ސިޓީ ކައުންސިލްގައި 13 ކޮންސަލްޓަންޓުން ތިބީ ފަންނީ މީހުން ބޭނުންވާތީ: މޭޔަރު
9 މާރިޗު 2023 | ބުރާސްފަތި 13:46ކޮންސަލްޓަންޓުންނަށް ޕީޕީއެމްގެ މީހުން އައްޔަންކުރާ ކަމަށް ބުނެ، އެކަމުގެ ފާޑުކިޔުން ވަނީ އަމާޒުވެފައި
މާލެ ސިޓީ ކައުންސިލްގެ ބައްދަލުވުމެއް
މާލޭ ސިޓީ ކައުންސިލްގައި ކޮންސަލްޓަންޓުންގެ ގޮތުގައި 13 ކޮންސަލްޓަންޓުން އެބަ ތިބި ކަމަށާއި، އެގޮތަށް ހަމަޖައްސާފައި ވަނީ ސިޓީ ކައުންސިލްގެ މަސައްކަތްތައް ރަނގަޅުކުރުމަށް ކަމަށް ސިޓީ ކައުންސިލުން ބުނެފިއެވެ.
ސިޓީ ކައުންސިލްގައި 13 ކޮންސަލްޓަންޓުން ތިބި ކަމަށް މީޑިއާއެއްގައި ރިޕޯޓްކޮށްފައިވާތީ އެކަމާގުޅިގެން ރާއްޖެ އެމްވީން ދެންނެވި ސުވާލުތަކަށް ޖަވާބުދެއްވަމުން މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވީ، 3 ކޮންސަލްޓަންޓުން ނަގާފައިވަނީ ސިޓީ ކައުންސިލަށް ބޭނުންވާ އެކަށީގެންވާ ފަންނީ މީހުން ނެތުމުން ކަމަށެވެ. ސިޓީ ކައުންސިލްގެ މަސައްކަތާ ހަވާލުވެވަޑައިގަތްއިރު އެންމެ ބޮޑު ގޮންޖެހުމަކަށް ދިމާވި ކަމަކީ އެއީ ކަމަށް ވެސް މޭޔަރު ވިދާޅުވިއެވެ. އެކަން ހައްލުކުރުމަށްޓަކައި އެކި ދާއިރާތަކުން ކޮންސަލްޓަންޓުން ހޯދާފައިވާ ކަމަށާއި، އެ އެންމެންނަކީ ވެސް ދާއިމީ މުވައްޒަފުން ކަމަށް މޭޔަރު ވިދާޅުވިއެވެ.
މޭޔަރު ވިދާޅުވީ، އެ މުވައްޒަފުންނަކީ ސްޓްރެޓިޖިކް އެކްޝަން ޕްލޭނުގައި ހިމެނޭ ކަންކަން ތަންފީޒުކުރުމަށް ނަގާފައިވާ މުވައްޒަފުން ކަމަށާއި، އެ މުވައްޒަފުންގެ އެހީތެރިކަމާއެކު ގިނަ ދާއިރާތަކުގެ މަސައްކަތް ހަރުދަނާކުރެވިފައިވާކަމަށެވެ. އޭނާ ވިދާޅުވީ، ކޮންސަލްޓަންޓުން ނަގަނީ އާއްމުކޮށް އަމަލުކުރަމުންދާ އުސޫލާއި އެއްގޮތަށް، އާއްމުކޮށް އިއުލާނުކުރުމަށްފަހު ގަވާއިދާއި އުސޫލުގެ ތެރެއިން ކަމަށެވެ. އެ ކޮންސަލްޓަންޓުންގެ މުސާރައަކީ 15000 ރުފިޔާއާ 35000 ރުފިޔާއާ ދެމެދުގެ އަދަދެއް ކަމަށާއި، އެކި ކޮންސަލްޓަންޓުންނަށް ލިބެނީ އެކި މުސާރަ ކަމަށް މޭޔަރު ވަނީ ވިދާޅުވެފައެވެ.
މޭޔަރު އެފަދައިން ވިދާޅުވެފައިވަނީ ކޮންސަލްޓަންޓުން ނެގުމުގައި އަމަލުކުރާ ގޮތާމެދު ސުވާލު އުފައްދައި، މީސްމީޑިއާއާއި މީޑިއާގައި އެކަމުގެ ކަންބޮޑުވުން ފާޅުކުރަމުންދާ ދަނޑިވަޅެއްގައެވެ. އަދި ކޮންސަލްޓަންޓުންނަށް ޕީޕީއެމްގެ މީހުން އައްޔަން ކުރާ ކަމަށް ބުނެ އެކަމުގެ ފާޑުކިޔުންވެސް ވަނީ އަމާޒުވެފައެވެ.
