އިޓާލިއަން ލީގުގައި ލާޒިއޯއާ ދެކޮޅަށް ކުޅުނު މެޗުން ފަހު ވަގުތު އެއްވަރުވެ، އެއް ވަަނައިގައި ލީޑު ފުޅާ ކުރުމުގެ ފުރުސަތު ނަޕޯލީ އަށް ގެއްލިއްޖެ އެވެ.

ލާޒިއޯގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރުވެގެންނެވެ. މެޗުގައި ލާޒިއޯ އިން ލަނޑު ޖަހައި ލީޑު ހޯދާފައި ވަނިކޮށް، ނަޕޯލީން ފަހަތުން އަރައި ދެ ލަނޑު ޖަހައިގެން ލީޑު ނެގި އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން ލާޒިއޯ އިން ނަތީޖާ ހަމަހަމަ ކުރި އެވެ.

މެޗު ފަށައިގެން ހަ ވަނަ މިނެޓުގައި ލާޒިއޯ އަށް ލީޑު ނަގައިދިނީ ގުސްޓާވް އިސާކްސެން އެވެ. ނަމަވެސް މެޗުގެ 13 ވަަނަ މިނެޓުގައި ޖިއާކޮމޯ ރަސްޕަޑޯރީ ވަނީ ލަނޑު ޖަހައި ނަޕޯލީ އަށް ނަތީޖާ ހަމަހަމަ ކޮށްދީފަ އެވެ.

މެޗުގެ ދެ ވަނަ ހާފު ފަށައިގެން، މެޗުގެ 64 ވަނަ މިނެޓުގައި ނަޕޯލީ އަށް ލީޑު ލިބުނީ ލާޒިއޯގެ ޑިފެންޑަރު އާދަމް މުރުސިޗް އަތުން ބައި ކޮޅަށް ވަތް ލަނޑުންނެވެ. މެޗުން ނަޕޯލީ މޮޅުވާން ދަނިކޮށް، މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް ލާޒިއޯ އަށް ނަތީޖާ ހަމަހަމަ ކޮށްދިނީ ބޮލާޔޭ ޑިއާ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މެޗު އެއްވަރުވެ ނަޕޯލީ އެއް ވަަނައިގައި އޮތީ މިހާތަނަށް އެ ޓީމު ކުޅެފައިވާ 25 މެޗުން 56 ޕޮއިންޓާ އެކު އެވެ. ނަޕޯލީ އަށް ވުރެ އެއް މެޗު މަދުން ކުޅެގެން ދެ ވަނައިގައި އިންޓަރ މިލާނަށް ލިބެނީ 54 ޕޮއިންޓެވެ. އެހެންކަމުން މެޗުގެ އަދަދު ހަމަކުރާއިރު، އެއް ވަނަ އަށް ޖެހިލުމުގެ ފުރުސަތު އިންޓަރ މިލާނަށް އޮންނާނެ އެވެ.