ނަޕޯލީ އަށް ކުޅެމުން އަންނަ ނައިޖީރިއާގެ ވިކްޓަ އޮސީމެން، ނަޕޯލީގެ އިޓާލިއަން ލީގުގެ ލިސްޓުން އުނި ކުރުމާއެކު، އޭނާ ކުޅެމުން އަންނަ ނުވަ ނަންބަރު ޖާޒީ އަތުލާން ނިންމައިފި އެވެ.
ލީލް ދޫކޮށް އޮސީމެން ނަޕޯލީ އަށް ބަދަލުވީ 2020 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ބާކީ ދެ އަހަރު އޮއްވާ، އޮސީމެން ހުރީ ނަޕޯލީ ދޫކޮށްލަން ބޭނުންވެފަ އެވެ. އޭނާ ހޯދުމުގެ މަސައްކަތް ޗެލްސީން ކޮށްފައިވާއިރު، އެ މަސައްކަތް މިހާރު ވަނީ ނާކާމިޔާބުވެފަ އެވެ. އޮސީމެން އާއި ނަޕޯލީއާ ދެމެދު އޮތް ގުޅުން ގޯސްވެފައިވާ ކަމަށް މީގެ ކުރިން ވަނީ މީޑިއާ ތަކުގައި ވަނީ ރިޕޯޓުކޮށްފަ އެވެ.
އިޓަލީގެ މީޑިއާ ތަކުގައި ބުނެފައިވާ ގޮތުން ނަޕޯލީގެ ލިސްޓުން އޮސީމެންގެ އިތުރުން، މާރިއޯ ރުއީ އުނި ކުރުމަށް ވަނީ ނިންމައިފަ އެވެ. އެއީ ނަޕޯލީން ކުރިއަށްދާން ގެންގުޅެމުން އަންނަ ޕްލޭންގައި އެ ދެ ކުޅުންތެރިން ނުހިމެނޭތީ ކަމަށް ވެސް ރިޕޯޓުތަކުގައި ވަނީ ބުނެފަ އެވެ. އެހެންކަމުން އޮސީމެން އާއި ރުއީ ވެސް ބޭނުން ވަނީ ނަޕޯލީ ދޫކޮށްލަން ކަމަށް ވެސް ބުނެފައިވެ އެވެ.
އޮސީމެން އަތުން ނަޕޯލީގެ ނުވަ ނަންބަރު ޖާޒީ އަތުލުމަށްފަހު، އެ ނަންބަރު ދިނުމަށް ނިންމާފައި ދާދި ފަހުން އެ ކުލަބަށް ބަދަލުވި ބެލްޖިއަމްގެ ރޮމެލޫ ލުކާކޫ އަށެވެ. އެހެންކަމުން ނަޕޯލީގެ ނުވަ ނަންބަރު ޖާޒީގައި ދެން ފެނިގެން ދާނީ ލުކާކޫ އެވެ.
އޮސީމެން ވަނީ ނަޕޯލީ އަށް ކުޅެދިން 133 މެޗުގައި 75 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ އިޓާލިއަން ލީގު ވެސް ކާމިޔާބު ކޮށްފަ އެވެ.
