ކުޅުންތެރިންނަށް ނިޒާރުގެ އިލްތިމާސްއެއް!

ފޯ ނޭޝަންސް ކަޕް ވޮލީބޯޅަ މުބާރާތަށްފަހު, މިއަހަރު ކުރިއަށް ދެންހުރި މުބާރާތްތަކާ ދެމެދަށް ޤައުމީ އަންހެން ވޮލީބޯޅަ ޓީމްގެ ކޯޗު ނިޒާރު އިބްރާހީމް ކުޅުންތެރިންނަށް ޚާއްޞަ އިލްތިމާސްއެއް ކޮށްފިއެވެ.

ކޯޗު ނިޒާރުގެ އިލްތިމާސްއަކީ މުބާރާތްތަކަށް ޓީމް އެކުލަވާލާއިރު ފިޓްކޮށް ތިބުމަށް ކޮންމެ ކުޅުންތެރިއަކުވެސް މަސައްކަތްކުރުމެވެ. ނިޒާރު ބުނީ މުބާރާތްތައް މެދުކެނޑުމަށްފަހު, ނޫނީ ޕްރެކްޓިސްތައް މެދުކެނޑުމަށްފަހު ކޮންމެ ކުޅުންތެރިއަކުވެސް އަމިއްލަ މަސައްކަތެއް ކޮށްލަންޖެހޭކަމަށެވެ. އެމަސައްކަތަކީ ކޮންމެ ކުޅުންތެރިއަކުވެސް އެކުޅުންތެރިއެއްގެ ފިޓްނަސް ހިފަހައްޓަން އަމިއްލައަށް މަސައްކަތްކުރުންކަމަށް ރާއްޖޭގައި އުފެދުނު އެންމެ ކާމިޔާބު އަދި އެންމެ މޮޅު އެއް ކުޅުންތެރިޔާ ބުންޏެވެ. ޚާއްޞަކޮށް އަންހެން ކުޅުންތެރިން އެމަސައްކަތަށް ބޮޑު ސަމާލުކަމެއްދޭން ޖެހޭކަން ނިޒާރު ފާހަގަކުރިއެވެ. ނިޒާރު ބުނީ އަމިއްލައަށް އެކްސަސައިޒްތައް ކުރުމާއި, ފިޒިކަލް ހިފެހެއްޓުމަކީ ކުޅުންތެރިން ކުރަންޖެހޭ ކަމެއްކަމަށެވެ. ހަމައެކަނި މުބާރާތަކަށް ތައްޔާރުވާން އެލިބޭ ދެމަސްދުވަސް ނޫނީ ތިންމަސްދުވަހަކުން ހަންޑްރެޑް ޕަސަންޓް ފިޓް ނުކުރެވޭނެ ކަމަށާއި, އެހެންވީމާ ކުރިއާލާ ކުޅުންތެރިން ތައްޔާރުވާންޖެހޭކަމަށް އޭނާ ބުންޏެވެ.

ފޯނޭޝަންސް ކަޕްގައި ރާއްޖޭގެ އަންހެން ޓީމް ފައިނަލްގައި މެލޭޝިޔާ އަތުން ބަލިވީ ފަސް ސެޓް ކުޅެގެންނެވެ. އިންވިޓޭޝަނަލް އިތުރު މުބާރާތެއް މިއަހަރު ޖޫން/ޖުލައިގައި ބާއްވާނެކަމުގެ ސިގްނަލް ވޮލީބޯޅަ އެސޯސިއޭޝަނުން ވަނީ ދީފައެވެ. އަދި އިންޑިޔަން އޯޝަން އައިލެންޑް ގޭމްސްއާއި އޭޝިޔަން ގޭމްސްވެސް މިއަހަރު އޮންނާނެއެވެ.