ގަން އިންޓަރނޭޝަނަލް އެއަރޕޯޓް ތަރައްގީކުރުމަކީ އައްޑޫގައި އިތުރު ސިނާއަތްތައް ކުރިއަރުވަން ލިބޭ ފުރުސަތެއް: އިއާދު
11 މާރިޗު 2023 | ހޮނިހިރު 14:09އެއަރޕޯޓާއެކު، ކޫއްޑޫގެ އިގްތިސާދީ ކުރިމަގު އެ މަސައްކަތާއެކު ވަރަށް ބޮޑަށް ބަދަލުވެގެންދާނެ
ގަން އިންޓަރނޭޝަނަލް އެއަރޕޯޓުގެ ކުރެހުމެއް
ގަން އިންޓަރނޭޝަނަލް އެއަރޕޯޓް ތަރައްގީކުރުމަކީ އައްޑޫގައި އިތުރު ސިނާއަތްތައް ކުރިއަރުވަން ލިބޭ ފުރުސަތެއް ކަމަށް، އިކޮނޮމިކް މިނިސްޓްރީގެ ސްޓޭޓް މިނިސްޓަރު އިއާދު ހަމީދު ވިދާޅުވެއްޖެއެވެ.
ގަން އިންޓަރނޭޝަނަލް އެއަރޕޯޓްގެ މަސައްކަތާއި އައްޑޫ ސިޓީގެ ތަރައްގީގެ މަޝްރޫއުތަކާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން އިއާދު ވިދާޅުވީ، އައްޑޫގެ އިގްތިސާދީ ކުރިމަގު އެ މަސައްކަތާއެކު ވަރަށް ބޮޑަށް ބަދަލުވެގެން ދާނެކަމަށެވެ. އެގޮތުން އައްޑޫގެ ކާގޯގެ މަސައްކަތަށް، އެ މަސައްކަތާއެކު ބޮޑެތި ބަދަލުތަކެއް އަންނާނެކަމަށް އޭނާ ވިދާޅުވިއެވެ. އެހެންކަމުން އައްޑުއަށް ތަކެތި އުފުލުމުގައި ފަސޭހަވެގެންދާނެ ކަމަށް އޭނާ ވިދާޅުވިއެވެ. މީގެ އިތުރުން އައްޑުއަށް އާ ސިނާއަތުތައް ތައާރަފްކުރުމާއި އައްޑޫގައި އިގްތިސާދީ ގޮތުން ކުރިއަށްދާ މަސައްކަތްތައް ފުޅާކުރުމަށްވެސް އައްޑޫގެ އެއަރޕޯޓަކީ ވަރަށް މުހިންމު ތަނެއް ކަމަށް އިއާދު ވިދާޅުވިއެވެ.
2025 ވަނަ އަހަރުގެ ކުރީކޮޅު ފުރިހަމަ އިންޓަރނޭޝަނަލް އެއަރޕޯޓެއްގެ ގޮތުގައި ގަން އިންޓަރނޭޝަނަލް އެއަރޕޯޓް ހުޅުވިގެންދާނެކަން ފާހަގަކުރައްވައި އިއާދު ވިދާޅުވީ، އެއަރޕޯޓުގެ މަސައްކަތް ނިމިގެންދާނީ ހަގީގީ މާނާގައި އިންޓަރނޭޝަނަލް އެއާޕޯޓުގެ ފައިދާ އައްޑުއަށް ލިބޭނެ މަގު ފަހިކޮށްދެވޭގޮތަށް ކަމަށެވެ. އެއަރޕޯޓަކީ 29.7 މިލިއަން އެމެރިކާ ޑޮލަރު ޚަރަދުކޮށްގެން ތަރައްގީކުރާ އެއަރޕޯޓަކަށް ވާއިރު، މި އެއަރޕޯޓާއެކު، 20 އަހަރުތެރޭގައި ވެސް ގަން އެއަރޕޯޓަށް ނުގެނެވޭވަރުގެ ތަރައްގީ ގެނެވިގެންދާނެކަމަށް އޭނާ ވިދާޅުވިއެވެ. އެއަރޕޯޓުގެ މަސައްކަތް ކުރިއަށްދާއިރު އޮޕަރޭޝަނަށް ބުރުލެއް ނާރާނެ ކަމަށްވެސް އިއާދު ވިދާޅުވިއެވެ.
އިއާދު ވިދާޅުވީ އެއްބަސްވުމުގައި ސޮއިކުރުމާއެކު މިހާރު ކުރިޔަށްދަނީ އެމަޝްރޫއު ޑިޒައިންކުރުމުގެ މަސައްކަތްކަމަށެވެ. އެގޮތުން ކުރިޔަށް އޮތް މަސްދުވަސްތެރޭގައި ކޮންޓްރެކްޓަރ ސައިޓަށް މޮބިލައިޒް ކުރާނެކަމަށް އިއާދު ވަނީ ވިދާޅުވެފައެވެ. އިންޑިއާގެ އެގްޒިމް ބޭންކުގެ ލޯނު ފައިސާއިން ކުރިޔަށް ގެންދިއުމަށް ހަމަޖެހިފައިވާ މި މަޝްރޫއުގެ އެއްބަސްވުމުގައި ސޮއިކޮށްފައިވަނީ މިމަހުގެ 5 ވަނަ ދުވަހުއެވެ. މިމަޝްރޫއު ހަވާލުކޮށްފައިވަނީ ރެނާޓަސް ޕްރޮޖެކްޓްސްއާއެވެ.
