ކުލި އަގުބޮޑުކަމުން މި ޒުވާނާގެ ދިރިއުޅުން ބަދަލު ކުރީ ކުނިގޮނޑަށް!

ކުލީގެ އަގު ބޮޑުވުމުގެ މައްސަލައަކީ ދުނިޔޭގެ ނިސްބަތުން ބަލާއިރު އެންމެ ކުރިއަރާފައި ވާ ޤައުމުތަކުގައިވެސް އިންތިހާއަށް ބޮޑުވެފައި ވާ މައްސަލައެކެވެ. ދިރިއުޅުމުގެ ޛަރޫރީ ޚަރަދުތައް ދެކޮޅު ޖެއްސޭނެ ފަދަ ތަނަވަސްކަމަކާ އެއްވަރުގެ އާމްދަނީއެއް ނުލިބުމާއި، ބާޒާރުތަކުގައި ތަކެތީގެ އަގުތައް އިންތިހާއަށް އުފުލެމުން ދިއުން ފަދަ އެތައް ސަބަބަކާ ހެދި، އުފުލެމުން ދާ ކުލީގެ އަގުތަކަށް އެދެވޭ ހައްލެއް ހޯދުމަށް، އިނގިރޭސިވިލާތް ފަދަ ޤައުމުތަކުގެ ކަމާ ބެހޭ ފަރާތްތައް ވަނީ ނުކުޅެދިފައެވެ. އިނގިރޭސިވިލާތުގައި ކުލީގެ އަގުތައް ބޮޑުވާ މައްސަލައަށް ހައްލު ނުލިބުމުގެ ސަބަބުން، އެކަމާ ދެކޮޅަށް އާދަޔާ ޚިލާފު އިހުތިޖާޖެއް ކުރަމުންދާ އެކަކީ ޒުވާން ފަންނުވެރިއެއް ކަމަށް ވާ، ޢުމުރުން 28 އަހަރުގެ ހެރިސަން މަރޝަލްއެވެ.

ކުލީގެ އަގު ބޮޑުވުމުގެ މައްސަލައަށް ހައްލެއް ނުހޯދިގެން އުޅޭ އުޅުމާ ދެކޮޅަށް އިހުތިޖާޖު ކުރުމުގެ ގޮތުން، މަރޝަލް، އޭނާގެ ދިރިއުޅުން ބަދަލު ކުރީ ލަންޑަންގައި ކުނި ޖަމާ ކުރާ ސަރަޙައްދަކަށެވެ. އެތަނުގައި އަހަރެއްވަންދެން ދިރިއުޅުމަށް އޭނާ ގަސްތު ކުރެއެވެ. ކުނި ޖަމާ ކުރާ ސަރަޙައްދުގައި ހާއްސަ ގެއެއް އަޅާ، އެތަނަށް އޭނާގެ ދިރިއުޅުން ބަދަލު ކުރީ މީގެ މަހެއްހާ ދުވަސް ކުރިންނެވެ. މަރޝަލް ބުނާ ގޮތުގައި، މިއީ އޭނާ މަސައްކަތް ކުރާ ސަރަޙައްދުގެ ގޮތުން، ދެކޮޅު ޖެހޭ ދިރިއުޅުމެއް އުޅެވެން އޮތް ހަމައެކަނި ގޮތްވެސްމެއެވެ.

ލަންޑަންއަކީވެސް ގެދޮރުގެ ދަތިކަން ކުރިމަތިވެފައިވާ ރަށަކަށް ވާ އިރު، ބޭރުގައި ދުވަސްތަކެއް ހޭދަ ކުރުމަށް ފަހު އެނބުރި އައިސް، އަތްފޯރާ އަގެއްގައި ބޯހިޔާވަހިކަން ހޯދުމަކީ މަރޝަލްއަށް ކާމިޔާބު ނުލިބުނު ހަނގުރާމައެކެވެ. އަތްފޯރާ އަގުގައި ތަނެއް ފެންނަ އިރު، އެތަނަކަށް ދިރިއުޅުން ބަދަލު ކުރުމުގެ ހަނގުރާމައަށް ތައްޔާރުވެގެން ތިބޭ މީހުންގެ ޢަދަދު އެހާ ގިނައެވެ.

ކުނި އުކާލަން ހާއްސަކޮށްފައިވާ ސަރަޙައްދުގައި މަރޝަލް ދިރިއުޅެމުންދާ ގެ އެޅުމަށް އޭނާ ވަނީ 4000 ޕައުންޑް ނުވަތަ 4808 ޑޮލަރު ޚަރަދު ކޮށްފައެވެ. މި ގެ އަޅާފައި ވަނީ ރީނދޫ ކުލައިގެ ކޮންޓޭނަރެއްގެ ތެރޭގައި ކަމަށް ވާ އިރު، މި ސާމަނަކީ އިމާރާތް ކުރާ ފަރާތްތަކުން ކުނީގެ ގޮތުގައި އުކާލާ ސާމާނެވެ.

ގެ އަޅާފައި ހުރި ބިމަކީ، ފަންނުވެރިކަމުގެ ދާއިރާއަށް ހިލޭ ސާބަހަށް ޚިދުމަތް ކުރާ ޖަމިއްޔާއަކުން މަރޝަލްއަށް ހޯދާދިން ބިންކޮޅެކެވެ.

ޖީބަށް ލުއިވިއެއްކަމަކު، މި ގޭގައި ދިރިއުޅުމަކީ މާ ފަސޭހަ ކަމެއްވެސް ނޫނެވެ. މަރޝަލްއަށް ފެންވަރަން ޖެހެނީ އޭނާގެ އޮފީހުގައެވެ. ނޫނީ ޖިމްގައެވެ.

ގޭގައި ބޭނުން ކުރާ ފެން ހޯދަނީ އަވަށްޓެރިންގެ އެހީތެރިކަމާ އެކީގައެވެ. ފަސޭހަ ކަމަކީ، ގެއާއި އޮފީސް ހުންނަ ކައިރި ކަމެވެ. ބައިސްކަލެއްގައި ދުއްވާފައި، 10 ވަރަކަށް މިނެޓުން އެ ދަތުރު ކުރެވެއެވެ.

މި ދުވަސްވަރަކީ އިނގިރޭސިވިލާތުގެ ބާޒާރުތަކުގައި ތަކެތީގެ އަގު އިންތިހާއަށް އުފުލިފައިވާ ދުވަސްވަރެކެވެ. ފާއިތުވީ 41 އަހަރުދުވަހުގެ ތެރޭގައި ނުދާ މިންވަރަށް، އިނގިރޭސިވިލާތުގެ ކޮންޒިއުމަރ ޕްރައިސް އިންޑެކްސް (ސީޕީއައި) އުފުލުނީ މިދިޔަ އޮކްޓޯބަރު މަހުއެވެ. އެ މަހު، ސީޕީއައި ވަނީ 11.1 ޕަސެންޓަށް އަރާފައެވެ. އޭގެ ފަހުން 10 އަކަށް ވުރެ އެ ޢަދަދު ދަށަކަށް ނުދެއެވެ. ނަމަވެސް އުފުލެމުންދާ ކާބޯތަކެއްޗާއި އެނޫންވެސް ދިރިއުޅުމުގެ ބިލްތަކުގެ އަގުތަކާ އެއްވަރަށް، މުސާރައެއް ބޮޑެއް ނުވެއެވެ.