ރާއްޖެއިން ފަލަސްޠީނަށް ކަނޑައެޅުއްވި ފުރަތަމަ ސަފީރު އެ ޤައުމުގެ ރައީސަށް ފަތްކޮޅު އަރުވައިފި
މިއީ ދިވެހިރާއްޖޭގެ ފަރާތުން ސަފީރަކު ފަލަސްތީނުގެ ރައީސަކަށް ފަތްކޮޅު އެރުވި ފުރަތަމަ ފަހަރު
ރާއްޖެއިން ފަލަސްތީނަށް ކަނޑައެޅުއްވި ސަފީރު އެ ޤައުމުގެ ރައީސަށް ފަތްކޮޅު އަރުވަނީ
ދިވެހިރާއްޖެއިން ފަލަސްތީނަށް ކަނޑައަޅުއްވާފައި ހުންނަވާ ނޮން-ރެޒިޑެންޓް ސަފީރު، މުޙައްމަދު ޚަލީލް، އެ ޤައުމުގެ ރައީސް މަޙުމޫދު ޢައްބާސްއަށް ސަފީރުކަމުގެ ފަތްކޮޅު އަރުވައިފިއެވެ.
ފަތްކޮޅު އެރުވުމުގެ ރަސްމިއްޔާތު ބާއްވާފައިވަނީ އުރުދުންގައި ހުންނަ ފަލަސްޠީނުގެ އެމްބަސީގައި ބުދަ ދުވަހުއެވެ. މި ރަސްމިއްޔާތަށް ފަހު ބޭއްވި ބައްދަލުވުމުގައި ފަލަސްތީނުގެ ރައީސް، މަޙުމޫދު ޢައްބާސް ވަނީ ސަފީރު ޚަލީލަށް މަރުޙަބާ ވިދާޅުވެ އޭނާގެ ސަފީރުކަމުގެ ދައުރުގައި ކާމިޔާބީއަށް އެދިވަޑައިގަންނަވާފައެވެ.
ޚަލީލުގެ ވާހަކަފުޅުގައި އޭނާ ވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ފަރާތްޕުޅުން ރައީސް ޢައްބާސްއަށާއި ފަލަސްޠީނުގެ ރައްޔިތުންނަށާއި ސަރުކާރަށް ވެދުމާއި މުބާރިކުބާދީ އަރިސްކުރައްވާ ޝުކުރު އަދާކުރައްވާފައެވެ. އަދި ފަލަސްތީނުގެ އަޚުންނާއި އުޚްތުންގެ ދިފާޢުގައި ރައީސް ޞާލިޙުގެ ސަރުކާރާއި ދިވެހި ރައްޔިތުން އަބަދުވެސް ދެމިތިބޭނެ ކަމުގެ ޔަޤީންކަން ޚަލީލު އެރުއްވިއެވެ.
ފަލަސްތީނުގެ ހާލަތަކީ ކޮންމެ ދިވެހި ރައްޔިތެއްގެ ހިތުގައިވެސް ހާއްސަ ކަމެއް ދެވިފައިވާ ހާލަތެއްކަން ފާހަގަކުރައްވައި، ޚަލީލު ވިދާޅުވީ 1967ގެ ކުރިން ކަނޑައަޅާފައިވާ ބޯޑަރުތަކުގެ މައްޗަށް ބިނާވެފައިވާ އަދި އިރުމަތީ ޤުދުސް ވެރިރަށެއްގެ ގޮތުގައި ހަމަޖެހިފައިވާ އަމިއްލަ ސިޔާދަތެއް ލިބިފައިވާ މިނިވަން ފަލަސްތީނެއް ޤާއިމުކުރުމަށް ދިވެހި ސަރުކާރުން ތާއީދުކުރަމުންދާ ކަމަށެވެ.
އެ ޤައުމުގެ ރައީސް ޢައްބާސްގެ ވާހަކަފުޅުގައި ރައީސް އިބްރާހީމް މުޙައްމަދު ޞާލިޙު، ފަލަސްތީނާއި ދޭތެރޭ ބަހައްޓަވާ ހާއްސަ ގާތްގުޅުން ފާހަގަ ކުރައްވާ، އެކަމަށް ޝުކުރު އަދާކުރައްވިއެވެ. އަދި، މިނިވަން ފަލަސްތީނެއް ޤާއިމުކުރުމަށް އެ ޤައުމުގެ ރައްޔިތުން ކުރަމުންދާ މަސައްކަތުގައި ދިވެހި ސަރުކާރުން އަބަދުވެސް ކުރަމުންދާ ތާއީދަށާއި މެދުއިރުމަތީ ސަރަހައްދުގެ އަމަންއަމާންކަން ޤާއިމުކުރުމަށް ރާއްޖެއިން ދޭ އަހައްމިއްޔަތުކަން އެމަނިކުފާނު ފާހަގަކުރެއްވިއެވެ.
މީގެ އިތުރުން ފަލަސްތީނުގެ ރައްޔިތުންގެ އިންސާނީ ޙައްޤުތަކާއި ކަރާމާތް ރައްކާތެރިކުރުމަށްޓަކައި ބައިނަލްއަޤުވާމީ ފެންވަރުގައި ރާއްޖެއިން ވަކާލާތު ކުރަމުންގެންދާކަމަށްޓަކައި ތަޢުރީފުކުރައްވާ، ދިވެހި ސަރުކާރަށް އެމަނިކުފާނު ޝުކުރު އަދާކުރެއްވިއެވެ.
މިއީ ދިވެހިރާއްޖޭގެ ފަރާތުން ސަފީރަކު ފަލަސްތީނުގެ ރައީސަކަށް ފަތްކޮޅު އެރުވި ފުރަތަމަ ފަހަރެވެ. ދިވެހިރާއްޖެއާއި ފަލަސްތީނާ ދެމެދު ސިޔާސީ ގުޅުން ޤާއިމުކޮށްފައިވަނީ 4 އޭޕްރިލް 1982 ގައެވެ.
