އޮސީމެން ހޯދުމަށް ޗެލްސީން ކުރި މަސައްކަތް ނާކާމިޔާބު ވެއްޖެ

ނަޕޯލީ އަށް ކުޅެމުން އަންނަ ނައިޖީރިއާގެ ވިކްޓަ އޮސީމެން ހޯދުމަށް ޗެލްސީން ކުރި މަސައްކަތް ނާކާމިޔާބު ވެއްޖެ އެވެ.

ލީލް ދޫކޮށް އޮސީމެން ނަޕޯލީ އަށް ބަދަލުވީ 2020 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ބާކީ ދެ އަހަރު އޮއްވާ، އޮސީމެން ހުރީ ނަޕޯލީ ދޫކޮށްލަން ބޭނުންވެފަ އެވެ.

އުމުރުން 25 އަހަރުގެ ކުޅުންތެރިޔާ ހޯދުމުގެ ޝައުޤުވެރިކަން ފާޅުކޮށް، އޭނާ ހޯދުމުގެ މަސައްކަތް ކުރަމުން އައީ ޗެލްސީގެ އިތުރުން ސައުދީ އަރަބިޔާގެ ސައުދީ ޕްރޯ ލީގުގެ ބައެއް ކުލަބުތަކުންނެވެ. އެހެން ނަމަވެސް، އޭނާ ހޯދުމުގެ ރޭހުގެ ކުރީގައި އޮތީ ޗެލްސީ އެވެ. އޭނާ ހޯދުމަށް ޗެލްސީން ކުރަމުން އައި މަޝްވަރާތަކުގައި، އެއްވެސް ފަރާތަކަށް އެއްބަސްވުމަށް އާދެވިފައި ނުވާ ކަމަށް މީޑިއާ ތަކުން ވަނީ ރިޕޯޓު ކޮށްފަ އެވެ. އެހެންވެ، އޮސީމެން ހޯދުމަށް ޗެލްސީން ކުރަމުން އައި މަސައްކަތް މިހާރު ނާކާމިޔާބުވެފައިވާ ކަމަށާއި، ނަޕޯލީގައި ތިބި ޗެލްސީގެ އޮފިޝަލުން މިހާރު އެނބުރި ގޮސްފައިވާ ކަމަށް ވެސް ބުނެފައިވެ އެވެ.

އެހެންކަމުން ކުރިއަށް އޮތް ތިން ދުވަހުގެ ތެރޭގައި، ސައުދީ ލީގުގެ ކުލަބުތަކުން ކުރަމުން އަންނަ މަސައްކަތް ކާމިޔާބު ނުވެއްޖެ ނަމަ، އޮސީމެން އަށް ޖެހޭނީ ނަޕޯލީގައި މަޑު ކުރާށެވެ. މީޑިއާ ތަކުގައި ބުނެފައިވާ ގޮތުން ނަޕޯލީ އާއި އޮސީމެންގެ ގުޅުން ގޯސްވެފައިވާއިރު، ނަޕޯލީގެ ފުރަތަމަ ޓީމުގައި އޭނާ ބަހައްޓަން ކުލަބުން ދެން ބޭނުމެއް ވެސް ނުވާނެ އެވެ.

އޮސީމެން ވަނީ ނަޕޯލީ އަށް ކުޅެދިން 133 މެޗުގައި 75 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ އިޓާލިއަން ލީގު ވެސް ކާމިޔާބު ކޮށްފަ އެވެ.