫލު ކުރުމާއި މަނީ ލޯންޑްރިންގެ ކުށް ސާބިތުވެ ޖަލު ހުކުމެއް ތަންފީޒްކުރައްވަމުން ގެންދަވާ، ކުރީގެ ރައީސް އަބްދުﷲ ޔާމީންގެ ޖަލު ހުކުމުގެ އިސްތިއުނާފްގެ މައްސަލަ އިސްލާހު ކުރުމަށްފަހު އަލުން ހައި ކޯޓަށް ހުށަހަޅައިފި އެވެ.

ވ.އާރަށުގެ މުއާމަލާތާއި ގުޅިގެން މަނީ ލައުންޑާ ކުރުމާއި ރިޝްވަތު ގަބޫލުކުރުމުގެ ކުށް ސާބިތުވުމާއި ގުޅިގެން ރައީސް ޔާމީން 11 އަހަރަށް ޖަލަށްލާން ކްރިމިނަލް ކޯޓުން ވަނީ ޙުކުމްކޮށްފައެވެ. އެމަނިކުފާނުގެ މައްޗަށް މި ހުކުމް ކޮށްފައިވަނީ މިދިޔަ ޑިސެމްބަރުމަހުގެ 25 ވަނަ ދުވަހުއެވެ. އެންމެ ފުރަތަމަ އެ ހުކުމް އެމަނިކުފާނުގެ ފަރާތުން ހައިކޯޓުގައި އިސްތިއުނާފްކުރީ މިދިޔަ ފެބްރުއަރީ މަހުގެ 21 ވަނަ ދުވަހުއެވެ. އެ މައްސަލަ އާއި ގުޅިގެން ހުށަހެޅި އިސްތިއުނާފު އިސްލާހުކުރަން ހައި ކޯޓުން ވަނީ މާރޗް މަހުގެ 10 ވަނަ ދުވަހު އަންގާފައެވެ. މި މައްސަލަ ހައިކޯޓަށް އަލުން ހުށަހެޅި ނަމަވެސް މައްސަލަ ބަލައިގަތުމާ މެދު އަދި އެ ކޯޓުން އަދި ވަކި ގޮތެއް ނިންމާފައެއް ނުވެއެވެ.

މި މައްސަލަ އިސްތިއުނާފްކުރަން ހުށަހަޅާފައި ވާއިރު، ވ.އާރަށުގެ ޚިޔާނާތާއި ގުޅިގެން ރައީސް ޔާމީން ލޯންޑާކުރެއްވިކަން ސާބިތުވެފައިވާ 3.4 މިލިއަން ޑޮލަރު (52 މިލިއަން ރުފިޔާ) ދައުލަތަށް ދައްކަން ކްރިމިނަލް ކޯޓުން ޔާމީންގެ މައްޗަށް ކޮށްފައިވާ އަމުރު ވެސް އެމަނިކުފާނުގެ ފަރާތުން ވަނީ އިސްތިއުނާފަށް ހުށަހަޅާއިފައެވެ.

ރައީސް ޔާމީން މި ހިނގާ މާރޗް މަހުގެ ތެރޭގައި މިނިވަން ވާނެ ކަމަށާއި މި މައްސަލަ ނިމެންދެން އެމަނިކުފާނު ކަފާލާތުގެ ދަށުން މިނިވަންކޮށްދިނުމަށް ހައި ކޯޓުގައި އެދޭނެ ކަމަށް އެމަނިކުފާނުގެ ޤާނޫނީ ޓީމުން ބުނެއެވެ.

އާރަށު މައްސަލައިގައި ޔާމީނު ލޯންޑަރ ކުރި މިލިއަން ޑޮލަރާއި އެއާ އެއްކުރި 2 މިލިއަން ޑޮލަރުގެ އިތުރުން އޭގެން ހޯދި މަންފާ ދައުލަތަށް ދައްކަން ވެސް ކްރިމިނަލް ކޯޓުން ވަނީ އަމުރުކޮށްފައެވެ. ދައުލަތަށް ފައިސާ ނެގުމަށް އަމުރު ކުރި ސަބަބަށް ބަލާއިރު، ރައީސް ޔާމީން ރިޝްވަތުގެ ގޮތުގައި ޤަބޫލު ކުރެއްވި 1 މިލިއަން ޑޮލަރުގެ ޗެކު އެޗްއެސްބީސީ އެކައުންޓަށް ޖަމާކުރެއްވުމަށްފަހު، އެ އެކައުންޓުގައި ހުރި އިތުރު ފައިސާއާއެކު 1،001،409 (އެއް މިލިއަން އެއްހާސް ހަތަރުސަތޭކަ ނުވަ) އެމެރިކާ ޑޮލަރު ބީއެމްއެލް އެކައުންޓަށް ވަނީ ޖަމާކުރައްވާފައެވެ. އަދި އެ އެކައުންޓުގައި ހުރި އިތުރު ފައިސާއާއެކު ޖުމުލަ 1،295،000 (އެއް މިލިއަން ދެލައްކަ ނުވަދިހަ ފަސްހާސް) އެމެރިކާ ޑޮލަރު އިސްލާމިކް ބޭންކު އެކައުންޓަށް ވަނީ ޖަމާކުރައްވާފައެވެ.

މީގެ އިތުރުން އެ އެކައުންޓުގައި ހުރި އިތުރު ފައިސާއާއެކު 3،413،230 (ތިން މިލިއަން ހަތަރުލައްކަ ތޭރަހާސް ދުއިސައްތަ ތިރީސް) އެމެރިކާ ޑޮލަރު އެމްއައިބީގައި ރައީސް ޔާމީނުގެ ނަމުގައި ހުޅުއްވާފައިވާ އެހެން އެކައުންޓަކަށް ޖަމާކުރައްވާ، 36 މަސް ދުވަސް ވަންދެން ވަނީ ފައިދާ ހޯއްދަވާފައެވެ.

ވުމާއެކު، ޔާމީން ލޯންޑާކޮށްފައިވާ އެއް މިލިއަން އެމެރިކާ ޑޮލަރާއި އެއާ އެއްކޮށްފައިވާ 2،413،230 (ދެމިލިއަން ހަތަރުލައްކަ ތޭރަހާސް ދުއިސައްތަ ތިރީސް) އެމެރިކާ ޑޮލަރުގެ އިތުރުން، ފައިސާ އިންވެސްޓުކޮށްގެން ހޯދާފައިވާ މަންފާ ދައުލަތަށް ނަގައިދޭން އެދި ކުރި މަނީލޯންޑަރިންގެ ދައުވާ ސާބިތުވާކަމަށް ކްރިމިނަލް ކޯޓުން ޙުކުމްކޮށްފައިވާތީ އެ ފައިސާ ދައުލަތަށް ނެގުމަށް ވަނީ އަމުރުކޮށްފައެވެ. މި ފައިސާ 6 މަސް ދުވަހުގެ ތެރޭގައި ދައުލަތަށް ދެއްކުމަށް ވަނީ އަމުރުކޮށްފައެވެ.