ފަސޭހަ މޮޅަކާއެކު ނަޕޯލީން ތާރީޚީ ކާމިޔާބީއެއް ހޯދައިފި
16 މާރިޗު 2023 | ބުރާސްފަތި 03:27ނަޕޯލީ ވަނީ ކްއާޓާ ފައިނަލަށް ދަތުރުކޮށްފަ
އޮސީމަން ނަޕޯލީގެ ފުރަތަމަ ގޯލް ޖަހަނީ
ދެވަނަ ލެގުގައިވެސް ހޯދި ފަސޭހަ މޮޅާއެކު, ޗެމްޕިއަންސް ލީގުގެ ކުއާޓާ ފައިނަލުން ނަޕޯލީ ޖާގަ ހޯދައިފިއެވެ.
މުބާރާތުގެ ކުއާޓާ ފައިނަލުން ނަޕޯލީ ފުރަތަމަ ފަހަރަށް ޖާގަ ހޯދީ ދެވަނަ ލެގުގައި ޖަރުމަނުގެ އައިންޓްރަކްޓް ފްރޭންކްފާޓް 3-0 ން ބަލިކޮށް, 5-0 ގެ އެގްރިގޭޓުން ކުރިހޯދައިގެންނެވެ. ދެވަނަ ލެގުގައިވެސް ތަރިއަކަށްވީ ތަފާތު ފޯމެއްގައި ހުރި ނައިޖީރިޔާގެ ފޯވާޑް އޮސީމެންއެވެ. ނަޕޯލީގެ ފުރަތަމަ ދެ ގޯލްވެސް ޖެހީ އޭނާއެވެ. ފުރަތަމަ ގޯލް ޖަހާ ކުރި ހޯދައިދިނީ ފުރަތަމަ ހާފްގެ އިތުރު ވަގުތުގައެވެ. ނަޕޯލީގެ ތިންވަނަ ލަނޑު ދެވަނަ ހާފްގައި ޖެހީ ޒިއެލެންސްކީއެވެ.
މިސީޒަންގައި ތަފާތު މޮޅަށް ކުޅެ, ރަނގަޅު ނަތީޖާތަކެއް ހޯދަމުން އަންނަ ނަޕޯލީ އޮޓީ އިޓާލިއަން ސެރީ އޭގައިވެސް ތާވަލްގެ އެއްވަނާގައި ބޮޑު ލީޑެއްގައެވެ.
