ކޮންމެ ކާމިޔާބީއެއްގައި ވެސް ތިބެންވާނީ ހަމަބިމުގައި ކަމަށް ލިވަޕޫލްގެ ފޯވަޑް މުހައްމަދު ސަލާހް ބުނެފި އެވެ.
އޭނާ މިހެން ބުނީ ޕްރެމިއާ ލީގުގައި ރޭ ވާދަވެރި މެންޗެސްޓާ ޔުނައިޓެޑް އަތުން 7-0އިން މޮޅުވި މެޗަށް ފަހު އެވެ. މި މެޗުގައި ޖެހި ދެ ގޯލާއެކު ސަލާހް ވެފައިވަނީ ޕްރެމިއާ ލީގުގައި ލިވަޕޫލަށް އެންމެ ގިނަ ގޯލު ޖެހި ކުޅުންތެރިޔާ އަށެވެ. އެއީ 205 މެޗުން 129 ގޯލާއެކުގަ އެވެ. އަދި މިމޮޅަކީ 1931ގެ ފަހުން ޔުނައިޓެޑްވި އެންމެ ބޮޑު ބައްޔެވެ.
މި ގޮތަށް މެޗަކުން މޮޅުވުމަކީ ވަރަށް ހާއްސަ ކާމިޔާބީއެއް. ވަރަށް ހާއްސަ މޮޅެއް. އެކަމަކު އަހަރުމެން ތިބެންވާނީ ހަމަބިމުގައި. އުއްމީދު ކުރަނީ މިއީ (މި ސީޒަނުގައި ގަދަ ހަތަރަކުން ޖާގަ ހޯދަން މަސައްކަތް ކުރަމުންދާ ދިއުމަށް) އަހަރުމެންނަށް ލިބުނު ވަރަށް ބޮޑު ހިތްވަރެއް ކަމެއްސަލާހް
އޭނާ ބުނީ ޕްރެމިއާ ލީގުގައި ލިވަޕޫލަށް އެންމެ ގިނަ ގޯލު ޖެހި ކުޅުންތެރިޔާގެ ރެކޯޑް ޔުނައިޓެޑް ކޮޅަށް ގޯލު ޖަހައިގެން ލިބުމުން ވެސް ވަރަށް އުފާވި ކަމަށެވެ.
އަހަރެން ދޮގު ހަދާކަށް ނެތިން، ވަރަށް އުފާވި. ހާއްސަކޮށް މިއީ ޔުނައިޓެޑް ކޮޅަށް ގޯލު ޖަހައިގެން ލިބުނު ކާމިޔާބީއެއްވީމަ. އެކަމަކު އަހަރެން ބޮޑަށް ހިތްހަމަޖެހުނީ މެޗުގައި ޖެހި ދެ ވަނަ ގޯލަށްސަލާހް
ލިވަޕޫލްގެ ކޯޗު ޔާގެން ކްލޮޕް ބުނީ އޭނާގެ ޓީމުން ދެއްކި ކުޅުމާމެދު ވަރަށް ފަހުރުވެރިވާ ކަމަށާއި ކުޅުމާމެދު އިތުރަށް ދައްކާނެ ވާހަކައެއް ނެތްހާ މެޗު ފުރިހަމަ ކަމަށެވެ.
ކްލޮޕް ބުނީ ސަލާހް 129 ގޯލު ޖެހުމުން އެކަމާ ވެސް އޭނާ ހައިރާން ނުވާ ކަމަށާއި މިއީ ވަރަށް ހާއްސަ ކާމިޔާބީއެއް ކަމަށެވެ.
މިއަދަދު ކޮންމެ، ކޮންމެ މީހަކަށް ހަމަކުރުމަކީ ވާނެ ކަމެއްނޫން. މީހުން މެޗަށް ފަހު އެކި ގޮތްގޮތަށް ވާހަކަ ދައްކާނެ. އެކަމަކު އަހަރުމެންނަށް މި ފެންނަނީ ލޯ މަތީގައި ވަރަށް ތަފާތު ކުޅުންތެރިއަކު. އޭނާއާ މެދު އަހަރުމެން ފަހުރުވެރިވަން. އަދި އޭނާ އަށް އިތުރު ކާމިޔާބީއަށް ވެސް އެދެންލިވަޕޫލްގެ ކޯޗު ކްލޮޕް
ލިވަޕޫލަށް ދެ ގޯލު ޖަހައިދިން ނެދަލޭންޑްސްގެ ކޯޑީ ގަކްޕޯ ބުނީ މެޗުގެ ކުރިން ޔުނައިޓެޑް މެޗަކީ ކިހާ މުހިންމު މެޗެއްކަން ކުޅުންތެރިންނާއި ސަޕޯޓަރުންނާއި އެކި މީހުން ވަރަށް ގިނައިން އޭނާ ގާތުގައި ދެއްކި ކަމަށެވެ. މިހެންވެ މި މެޗުގައި ދެ ގޯލު ޖެހުމުން ވަރަށް އުފާވެއްޖެ ކަމަށެވެ.
