ކުރީގެ ރައީސް އަބްދުﷲ ޔާމީން ގެއަށް ބަދަލުކޮށްދިނުމަށް އެދި ހުށަހަޅާފައިނުވާ ކަަމަށް ކޮމިޝަނަރ އޮފް ޕްރިޒަންސް އަޙުމަދު މުޙައްމަދުފުޅު ވިދާޅުވެއްޖެއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި އިދިކޮޅު ކޮންގްރެސްއިން ބުނެފައިވަނީ ކުރިއަށް އޮތް ރޯދަ މަހަށް ރައީސް ޔާމީން ގެއަށް ބަދަލުކުރުމުގެ މަސައްކަތް ކުރަމުންދާ ކަމަށެވެ. ރައީސް ޔާމީން ގެއަށް ބަދަލުކުރެވޭތޯ ޕާޓީން ކުރެވެން ހުރި ހުރިހާ މަސައްކަތެއް ކުރަމުން އަންނަ ކަމަށް ކޮންގްރެސްއިން ބުނެއެވެ.
މިކަމާއި ގުޅޭގޮތުން ރާއްޖެއެމްވީއަށް ކޮމިޝަނަރު ވިދާޅުވީ މިހާތަނަށް ރައީސް ޔާމީން ގެއަށް ބަދަލުކޮށްދިނުމަށް އެދި ހުށަހަޅާފައިނުވާ ކަމަށެވެ. އަދި ކުރިއަށް އޮތްތަނުގައި ރައީސް ޔާމީން ގެއަށް ބަދަލުކުރުމަށް ހުށަހެޅި ނަމަވެސް ގެއަށް ބަދަލުކުރެވޭނީ ގާނޫނަށް ބެލުމަށްފަހު ކަމަށާއި، ވަގުތީ ގޮތުން ގެއަށް ބަދަލުކުރެވޭ ހާލަތަށް ރިޔާއަތް ކުރާނެ ކަމަށެވެ.
ވ. އާރަށު ހިޔާނާތުގެ މައްސަލައިގައި ޔާމީނު 11 އަހަރަށް ޖަލަށް ލައި، 5 މިލިއަން ޑޮލަރުން ޖޫރިމަނާ ކުރުމަށް އެ ކޯޓުގެ އިސްގާޒީ އަހުމަދު ޝަކީލު ޙުކުމް ކުރައްވާފައިވަނީ މިދިޔަ ޑިސެމްބަރު މަހުގެ 25 ވަނަ ދުވަހުއެވެ.
