މާލޭ ގެއެއްގެ ބެލްކަނިން ވެއްޓި ހަތަރު އަހަރުގެ ކުއްޖަކު ނިޔާވެއްޖެއެވެ.
ރޯޝަނީ މަގުގައި ހުންނަ ހ. އެސްޕީވިލާގެ ފަސްވަނަ ފަންގިފިލާއިން ވެއްޓި މަރުވީ ހަތަރު އަހަރުގެ ފިރިހެން ކުއްޖެކެވެ.
މި ހާދިސާ ހިނގީ ރޭ 12:30 ހާއިރު ކަމަށް މައުލޫމާތު ލިބެއެވެ. އަދި އެ ކުއްޖާ ވެއްޓުނުކަން އެނގުނީ ކޮޓަރީގައި ނެތިގެން ހޯދަމުން ދަނިކޮށްނެވެ. އެހެން ނަމަވެސް، ގޭ ތެރެއިން ނުފެނިގެން ބެލިއިރު އޭނާ އޮތީ ބެލްކަނިން ވެއްޓިފައެވެ.
އެ ކުއްޖާއަށް ފަރުވާދޭން އޭޑީކޭއަށް ގެންދިޔަނަމަވެސް، ހޮސްޕިޓަލަށް ގެންދިޔަތާ މާ ގިނައިރުތަކެއް ނުވެ އެ ކުއްޖާ ވަނީ ނިޔާވެފައެވެ. އެ ކުއްޖާ ބެލްކަނިން ވެއްޓުނު ގޮތް މިހާތަނަށް ސާފުވެފައި ނުވާއިރު ފުލުހުން އަންނަނީ އެ މައްސަލަ ތަހުގީގުކުރަމުންނެވެ.
މިދިޔަ އަހަރުގެ އޭޕްރީލް މަހު ހުުޅުމާލޭގައި ހުންނަ އިމާރާތެއްގެ ފަސްވަނަ ބުރިން ވެއްޓި ހަތަރު އަހަރުގެ އަންހެން ކުއްޖަކު ނިޔާވިއެވެ.
