ރާއްޖެ ބަނގުރޫޓް ވެއްޖެކަމަށް އިއުލާންކުރާނީ ރާއްޖެ ބަނގުރޫޓު ވީމާ - އަމީރު
6 މާރިޗު 2023 | ހޯމަ 09:38ސަރުކާރުތަކުން ނަގާފައި ހުރި ލޯނުތައް ދަނީ ސަރވިސް ކުރަމުން
ފިނޭންސް މިނިސްޓަރު އިބްރާހިމް އަމީރު
ރާއްޖެ ބަނގުރޫޓްވެއްޖެކަމަށް އިއުލާންކުރާނީ ރާއްޖެ ބަނގުރޫޓު ވުމުން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރ އަމިރު މިހެން ވިދާޅުވީ، ރާއްޖެ ބަނގުރޫޓު ވެއްޖެކަމަށް އެމްޑީޕީގެ ބައެއް މެންބަރުންނާއި، އިދިކޮޅު ފަރާތްތަކުން ދައްކަމުން ގެންދާ ވާހަކަތަކާއި ގުޅިގެން، އިހަވަންދޫ ދާއިރާގެ މެންބަރު އިބްރާހިމް ޝިފާއު ކުރެއްވި ސުވާލަށް ޖަވާބު ދެއްވަމުންނެވެ.
މެންބަރު ޝިފާއު ވިދާޅުވީ މަޖިލީހުގެ މެންބަރުންގެ ތެރޭގައި ވެސް ވަރަށް ހޫނުގަދަކޮށްދާ ބަހުސަކީ ރާއްޖެ ބަނގުރޫޓްވެފައިވާ ވާހަކަ އިއުލާންކުރުން ކަމަށެވެ. ރާއްޖެ ބަނގުރޫޓުވެފައިވާކަން މިހާލަތުގައި އިއުލާންކުރުމަކީ ކިހާ ނުރައްކާތެރި ކަމަކަށްވެދާނެތޯ އަދި އެކަމާއި ގުޅިގެން ނުކުންނާނެ އާންމު ނަތީޖާއަކީ ކޮބައިތޯ މެންބަރު ސުވާލު ކުރެއްވިއެވެ.
މެންބަރުގެ ސުވާލުގެ ޖަވާބުގައި މިނިސްޓަރ ވިދާޅުވީ ރާއްޖެ ބަނގުރޫޓު ވެއްޖެކަން އިއުލާން ކުރާނީ އެކަން ވުމުން ކަމަށެވެ. 2023 ގެ ބަޖެޓް ޕްލޭނާ އެއްގޮތަށް ބަޖެޓް އިމްޕްލިމެންޓް ކުރެވޭނެކަމުގެ ޔަގީންކަން އެބައޮތް ކަމަށް މިނިސްޓަރ ވިދާޅުވިއެވެ.
މީގެ ކުރިންވެސް މަޖިލީހުގައި މިނިސްޓަރ އަމީރު ވަނީ މިކަމާއި ގުޅޭގޮތުން ވާހަކަ ދައްކަވާފައެވެ. މިނިސްޓަރ ވިދާޅުވެފައިވަނީ އެއްވެސް އިރެއްގައި ރާއްޖެ ބަނގުރޫޓުވި ވާހަކައެއް ފާހަގަ ނުކުރައްވާ ކަމަށެވެ. ރާއްޖެއަކީ މިހާރުވެސް އެންމެ ދަތި ހާލަތުގައި ވެސް 2020 ވަނަ އަހަރު ކޮވިޑާއި އެއްކޮށް ވެސް ދިވެހި ދައުލަތުން ދަރަނި ބަރާބަރަށް އަދާކުރަމުންދާ ގައުމެއް ކަމަށެވެ.
ޑެބްޓް ސަރވިސް ބަރާބަރަށް އަދާކުރަމުންދާ ކަމަށާއި، އެހެންކަމުން ކުރިއަށް އޮތްތަނުގައި ވެސް ރާއްޖެއިން ނަގާފައި ހުރި ލޯނި ޑެބްޓް ސަރވިސް ކުރަމުން ގެންދެވޭނެ ކަމުގެ ޔަގީންކަން އެބަ އޮތް ކަމަށެވެ.
