ސްކޫލްތަކުގެ ދަރިވަރުންނަށް ހެލްތު ސްކްރީނިންގ ޕްރޮގްރާމްތައް ކުރިއަށް ގެންދަނީ
7 މާރިޗު 2023 | އަންގާރަ 03:01މި ހަރަކާތުގައި އައި.ޖީ.އެމް.އެޗްގެ ކުޑަކުދިންގެ ބަލިތަކާއި ބެހޭ ޑިޕާޓްމެންޓްގެ ޑޮކްޓަރުންނާއި، މެޑިކަލް އޮފިސަރުން އަދި އިންޓަރންސް އިން ބައިވެރިވޭ
ސްކޫލް ދަރިވަރުން ސްކްރީން ކުރުމުގެ ޕްރޮގްރާމުގެ ތެރެއިން ކަލާފާނު ސްކޫލް ދަަރިވަރުން ސްކްރީން ކުރަނީ
އައި.ޖީ.އެމް ހޮސްޕިޓަލާއި މިނިސްޓްރީ އޮފް އެޑިއުކޭޝަން ގުޅިގެން މާލެ ސިޓީ ސަރަހައްދުގެ ސްކޫލްތަކުގެ ޕްރައިމަރީގެ ގްރޭޑްތަކުގެ ދަރިވަރުންނަށް ޙާއްސަކޮށްގެން ހެލްތު ސްކްރީނިންގ ޕްރޮގްރާމްތަކެއް ފަށައިފިއެވެ.
މި ހަރަކާތުގައި އައި.ޖީ.އެމް.އެޗްގެ ކުޑަކުދިންގެ ބަލިތަކާއި ބެހޭ ޑިޕާޓްމެންޓްގެ ޑޮކްޓަރުންނާއި، މެޑިކަލް އޮފިސަރުން އަދި އިންޓަރންސް އިން ބައިވެރިވެއެވެ.
އަައި.ޖީ.އެމް.އެޗްގެ މެޑިކަލް އެޑްމިނިސްޓްރޭޝަން ޑިޕާޓްމެންޓްގެ އިސްނެގުމުގެ މަތިން މި ހަރަކާތް ފެށިފައިވަނީ މިދިޔަ މަހުގައެވެ. އިމާދުއްދީން ސްކޫލްގައި ކުރިއަށް ގެންދިޔަ މި ހަރަކާތުގައި ގްރޭޑް 1 އިން 98 ދަރިވަރުން، ގްރޭޑް 4 އިން 95 ދަރިވަރުން އަދި ގްރޭޑް 7 އިން 34 ދަރިވަރުން ވަނީ މި ސްކްރީނިންގ ފުރިހަމަކޮށްފައެވެ.
މި ޕްރޮގްރާމް ހެޑްކުރައްވާ، އަައި.ޖީ.އެމް.އެޗްގެ ކުޑަކުދިންގެ ބަލިތަކާއި ބެހޭ ޑިޕާޓްމެންޓްގެ އިސް ޑޮކްޓަރ، ޑރ. އަޙުމަދު ފައިސަލް ވިދާޅުވި ގޮތުގައި މި ސްކްރީނިންގ ގެ މައިގަނޑު އަމާޒަކީ ކުޑަކުދިންގެ މެދުގައި އާންމުކޮށް ފެތުރޭ ސިއްޙީ މައްސަލަތައް ދެނެގަނެ، ދުޅަހެޔޮ މުޖުތަމައުއެއް ބިނާކުރުމަށް އަޅަންޖެހޭ ފިޔަވަޅުތައް ދުރާލާ އެޅުމެވެ.
މިހާރުވެސް ހެލްތް ސްކްރީނިންގ ޕްރޮގްރާމް ކަލާފާނު ސުކޫލުގައި ދަނީ ކުރިޔަށް ދަމުންނެވެ. އަދި މީގެ އިތުރުން އަދިވެސް މާލެ ސިޓީ ސަރަހައްދުގެ ގިނަ ސްކޫލްތަކުގައި މިހަރަކާތް ކުރިއަށްގެންދިޔުމަށްވަނީ ހަމަޖެހިފައިއެވެ.
