48 ޓީމުގެ ވޯލްޑް ކަޕެއް، 11 ބިލިއަން ޑޮލަރުގެ އާމްދަނީއެއް
2026ގެ ވޯލްޑް ކަޕް ބާއްވާނީ އެމެރިކާ އާއި ކެނެޑާ އަދި މެކްސިކޯގައި
ެއެންމެ ފަހުގެ ވޯލްޑް ކަޕުގެ ޗެމްޕިއަން އާޖެންޓީނާ ކުޅުންތެރިން ތައްޓާއެކު
2026 ވަނަ އަހަރު ބާއްވާ ވޯލްޑް ކަޕް ފުޓްބޯޅަ މުބާރާތުގައި ކުޅޭ ޓީމުތަކުގެ 48 އަށް ބަދަލުކުރުމުން ފީފާ އަށް 11 ބިލިއަން ޑޮލަރުގެ އާމްދަނީ އެއް ލިބޭނެކަމަށް އެ ޖަމާއަތުން އިއުލާނުކޮށްފި އެވެ.
ރުވާންޑާގެ ކިގަލީގައި ކުރިއަށްދާ ފީފާ ކޮންގްރެސްއިން މި ގޮތަށް ބަދަލު ކުރަން ފާސް ކުރުމުން މުބާރާތުގައި ކުޅޭ މެޗުތަކުގެ އަދަދު 104އަށް އަރާނެ އެވެ.
2026ގެ ވޯލްޑްކަޕް އޮންނާނީ ތިން ގައުމެއްގަ އެވެ. އެއީ އެމެރިކާ އާއި ކެނެޑާ އަދި މެކްސިކޯ އެވެ.
ފީފާއިން ކުރިން ވިސްނާފައި އޮތީ 48 ޓީމު ތިން ޓީމު ހިމެނޭ ގޮތަށް 16 ގްރޫޕަކަށް ބަހާލާށެވެ. ނަމަވެސް ގަތަރުގައި މިދިޔަ ޑިސެމްބަރު މަހު ބޭއްވި ވޯލްޑްކަޕަށް ފަހު މި ވިސްނުން ބަދަލުކޮށް މިހާރު ނިންމާފައިވަނީ ހަތަރު ޓީމު ހިމެނޭ ގޮތަށް ގްރޫޕް ބަހާލުމަށެވެ. މި ގޮތަށް ބަހާލުމުން ފައިނަލަށްދާ ޓީމު މިހާރު ކުޅޭ ހަތް މެޗުގެ ބަދަލުގައި އަށް މެޗު ކުޅެންޖެހޭނެ އެވެ.
ފީފާ ވޯލްޑްކަޕުގެ އަދަދު 32 އިން 48 އަށް ބަދަލު ކުރުމަކީ ރައީސް ޖިއާނީ އިންފަންޓީނޯގެ ވަރަށް ބޮޑު ވައުދެކެވެ. އޭނާ އަންނަނީ ތިން ވަނަ ދައުރަކަށް އިންތިހާބުވުމަށް ތައްޔާރުވަމުންނެވެ.
