ސްޓާމަރ އާއި މޯދީ 6 ބިލިއަން ޕައުންޑުގެ އިންޑިއާ-ޔޫކޭ ވިޔަފާރީގެ އެއްބަސްވުމެއްގައި ސޮއި ކުރައްވައިފި
އިޤްތިޞާދީ ގޮތުން ކުރިއެރުމަށް މަގުފަހިކުރާ، އިންޑިއާ-ޔޫކޭ މިނިވަން ވިޔަފާރީގެ އެއްބަސްވުމުގައި ދެ ޤައުމުގެ ބޮޑުވަޒީރުން ސޮއިކުރައްވައިފި. މި އެއްބަސްވުމުގެ ސަބަބުން އިންޑިއާގެ އެކްސްޕޯޓުތައް އަގުހެޔޮވެ، ޔޫކޭގެ އިޤްތިޞާދަށް އަހަރަކު 4.8 ބިލިއަން ޕައުންޑުގެ ކުރިއެރުމެއް ލިބޭނެކަމަށް ލަފާކުރެވޭ.
އިނގިރޭސިވިލާތުގެ ބޮޑުވަޒީރު ކީރ ސްޓާމަރ އާއި އިންޑިއާގެ ބޮޑުވަޒީރު ނަރެންދުރަ މޯދީ ދެ ގައުމުގެ ދެމެދުގައި މިނިވަން ވިޔަފާރީގެ އެއްބަސްވުމެއްގައި ސޮއިކުރެއްވުމަށް ފަހު ސަލާން ކުރައްވަނީ - ޖުލައި 24، 2025
އިންޑިއާގެ ބޮޑުވަޒީރު ނަރެންދުރަ މޯދީ އާއި އިނގިރޭސި ވިލާތުގެ ބޮޑުވަޒީރު ސަރ ކީރ ސްޓާމަރ އެތައް ބިލިއަން ޕައުންޑުގެ މިނިވަން ވިޔަފާރީގެ އެއްބަސްވުމެއްގައި ސޮއި ކުރައްވައިފި އެވެ.
މި އެއްބަސްވުމުގެ ދަށުން އިނގިރޭސި ވިލާތުގައި އުފައްދާ ކާރު ފަދަ ބާވަތްތަކުގެ އެކްސްޕޯޓު އަގުހެޔޮވެ، އަދި އިންޑިއާގެ ފޮއްޗާއި ޖަވާހިރު ފަދަ ބާވަތްތައް ޔޫކޭ އަށް އެކްސްޕޯޓު ކުރުން އަގުހެޔޮވާނެއެވެ.
މި އެއްބަސްވުމަށް ވާސިލުވުމަށް 3 އަހަރުގެ މުއްދަތެއް ހޭދަވެފައި ވެއެވެ.
މީގެ އިތުރުން ގާނޫނާ ޚިލާފަށް ހިޖުރަ ކުރާ މީހުންނާ މެދު އަމަލު ކުރާނެ ގޮތުގެ އިންޑިއާ-ޔޫކޭ އާ ޕްލޭނެއް ގައި ވެސް ދެ ގައުމުން ސޮއި ކުރެވުނެވެ.
އިނގިރޭސި ވިލާތުގެ ބޮޑުވަޒީރުގެ ގެކޮޅު ޗެކާޒް ގައި ބޭއްވުނު ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ސަރ ކީރ ވިދާޅުވީ ޔޫކޭ-އިންޑިއާ އެއްބަސްވުމަކީ ބްރެކްސިޓަށް ފަހު އިނގިރޭސިވިލާތުން ހަދާފައިވާ "އެންމެ ބޮޑު އަދި އިޤްތިޞާދީ ގޮތުން އެންމެ މުހިންމު" ވިޔަފާރީގެ އެއްބަސްވުން ކަމަށެވެ.
"ޔޫކޭ އިން މިފަދަ އެއްބަސްވުމަކަށް އައުމަށް ގިނަ އަހަރުތަކެއް ވަންދެން މަސައްކަތް ކުރަމުން އައީ، ނަމަވެސް މި ސަރުކާރުން މިކަން މި ފުރިހަމަ ކުރީ، އަދި މިއާއެކު، އަޅުގަނޑުމެން ވަރަށް ވަރުގަދަ މެސެޖެއް މި ފޮނުވަނީ އިނގިރޭސި ވިލާތަކީ ވިޔަފާރި އަށް ހުޅުވިފައިވާ ޤައުމެއް ކަމަށް، އަދި މިހާރުވެސް މިކަމުން ވަރަށް ބޮޑު އިތުބާރެއް އުފެދެމުންދޭ."
އިންޑިއާގެ ކުންފުނިތަކުން ޔޫކޭގައި އެ ކުންފުނިތަކުގެ މަސައްކަތްތައް ފުޅާކުރުމާއި، ބްރިޓިޝް ކުންފުނި ތަކަށް އިންޑިއާ ގައި އައު ވިޔަފާރީގެ ފުރުޞަތުތައް ލިބުމާ ގުޅިގެން މި އެއްބަސްވުމުން 2,200 އަށްވުރެ ގިނަ ބްރިޓިޝް ވަޒީފާތައް ޤައުމުގެ އެކި ކަންކޮޅުތަކުގައި އުފެދޭނެ ކަމަށް ސަރ ކީރ ވިދާޅުވިއެވެ.
އަދި ސަރ ކީރ ވިދާޅުވީ އިންޑިއާ އަކީ އިނގިރޭސިވިލާތާއި "ތާރީޚާއި، އާއިލީ ގުޅުންތަކާއި، ސަގާފަތުގެ ޚާއްޞަ ގުޅުންތަކެއް" އޮތް ޤައުމެއް ކަމަށާއި، އެ ގުޅުން އިތުރަށް ބަދަހިކުރައްވަން ބޭނުންވާ ކަމަށެވެ.
މޯދީ މި އެއްބަސްވުމަށް ވިދާޅުވީ "ދެ ގައުމުގެ މުއްސަނދިކަން ހިއްސާކުރުމުގެ ބްލޫޕްރިންޓެއް" ކަމަށެވެ.
"އެއްކޮޅުން، އިންޑިއާގެ ފޮތި، ފައިވާން، ޖަވާހިރު، ސީފުޑް، އިންޖިނިއަރިންގ އުފެއްދުންތަކަށް ޔޫކޭގެ މާކެޓަށް ވަނުމުގެ ފުރުޞަތު ރަނގަޅުވެގެންދާނެ...
"އަނެއްކޮޅުން، އިންޑިއާގެ ރައްޔިތުންނަށާއި ޞިނާޢަތްތަކަށް ޔޫކޭ ގައި އުފައްދާ ތަކެތި، މިސާލަކަށް މެޑިކަލް ޑިވައިސްތަކާއި އެއަރޯސްޕޭސް ބައިތައް، އަތްފޯރާފަށުގައި އަދި ގަބޫލުކުރެވޭ އަގުތަކެއްގައި ލިބޭނެ."
އިނގިރޭސި ސަރުކާރުން ބުނާ ގޮތުގައި މޭ މަހު އިޢުލާނު ކުރެވުނު މި އެއްބަސްވުމުން - އެތައް އަހަރެއްގެ މަޝްވަރާތަކަކަށް ފަހު - އަހަރަކު 4.8 ބިލިއަން ޕައުންޑުން އިނގިރޭސިވިލާތުގެ އިޤްތިޞާދު ކުރިއަރާނެއެވެ.
މި އެއްބަސްވުމަށް އިންޑިއާގެ ކެބިނެޓުން މި ހަފްތާގެ ކުރީކޮޅު ހުއްދަ ދީފައިވީ ނަމަވެސް، އަދި އިނގިރޭސި ވިލާތުގެ ޕާލިމެންޓުން ފާސްކޮށްފައެއް ނުވެއެވެ. އަދި މި އެއްބަސްވުން ޢަމަލީ ސިފަ ގެންނަން މަދުވެގެން އަހަރެއްވަރު ނަގާނެ ކަމަށް ލަފާކުރެވެއެވެ.
އިނގިރޭސި ވިލާތުން މިހާރުވެސް އިންޑިއާ އިން 11 ބިލިއަން ޕައުންޑުގެ މުދާ އިމްޕޯޓުކުރެއެވެ. ނަމަވެސް އެއްބަސްވެވުނު ދަށް ޓެރިފްތަކުގެ ސަބަބުން އިންޑިއާގެ އެކްސްޕޯޓުތައް އަގުހެޔޮ ވެގެން ދާނެއެވެ.
އަދި އިންޑިއާގެ މެނުފެކްޗަރަރުންނަށް އިނގިރޭސި މާކެޓަށް އިލެކްޓްރިކް އަދި ހައިބްރިޑް ވެހިކަލްތައް ތައާރުފް ކުރުމުގެ ފުރުޞަތު ލިބޭނެ ކަމަށް ވެސް ބެލެވެއެވެ.
