ގައްޒާގައި ފަތުރުވެރި މަންޒިލެއް ހިންގަނީ ދޮށީ އުމުރުގެ އަންހެން ދަނޑުވެރިއެއް!

ޔަހޫދީ އިޒްރޭލާ ބޯޑަރު ހިއްސާކުރާ ގައްޒާގެ މި އަވަށުން ފެނިގެންދަނީ ތަފާތު މަންޒަރެކެވެ. އެކަމުގެ ފަހަތުގައި ހުރީ، ޣައްޒާގައި ދަނޑުވެރިކަން ކޮށް އުޅުނު ދޮށީ ޢުމުރުގެ އަންހެނެކެވެ. އަމޫނާ އަބޫ ރަޖީލާ، އޭނާގެ ދަނޑުބިން ބަދަލުކޮށްލީ ފަތުރުވެރި މަންޒިލަކަށެވެ. ބޯ ހަމަޖައްސާލަން ބޭނުންވާ އަންހެނުންނަށް އެ ފުރުސަތު ފަހިކޮށްދޭ ތަނަކަށެވެ.

އަމޫނާގެ މި ހިތްގައިމު މަންޒިލުން، ގައްޒާގެ ސަގާފީ ކެއުންތައް ލިބެއެވެ. ރޭގަނޑުގެ ވަގުތުތައްވެސް އެ ސަރަހައްދުގައި ހޭދަކޮށްލުމުގެ ފުރުސަތު އޮންނައިރު، އެއްވެސް ކަމެއް ނުކޮށް، ބޭރުގައި އިށީނދެލައިގެންވެސް ހަމަ އިންނަންވީއެވެ. އަމޫނާގެ މި ހިތްގައިމު ފަތުރުވެރި މަންޒިލް ފަރުމާކޮށްފައިވަނީ، ސިޓީގެ ހަލަބޮލި ހާސް ދިރިއުޅުމުން ހިނދުކޮޅަކަށްވެސް މިންޖުވެލެވޭގޮތަށެވެ.

އުމުރުން 69 އަހަރުގެ ވިޔަފާރިވެރިޔާ، އަމޫނާ ބުނިގޮތުގައި، މި ތަނަކީ އިންތިހާއަށް އަރާމު ލިއްބައިދޭނެ ތަނެކެވެ.

ގައްޒާގެ ގިނަ މީހުންނަކީ، މާ ގިނަ ތަންތަނަށް ދަތުރުކުރުމުގެ ފުރުސަތު އޮތް ބައެއް ނޫނެވެ. އިޒްރޭލާއި މިސްރުގެ އިތުރުން، ފަލަސްތީނުގެ މައި ސަރުކާރުން ކުރިމަތިކުރާ ފިއްތުންތަކާއެކު، ގައްޒާ ތެރޭގައި އެމީހުން ތާށިވެފައި ތިބޭތާ އެތައް އަހަރެއް ވެއްޖެއެވެ. ބައިނަލްއަގުވާމީ މުޖުތަމައުން ގައްޒާ ސިފަކުރަނީވެސް، ދުނިޔޭގައި އޮތް އެންމެ ބޮޑު، އަނގަމަތި ހާ ޖަލުގެ ގޮތުގައެވެ. މިފަދަ ހާލެއްގައި ވަނިކޮށް، އަމޫނާ ހާއްސަކުރި އޭނާ ދަނޑުބިން ވެފައިވަނީ، ގައްޒާގެ އަންހެނުންނަށް ލިބުނު ނަސީބަކަށެވެ.

އަމޫނާގެ ފަރާތުން ލިބެމުންދާ ޚިދުމަތުގެ އަގު، އޭގެ އެންމެ އިންތިހާއަށް ވަޒަންކުރާ އެކަކީ އީމާން އަބޫ ހަސަނެވެ.

އަމޫނާ އަމާޒު ހިފާފައިވަނީ ފަލަސްތީނުގެ ތަރިކަ ދެމެހެއްޓުމަށެވެ. އެކަން ކުރަން ގަސްތުކޮށްފައިވަނީ، އޭނާގެ ހިތްގައިމު ދަނޑުބިމުން ލިބެން ހުރި ކާބޯތަކެތީގެ ޒަރީއާއިންނެވެ. އަދި ފަލަސްތީނުގެ އަންހެނުންނަކީވެސް ކަންކަން ކުރެވޭ ބައެއްކަން ސާބިތުކޮށްދިނުމަކީ އަމޫނާގެ މަގުސަދެކެވެ.