ގައުމަށް ރަގަޅު ގޮތަކީ ރައީސް ނަޝީދާއި އަޅުގަނޑާއެކުގައި މަސައްކަތް ކުރުން: ރައީސް މައުމޫން
3 ޖުލައި 2017 | ހޯމަ 17:37މަޖުބޫރުން ކަންކަން ކުރެވިގެން ނުވާނެ
ކުނޫޒް ޖަލްސާގައި މައުމޫން ވަނީ ބައިވެރިވެފައި
ދިވެހި ގައުމަށް މިވަގުތު އެންމެ ރަގަޅު ގޮތަކީ ކުރީގެ ރައީސް މުހައްމަދު ނަޝީދާއެކު މަސައްކަތް ކުރެއްވުން ކަމަށް ކުރީގެ ރައީސުލްޖުމްހޫރިއްޔާ މައުމޫން އަބްދުލްގައްޔޫމް ވިދާޅުވި އެވެ.
މާފަންނު ކުނޫޒްގައި ބޭއްވި ޖަލްސާގައި ވާހަކަދައްވަމުން ރައީސް މައުމޫން ވިދާޅުވީ، ބައެއް ފަރާތްތަކުން އެމްޑީޕީގެ ރައީސް މުހައްމަދު ނަޝީދާއެކު މަސައްކަތް ކުރައްވަނީ ކީއްވެގެންތޯ އެތަށް ބަޔަކު ސުވާލު ކުރަމުންދާ ކަށެވެ. އެ ދެ ބޭފުޅުންނަކީ ކުރިން ސިޔާސީ ދެ ހަތުރުން ކަމަށް ވިޔަސް، 30 އަހަރު ވެރިކަން ކުރެއްވި ރައީސް މައުމޫން ވިދާޅުވީ މިހާރު ފަށައިގެން ކުރަމުންދާ މަސައްކަތަކީ އެއްވެސް ހާލެއްގައި ޒާތީ މަސައްކަތެއް ނޫން ކަމަށާއި މިއީ ގައުމީ މަސައްކަތެއް ކަމަށެވެ.
" އަޅުގަނޑު ަމސައްކަތް ކުރާނީ އުސޫލީ ފެންވަރެއްގައި، ޒާތީފެންވަރެއްގައެއް ނޫން." ރައީސް މައުމޫން ވިދާޅުވި އެވެ.
މައުމޫން ވިދާޅުވީ، ރައީސް ނަޝީދާއި މެދު ގޯސްކޮށް އެމަނިކުފާނަށް ކަންކަން ކުރެވިފައި ހުރެދާނެ ކަމަށާއި ހަމައެގޮތަށް ރައީސް ނަޝީދަށްވެސް އެމަނިކުފާނާ މެދު އެފަދަ ގޮތަކަށް އަމަލުކުރެވިފައި ހުރެދާނެ ކަމަށެވެ.
" އަޅުގަނޑުގެ ފަރާތުންވެސް މުހައްމަދު ނަޝީދަށް އެންމެ އެކަށޭނަ ނޫން ގޮތަކަށް ކަންތައްތައް ކުރެވިފަ އޮވެދާނެ. އެމަނިކުފާނަށްވެސް އަޅުގަނޑާއި ބެހޭ ގޮތުން ކަންތައްތަކެއް ކުރެއްވިފަ އޮވެދާނެ. އެކަމަކު އެކަންތައްތަކަކީ މާޒީވެގެން ގޮސްފައިވާ ކަންކަން. އަޅުގަނޑުމެން މިހާރު ބަލަންވީ ޒާތީ ކުރިއެރުމަކަށް ނޫން. ފަރުދީ ކުރިއެރުމަކަށް ނޫން. އަޅުގަނޑުމެން ބަލަންވީ އަޅުގަނޑުމެންގެ ގައުމަށް،" ރައީސް މައުމޫން ވިދާޅުވި އެވެ.
އެކަންކަމަކީ މާޒީވެގެން ގޮސްފައިވާ ކަންކަން ކަމަށާއި ރައީސް ނަޝީދާއި އެކުގައި ފެށި މި މަސައްކަތަކީ އެއްވެސް ހާލެއްގައި ޒާތީ ކުރިއެރުމަކަށް ކުރައްވާ މަސައްކަތެއް ނޫން ކަމަށެވެ. މި މަސައްކަތަކީ ގައުމަށް ރަގަޅު ގޮތް ހޯދާ ދިނުމަށް ކުރައްވާ މަސައްކަތް ކަމަށް އެ މަނިކުފާނު ވިދާޅުވި އެވެ.
މައުމޫން ވިދާޅުވީ، އިދިކޮޅު ފަރާތްތަކުން ގުޅިގެން މިކުރި މަސައްކަތައް ލިބުނު ކާމިޔާބީ އަކީ އެއްވެސް ހާލެއްގައި ރައީސް ނަޝީދާއި ރައީސް މައުމޫނަށް ލިބުނު ކާމިޔާބީއެއް ނޫން ކަމަށާއި މިއީ މުޅި ގައުމަށް ލިބުނު ކާމިޔާބީއެއް ކަމަށެވެ.
ރައީސް މައުމޫން ވަނީ ޖުމްހޫރީ ޕާޓީގެ ލީޑަރ ގާސިމް އިބްރާހިމާއި އަދާލަތު ޕާޓީގެ ރައީސް ޝެއިހު އިމްރާނު އަބްދުﷲ އިސްވެ ކުރަމުންދާ މަސައްކަތްތައް ފާހަގަކުރައްވާފަ އެވެ.
މަސީހުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައިވާއިރު، ރައީސް މައުމޫނު ވިދާޅުވީ މި މަސައްކަތުގައި ނަސްރު ރައީސް ނަޝީދާއި ގާސިމް ކުރެއްވި މަސައްކަތް ފާހަގަ ކުރެއްވޭ ކަމަށެވެ.
ގާސިމަކީ ވަރަށް ކުރީއްސެރި އިސްލާހީ މަސައްކަތުގައި އުޅުއްވި ބޭފުޅެއް ކަމަށާއި އެކަން އެނގިވަޑައިގަންނަވާ ކަމަށް ރައީސް މައުމޫން ވިދާޅުވި އެވެ. ގާސިމްގެ ވިސްނުންފުޅާއި އިހްލާސްތެރިކަން އެނގިވަޑައިގަންނަވާ ކަމަށާއި ހާއްސަ މަޖިލީހުގެ ރައީސްކަން ވެސް ގާސިމް ކުރެއްވީ ވަރަށް ގާބިލްކަމާއި އިހްލާސްތެރިކަމާއެކު ކަމަށް ވެސް މައުމޫން ވިދާޅުވި އެވެ.
ޝެއިޚް އިމްރާނަކީ ވަރަށް ގާތް ރަހްމަތްތެރި ބޭފުޅެއް ކަމަށާއި ވަރަށް އެކުގައި ވާހަކަ ދައްކަވައި، ހިޔާލު ބަދަލު ކުރައްވާ ބޭފުޅެއް ކަމަށް ވެސް ރައީސް މައުމޫން ފާހަގަކުރެއްވެވި އެވެ.
"ވަރަށް އިހްލާސްތެރި ހިތްވަރު ގަދަ ބޭފުޅެއް. ޖަލުގެ ކުޑަ ގޮޅީގައި އޮންނެވި ނަމަވެސް އަޒުމަކަށް ބަދަލެއް ނާންނަ ކަމަށް މިރޭ ވެސް އެނގިގެން ދިޔަ،" ކީރިތި ކުރައްވަމުން ރައީސް މައުމޫން ވިދާޅުވި އެވެ.
""އިމްރާނަކީ ވަރަށް ގާތް ބޭފުޅެއް. ވަރަށް ގިނަ ދުވަހުއްސުރެ ވާހަކަދައްކާ ހިޔާލު ބަދަލުކޮށްހަދާ ދެމީހުން އަޅުގަނޑުމެން ދެމީހުންނަކީ. އަދި އެމަނިކުފާނަކީ ދީނީ އިލްމުވެރިއެއް. ވަރަށް އިހްލާސްތެރި ބޭފުޅެއް. ގައުމަށް ވަފާތެރިވޭފުޅެއް. ހިތްވަރުގަދަ ބޭފުޅެއް. އަޅުގަނޑުމެން މިތާންގާ މިހާރު މިތިބީ މިނިވަންކަމާއެކީގައި. އެހެނެއްނޫން އިމްރާނު މިއަދު އޮތީ. އެހެން ނަމަވެސް އެމަނިކުފާނުގެ ހިތްވަރުފުޅަކަށް ބަދަލެއް ނާދޭ."
