ޕާކިސްތާނު ގައި ތެރަސް ހަދާ ކާރުޚާނާ އެއް ގޮވައި، މަދުވެގެން 16 މީހުން މަރު ވެއްޖެ

ޕާކިސްތާނުގައި ތެރަސް ހަދާ ކާރުޚާނާއެއް ގޮވައި، މަދުވެގެން 16 މީހުން މަރު ވެއްޖެ އެވެ.

އިރުމަތީ ޕާކިސްތާނު ގެ ސަރަހައްދެއް ގައި ހިނގި މި ހާދިސާ ގެ ސަބަބުން، ކާރުޚާނާ ވެއްޓި، ކައިރީގައި ހުރި ގެތަކެއްގައި އަލިފާން ރޯވެ، މަދުވެގެން 16 މީހުން މަރުވެ، ހަތް މީހުންނަށް އަނިޔާވެފައިވާ ކަމަށް ޕާކިސްތާނުގެ މީޑިއާތަކުން ރިޕޯޓުކޮށްފައި ވެއެވެ.

މި ހާދިސާ ހިނގާފައިވަނީ ހުކުރު ދުވަހުގެ ފަތިހު ގާތްގަނޑަކަށް 5 ޖެހި އިރު (00:00 ޖީއެމްޓީ) ޕަންޖާބު ޕްރޮވިންސްގެ ލާހޯރުގެ ހުޅަނގުން އޮންނަ ފައިސަލްއާބާދުގެ މާލިކްޕޫރު ސަރަހައްދުގައެވެ.

ފައިސަލްއާބާދުގެ ކޮމިޝަނަރު ރާޖާ ޖަހާންގީރު އަންވަރު އާ ހަވާލާދީ އެގައުމުގެ މީޑިއާތަކުން ރިޕޯޓުކޮށްފައިވާ ގޮތުގައި، މިހާތަނަށް ކުރެވުނު ތަހުގީގުތަކުން ދައްކާ ގޮތުގައި މި ގޮވުން ހިނގާފައިވަނީ ކާރުޚާނާގެ ކެމިކަލް ގުދަނެއްގައި ހުރި ގޭސް ލީކުވެގެންނެވެ.

އޮފިޝަލުން ވަނީ ކާރުޚާނާގެ މެނޭޖަރު ހައްޔަރުކޮށްފައެވެ. ނަމަވެސް ހާދިސާއަށް ފަހު ފިލި ކާރުޚާނާގެ ވެރިފަރާތް ހޯދުމުގެ މަސައްކަތް ދަނީ ކުރަމުންނެވެ.

ޕާކިސްތާނުގެ 'އާޖް ޓީވީ' އިން ރިޕޯޓުކޮށްފައިވާ ގޮތުގައި، މި ގޮވުމުގެ ސަބަބުން މަދުވެގެން ތިން ގޭގައި އަލިފާން ރޯވެފައިވެއެވެ. އެ ޗެނަލުން އާންމުކޮށްފައިވާ ފޮޓޯތަކުން ފެންނަ ގޮތުގައި، ގޮވުން ހިނގި މައި ސަރަހައްދުން އަލިފާނުގެ ހުޅުގަނޑު މައްޗަށް އަރަމުންދާއިރު، ރެސްކިއު ޓީމުތައް އަލިފާން ރޯވެފައިވާ އިމާރާތެއްގެ ތެރެއަށް ވަދެ ހަރަކާތްތެރިވަމުން ދިޔައެވެ.

އޮފިޝަލުން ބުނި ގޮތުގައި، މަރުވި މީހުންގެ ތެރެއިން ގިނަ މީހުންނަކީ ކާރުޚާނާ ކައިރީގައި ހުރި ގެތަކުގައި ދިރިއުޅޭ މީހުންނެވެ. އޭގެ ތެރޭގައި ހަ ކުޑަކުދިން ހިމެނެއެވެ.

ޓީވީ ޗެނަލް 'ޖިއޯ ނިއުސް' އިން ރިޕޯޓުކޮށްފައިވާ ގޮތުގައި، ރެސްކިއު ޓީމުތަކުން ވަނީ ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ މީހުން ހޯދައި ނެގުމުގެ މަސައްކަތް ކޮށްފައެވެ. އަދި އަނިޔާވި ހަތް މީހުންނަށް ކައިރީގައިވާ ހޮސްޕިޓަލެއްގައި ފަރުވާ ދެމުން އަންނަ ކަމަށްވެއެވެ.

ޕާކިސްތާނުގައި ކާރުޚާނާތަކުގައި އަލިފާނުގެ ހާދިސާތައް ހިނގުމަކީ އާންމު ކަމެކެވެ. 2024 ވަނަ އަހަރު ފައިސަލްއާބާދު ގައި ހުރި ފޭރާން އުފައްދާ ކާރުޚާނާ އެއް ގައި ހިނގި ގޮވުމެއް ގައި 12 މީހުން މަރުވެފައިވާއިރު، މިދިޔަ ހަފުތާގައި ކަރާޗީ ގައި ހުރި ފަޓާސް އުފައްދާ ކާރުޚާނާ އެއް ގައި ހިނގި ގޮވުމެއްގައި ހަތަރު މީހުން މަރުވެ، 11 މީހުންނަށް އަނިޔާވެފައިވެއެވެ.