ރޯގާ ކޮންޓްރޯލް ކުރެވެންދެން ސްކޫލްތަކުގެ ކިޔެވުން މެދުކަނޑާލުމަށް އެމްޑީޕީން ގޮވާލައިފި
ބެލެނިވެރީން އެޑިޔުކޭޝަން މިނިސްޓްރީގެ ނިންމުމަށް ފާޅުކަންބޮޑު ގޮތެއްގައި ނޫނެކޭ ބުނެފި
ރޯގާގެ ހާލަތު އަދިވެސް އޮތީ ލެވެލް 3 ގައި
ރޯގާ ކޮންޓްރޯލް ކުރެވެން ދެން ސްކޫލްތަކުގެ ކިޔެވުން މެދުކަނޑާލުމަށް އެމްޑީޕީން ގޮވާލައިފިއެވެ.
ރޯގާ ކޮންޓްރޯލް ކުރެވެންދެން ސްކޫލްތަކުގެ ކިޔެވުން މެދުކަނޑާލުމަށް އެމްޑީޕީން ގޮވާލައިފިއެވެ. އެމްޑީޕީން އާދިއްތަ ދުވަހު ނެރެފައިވާ ބަޔާނެއްގައި ބުނެފައިވަނީ، ރާއްޖޭގައި މިހާރުފެތުރެމުންދާ އެޗްވަންއެންވަން ހުމުގެ ރޯގާގެ ސަބަބުން ސްކޫލްތައް ކުއްލިގޮތަކަށް ބަންދުކުރަން ޖެހުނީ ރޯގާ ކޮންޓްރޯލް ނުވެ ކަމުގެ ނުރައްކަލުގެ މިންގަޑު ލެވެލް 3 އަށް އެރުމުންކަމަށެވެ.
ނަމަވެސް އަދިވެސް ފްލޫ ކޮމިޓީން މި ދަރަޖަ ދަށްކޮށްފައިނުވާއިރު، އަދި ބަލިޖެހޭ މީހުންނާއި ސީރިޔަސްވެ ވަކިވެގެން ދާ ފުރާނަތަކުގެ ޢަދަދު އިތުރުމަވުން ދާ ޙާލަތެއްގައި، ދަރިވަރުންނާއި މުދައްރިސުންނާއި ސްކޫލްތަކުގައި މަސައްކަތް ކުރާ އެހެނިހެން މުވައްޒަފުން ބޮޑު ނުރައްކަލަކަށް ހުށަހަޅައި ސްކޫލުތަކުގެ ކިޔެވުން މިއަދު ފެށުމުން ބެލެނިވެރީން މިވަނީ އެޑިޔުކޭޝަން މިނިސްޓްރީގެ މި ނިންމުމަށް ވަރަށް ފާޅުކަންބޮޑު ގޮތެއްގައި ނޫނެކޭބުނެފައިކަމަށް އެމްޑީޕީން ބުންޏެވެ.
ސްކޫލްތައް ހުޅުވިކަމުގައިވިޔަސް، ސްކޫލްތަކުގެ ޙާޟިރީ އެތައް ގުނަޔަކަށް ދަށްވުމުގެ ސަބަބުން ކިޔަވައި ނުދެވުނު ވާހަކަޔަކީވެސް މީޑިޔާއިން ޢާއްމުވެފައިވާ ވާއިރު، ރައްޔިތުންގެ އިޙުސާސްތަކަށް އިޙްތިރާމްކޮށް، ދަރިވަރުންނާއި މުދައްރިސުންނާއި ސްކޫލްތަކުގައި މަސައްކަތްކުރާ އެހެނިހެން މުވައްޒަފުންގެ ރައްކާތެރިކަމަށް ރިޢާޔަތްކޮށް، މި ރޯގާ ކޮންޓްރޯލް ކުރެވެންދެން ސްކޫލްތަކުގެ ކިޔެވުން މެދުކަނޑާލުމަށް ސަރުކާރަށް ގޮވާލާކަމަށް އެމްޑީޕީގެ ބަޔާނުގައިވެއެވެ.
މިފަދަ ސީރިޔަސް ދަނޑިވަޅެއްގައި ސްކޫލްތަކުގެ ކިޔެވުން މެދުކަނޑާލި ކަމުގައި ވިޔަސް ގެއްލިގެންދާ ފިލާވަޅުތައް އުނގަންނައިދެވޭނެ އެހެނިހެން އިންތިޒާމުތައް ހަމަޖެއްސޭނެ ވަޞީލަތާއި ވަގުތު އޮތްކަމަށް ދެކޭކަމަށް އެމްޑީޕީން ބުނެއެވެ.
