ރައީސް ޔާމީނަށް ރައްޔިތުންގެ މަޖިލީހުގެ އަޣުލަބިއްޔަތު ގެއްލިއްޖެ: ގުޅިފައިވާ ޕާޓީތައް
3 ޖުލައި 2017 | ހޯމަ 07:1645 މެމްބަރުންގެ ސޮޔާއެކު މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ވައްދައިފި
ރައީސް ޔާމީން
ރައީސް ޔާމީނަށް ރައްޔިތުންގެ މަޖިލީހުގެ އަޣްލަބިއްޔަތު ގެއްލިއްޖެ ކަމަށް ގުޅިފައިވާ ސިޔާސީ ޕާޓީތަކުން ބުނެފިއެވެ.
ރައްޔިތުންގެ މަޖިލިހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ހުށަހެޅުމާ ގުޅިގެން ހޯމަ ދުވަހު ގުޅިފައިވާ ޕާޓީތަކުން ނެރުނު ބަޔާނެއްގައި ބުނެފައިވަނީ 3 ޖުލައި 2017 ވީ ހޯމަ ދުވަހު، ރައްޔިތުންގެ މަޖިލީހުގެ 45 މެންބަރުން ސޮއިކުރައްވާ މަޖިލީހުގެ ތަނަވަސް އަޣުލަބިއްޔަތާއެކު ރައްޔިތުންގެ މަޖިލީހުގެ ރައީސްގެ އިތުބާރުނެތްކަމުގެ މައްސަލަ ހުށަހެޅުމާއެކު ރައްޔިތުންގެ މަޖިލީހުގެ އަޣްލަބިއްޔަތު ރައީސް ޔާމީނަށް ގެއްލިއްޖެ ކަމަށެވެ.
ގުޅިފައިވާ ޕާޓީތަކުގެ ބަޔާނުގައި ބުނެފައިވަނީ، ދިވެހިރާއްޖޭގެ މުސްތަޤިއްލު މުއައްސަސާތަކާ، ޝަރީއަތް ހިންގަވާ އެންމެހާ ފަރާތްތަކާއި، ރާއްޖޭގެ ދިފާއީ އެންމެހާ ބާރުތަކާއި، އަދި ދިވެހިރާއްޖޭގެ ތައްރައްޤީގެ ބައިވެރިން ކަމުގައިވާ ބޭރުގެ އެންމެހާ ފަރާތްތަކުގެ ކިބައިން ރައްޔަތުންގެ ނިންމުމަށާއި އަދި ރައްޔިތުންގެ މަޖިލީހުގެ އަޣުލަބިއްޔަތު ނިންމުމަށް އިޙްތިރާމް ކުރެއްވުމަށް އެދޭ ކަމަށެވެ.
"ދިވެހިރާއްޖޭގެ މުސްތަޤިއްލު މުއައްސަސާތަކާ، ޝަރީއަތް ހިންގަވާ އެންމެހާ ފަރާތްތަކާއި، ރާއްޖޭގެ ދިފާއީ އެންމެހާ ބާރުތަކާއި، އަދި ދިވެހިރާއްޖޭގެ ތައްރައްޤީގެ ބައިވެރިން ކަމުގައިވާ ބޭރުގެ އެންމެހާ ފަރާތްތަކުގެ ކިބައިން އަޅުގަނޑުމެން އެދެނީ ރައްޔަތުންގެ ނިންމުމަށާއި އަދި ރައްޔިތުންގެ މަޖިލީހުގެ އަޣުލަބިއްޔަތު ނިންމުމަށް އިޙްތިރާމް ކުރެއްވުމަށެވެ" ގުޅިފައިވާ ސިޔާސީ ޕާޓީތަކުން ނެރެފައިވާ ބަޔާނުގައި ވެއެވެ.
ގުޅިފައިވާ ޕާޓީތަކުގެ ބަޔާނުގައި ބުނެފައިވަނީ އެ ޕާޓީތަކުން އެދެނީ ހުރިހާ ފަރާތަކުންވެސް 2018 ވަނަ އަހަރުގެ އިންތިޚާބަކީ ސިޔާސީ ޕާޓީތަކުން އިޚްތިޔާރުކުރާ ކެންޑިޑޭޓުންތަކަކަށް ވާދަކުރެވޭ މިނިވަން އިންސާފުވެރި އިންތިޚާބެއްކަން ކަށަވަރުކުރަން ކުރަންޖެހޭ މަސައްކަތްތައް ކޮށްެދެއްވުމަށް އެދޭ ކަމަށެވެ. އަދި މިނިވަން މުއައްސަސާތަކުގެ މުސްތަޤިއްލުކަން ޤާއިމުކުރުމަށާއި، ޤާނޫނުއަސާސީއާ ޚިލާފަށް އަދި ޑިމޮކްރެޓިކް އުޞޫލުތަކާ ޚިލާފަށް ފާސްކޮށްފައިހުރި ޤާނޫނުތައް އިޞްލާޙުކުރުމަށާއި، އަދި ސިޔާސީ ސަބަބުތަކަށްޓަކައި ނުޙައްޤުން ހައްޔަރުކޮށް، ތަޙްޤީޤު ކުރަމުންދާ ނުވަތަ ދައުވާ އުފުލި ނުވަތަ ދައުވާ އުފުލުމުގެ މަގުމަތީގައިވާ މީހުންނާއި ޙުކުމްކޮށްފައިވާ މީހުން މިނިވަންކުރުމަށާއި؛ ފުލުހުންނާއި ސިފައިންގެ މަސައްކަތުގައި ސިޔާސީ ކުލަ ޖެހުނަ ނުދިނުމަށާއި އަދި ފަނޑިޔާރުންގެ ނިންމުންތަކަށް ސަރުކާރުގެ ނުފޫޒް ފޯރުވިޔަ ނުދިނުމުގެ މަސައްކަތް ކޮށްދެއްވުމަށް ކަމަށެވެ.
ދިވެހިރާއްޖޭގެ ސިޔާސީ މަސްރަހު ބަދަލުވެފައިވާ މި ދަނޑިވަޅު ރައްޔިތުންގެ މަޖިލީހުގެ މެންބަރުންގެ ޤާނޫނީ ދައުރު ފުރިހަމައަށް އަދާކުރުމުގެ ފުރުސަތު މެންބަރުންނަށް ލިބިދިނުމަކީ މުހިންމުކަމެއް ކަމަށްވެސް ބަޔާނުގައި ފާހަގަ ކޮށްފައިވެއެވެ. އަދި ރައްޔިތުންގެ މަޖިލީހުގެ މެންބަރުންގެ ޤާނޫނީ ދައުރު އަދާކުރުމަށް ޤާނޫނު ނިވާފަތްގަނޑަކަށް ބޭނުންކޮށްގެން ޤާނޫނާ ޚިލާފަށް އެއްވެސް ފަރާތަކުން މަސައްކަތްކުރުމުގެ ފުރުސަތު ނުދިނުމަށާއި، މެންބަރުންގެ މަސައްކަތްތައް ކުރުމުގައި ޤާނޫނީ އިމުގެތެރެއިން ވާގިވެރިވެދިނުމަށް ދިވެހި ފުލުހުންނާއި ސިފައިންނާއި އަދި ދައުލަތުގެ މުއައްސަސާތަކުގެ ކިބައިން އެދޭ ކަމަށްވެސް ބުނެފައިވެއެވެ.
ގުޅިފައިވާ ޕާޓީތަކުން ބުނެފައިވަނީ، ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް.)ގެ ރައީސް މައުމޫން ޢަބްދުލްޤައްޔޫމް އާއި ދިވެހި ރައްޔިތުންގެ ޑިމޮކްރެޓިކް ޕާޓީ (އެމް.ޑީ.ޕީ.)ގެ ރައީސް މުޙަންމަދު ނަޝީދު އާއި ޖުމްހޫރީ ޕާޓީ (ޖޭ.ޕީ.)ގެ ލީޑަރ ޤާސިމް އިބްރާހިމް އާއި ޢަދާލަތު ޕާޓީ (އޭ.ޕީ.)ގެ ރައީސް އިމްރާން ޢަބްދުﷲ އިސްވެ ތިއްބަވައިގެން 24 މާޗް 2017 ދުވަހު ސޮއިކުރެއްވި އެއްބަސްވުމުގައި ސޮއިކުރައްވާފައިވަނީ ދިވެހިރާއްޖޭގެ ސިޔާސީ މަސްރަހު ބޮއްސުންލައި، ސަރުކާރުގެ ތެރޭގައި ވައްކަމާއި، ކޮރަޕްޝަން އިންތިހާއަށް ބޮޑުވެ، މިނިވަން މުއައްސަސާތައް ސަރުކާރުގެ އިޝާރާތަށް މަސައްކަތްކުރަން ފަށައި، ރައްޔިތުންގެ ޙައްޤުތައް ނިގުޅައިގަނެ، ރައްޔިތުންނަށް އަނިޔާވެރިވެ، ދިރިއުޅުމުގެ އަގު އަތްނުފޯރާ ފަށަށް ދިއުމުން، ދިވެހި ރައްޔިތުން އިސްނަގައިގެން ގެންނަންބޭނުންވި ބަދަލުތައް ގެނައުމަށް އެހީތެރިވެދީ، ދިވެހި ރައްޔިތުންގެ އަޑު އަހައި، ދިވެހި ރައްޔިތުންގެ އިހްސާސްތަކާއި ވިންދާއެއްގޮތަށް، މި ހަތަރު ސިޔާސީ ޕާޓީން ގުޅިގެން މަސައްކަތްކުރުމަށް ކަމުގައެވެ.
ގުޅިފައިވާ ޕާޓީތަކުގެ ބަޔާނުގައި ރައީސް ޔާމީން ވެރިކަމަށް ވަޑައިގަތީ ކޯލިޝަނެއްގެ ތެރެއިން ވެރިކަން ކުރުމުގެ މެންޑޭޓެއް ލިބިވަޑައިގަނެގެން ކަމަށާއި، އެކޯލިޝަން ރޫޅި ޖުމްހޫރީ ޕާޓީ އާއި ޢަދާލަތު ޕާޓީ އާއި އަދި ޚުދު އެމަނިކުފާނު ނިސްބަތްވެވަޑައިގަންނަވާ ޕީ.ޕީ.އެމް. އިންވެސް އެމަނިކުފާނަށް ކުރައްވާފައިވާ ތާއީދު ވަނީ އަނބުރާ ގެންގޮސްފައި ކަމަށާއި، ނިމި ދިޔަ ލޯކަލް ކައުންސިލް އިންތިޚާބުގެ ވޯޓުގައި، ރައީސް ޔާމީނު ތަމްސީލް ކުރެއްވި، އަދި އެމަނިކުފާނުގެ ފޮޓޯ ފުޅާއިއެކު ކެމްޕޭނަށް ނުކުމެވަޑައިގެންނެވި ޕީ.ޕީ.އެމްގެ ކެންޑިޑޭޓުންނަށް ލިބިވަޑައިގަތީ ޖުމްލަ ވޯޓުގެ %27 ކަންވެސް ފާހަގަ ކޮށްފައި ވެއެވެ.
