ޣައްޒާގެ އިންސާނީ ޙާލަތާ މެދު އެމެރިކާގެ ސްޓޭޓް ޑިޕާޓްމަންޓުން ކަންބޮޑުވުން ފާޅު ކޮށްފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ޣައްޒާއަށް ކުރިމަތިވެފައިވާ އިންސާނީ ޙާލަތު ކަންބޮޑުވާ ހިސާބަށް ގޮސްފައިވާ ކަމަށް އެމެރިކާގެ ސްޓޭޓް ޑިޕާޓްމަންޓުން ބުނެފި އެވެ.

ހުކުރު ދުވަހު ސްޓޭޓް ޑިޕާޓްމަންޓުން ބުނެފައި ވަނީ ޣައްޒާގެ ބަނޑުހައި ހޫނު ކަމުގެ ޙާލަތާ ގުޅޭ ގޮތުން އދ އިން ނެރެފައިވާ ރިޕޯޓު ދިރާސާ ކުރަމުން ގެންދާ ކަމަށެވެ. އަދި އެ ސަރަހައްދުގެ އިންސާނީ ޙާލަތު އޮތީ ކަންބޮޑުވާ ހިސާބެއްގައި ކަމަށް ވެސް ސްޓޭޓް ޑިޕާޓްމަންޓުން ވަނީ ބުނެފަ އެވެ.

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ވިދާޅުވެފައިވާ ގޮތުގައި، ހަމާސް ފަދަ "ބާބަރިކް ޓެރަރިސްޓް ޖަމާއަތެއް" ބާރުގައި ހިފެހެއްޓުމަށް ކޮންމެ ކަމެއް ވެސް ކޮށްފާނެ ކަމަަށެވެ. އެ ސަރަހައްދުގައި ކުށްވެރިންގެ މައްސަލަތަކާއި، ރަހީނުންގެ ޙާލަތު އޮތް ހަނގުރާމައިގެ ސަރަހައްދަކަށް އެހީ ފޯރުކޮށްދިނުމުގެ މަސައްކަތް ކުރަމުން ގެންދާ ކަމަށް ވެސް އޭނާ ވިދާޅުވި އެވެ.

އދ އިން ހުކުރު ދުވަހު ވަނީ ޣައްޒާގައި ބަނޑުހައި ހޫނު ކަމުގެ ޙާލަތު ފުރަތަމަ ފަހަރަށް އިއުލާން ކޮށްފަ އެވެ. މީގެ އިތުރުން ނުރައްކާތެރި ޙާލަތްތަކާއި، ބަނޑުހައި ހޫނު ކަމުގެ ޙާލަތުގައި 500،000 (ފަސް ލައްކަ) އަށް ވުރެ ގިނަ މީހުން ތިބި ކަމަށް ވެސް ވަނީ ހާމަކޮށްފަ އެވެ.

ސްޓޭޓް ޑިޕާޓްމަންޓުން ފާހަގަ ކުރި ގޮތުގައި، އދ ގެ ތަފާސް ހިސާބުތަކުން ދައްކާ ގޮތުން މިއަހަރުގެ މެއި މަހުން ފެށިގެން އޮގަސްޓު މަހާ ހަމައަށް، 57،000 ޕެލެޓުގެ ކާބޯ ތަކެއްޗާއި، 4،083 ޓްރަކާއި، 50،000 ޓަނަށް ވުރެ ގިނަ ކާބޯތަކެތި ވަނީ ވަގަށް ނަގައިފަ އެވެ. އެގޮތުން ޣައްޒާ އަށް ކާބޯ ތަކެތި އެތެރެ ކުރި ނަމަވެސް، ބޭނުން ޖެހިފައިވާ މީހުންނަށް އެތަކެތި ނުލިބޭ ކަމަށް ވަނީ ބުނެފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް، އަދި އެ ޤައުމުގެ ސެކްރެޓަރީ އޮފް ސްޓޭޓް މާކޯ ރޫބިއޯ އިސްކަން ދެނީ ހަމާސް އިން އެހީގެ ސާމާނު ވަގަށް ނަގަމުން އަންނަ އައުން ހުއްޓުވުމަށް ފިޔަވަޅުތައް އެޅުމަށެވެ.

އެމެރިކާ ސަރުކާރުން ބުނެފައި ވަނީ އެ މީހުންގެ އަމާޒަކީ ޣައްޒާގެ ރައްޔިތުންނަށް އެހީ ފޯރުކޮށްދިނުމާއި، ހަމާސް އިން ޣައްޒާ ހިންގުން ހުއްޓުވުމަށާއި، އެ ސަރަހަަައްދުގެ ހަނގުރާމަ ނިންމުމަކަށް ގެނައުމެވެ. އެކަން ސްޓޭޓް ޑިޕާޓްމަންޓުންް ނެރުނު ބަޔާނުގައި ވެސް ވަނީ ފާހަގަ ކޮށްފަ އެވެ.

އިސްރާއީލް އިން ޣައްޒާގައި ހަނގުރާމަ ހިންގަމުން އަންނަ އިރު، އެމެރިކާ އަކީ އިސްރާއީލް އަށް އެންމެ ބޮޑަށް ވާގިވެރިވާ ޤައުމެވެ.