މޮޅު މިވީ މަހެއް ތެރޭގައި ކުޅުނު 8 ވަނަ މެޗުން، ކުޅުންތެރިންނަށް ޝުކުރިއްޔާ: ސެކުލޮވްސްކީ

އޭއެފްސީ ކަޕްގައި އަބަހާނީ ލިމިޓެޑް އަތުން ހޯދި މޮޅާއެކު މަހެއް ތެރޭގައި ކުޅުނު 8 މެޗުން މޮޅުވެފައިވާ ކަމަށާއި، ހުރިހާ ޝުކުރެއްވެސް ހައްގުވަނީ ކުޅުންތެރިންނަށް ކަމަށް މާޔަން ސެކުލޮވްސްކީ ބުނެފި އެވެ.

މެޗަށްފަހު ނުސްވެރިންނަށް މައުލޫމާތު ދެމުން ސެކުލޮވްސްކީ ބުނީ މަހެއް ތެރޭގައި މާޒިޔާ 8 މެޗު ކުޅެފައިވާ ކަމަށާއި، އެ ހުރިހާ މެޗުންވެސް މާޒިޔާ އަށް މޮޅު ވެވުނީ ކުޅުންތެރިންގެ ބުރަ މަސައްކަތުން ކަމަށެވެ.

އެގޮތުން ސެކުލޮވްސްކީ ބުނީ ކައިރި ކައިރީގައި މެޗުތައް ކުޅުމަކީ އެއްވެސް އިރެއްގައި ފަސޭހަކަމެއްކަމަށް ނުދެކޭ ކަމަށާއި، ބޮޑެތި ގޮންޖެހުންތައް އޭގެ ސަބަބުން ދިމާވާ ކަމަށެވެ. މީގެއިތުރުން އޭނާ ބުނީ ޕްރޮފެޝަނަލް ފުޓުބޯޅަ ދަންނަ މީހުންނަށް މިއީ ކިހާވަރެއްގެ ކަމެއްކަން އެގޭނެ ކަމަށެވެ.

އެހެންނަމަވެސް ސެކުލޮވްސްކީ ބުނީ އަބަހާނީ މެޗަށްފަހު ރާއްޖޭ ގައުމީ ޓީމުގެ ފަސް ކުޅުންތެރިޔަކަށް އަނިޔާވެފައިވާ ކަމަށާއި، ފަސް ދުވަސް ތެރޭގައި އަނެއްކާވެސް މާލޭ ލީގުގައި މާޒިޔާ ކުޅެންޖެހޭ ކަމަށެވެ.

މީގެއިތުރުން އޭނާ ބުނީ ދެ ހަފްތާ ތެރޭގައި މާޒިޔާ ނިކުންނާނީ ރާއްޖޭގެ ތާރީހުގައިވެސް ކުޅޭ އެންމެ މުހިންމު އެއް މެޗު ކަމަށާއި، އެ މެޗުން ދެވަނަ ބުރަށް މާޒިޔާ އަށް ދެވޭނެކަން ކަށަވަރުވެގެންދާނެ ކަމަށެވެ.

އޭއެފްސީ ކަޕްގައި މާޒިޔާ ކުޅުނު ފަސް މެޗުގެ ތެރެއިން ހަތަރު މެޗުން އެޓީމު މޮޅުވެފައިވާއިރު، އެއް މެޗުން އެޓީމު ވަނީ ބަލިވެފައެވެ. އެޓީމު ބަލިވެފައިވަނީ ބެންގަލޫރު އެފްސީއާ ދެކޮޅަށް ކުޅުނު މެޗުންނެވެ.