އެމްއެމްޕީއާރުސީން އައިއެމްއެމް އޮސްޓްރޭލިއާގައި ރާއްޖެ އިސްތިހާރުކުރަނީ
އެމްއެމްޕީއާރުސީއިން މި ފެެއަރގެ ފުރަތަމަ ދުވަހު ޓްރެވްމީޑިއާ ސަމިޓްގައި ބައިވެރިވި
އެމްއެމްޕީއާރުސީން އައިއެމްއެމް އޮސްޓްރޭލިއާގައި ރާއްޖެ އިސްތިހާރުކުރަނީ
އޮސްޓްރޭލިއާ މާކެޓުގައި ދިވެހިރާއްޖެ އިޝްތިހާރު ކުރުމަށާއި ރާއްޖެއަށް އޮތް ލޯބި އިތުރު ކުރުމަށް އިންޓަނޭޝަނަލް މީޑިއާ މާކެޓްޕްލޭސް (އައިއެމްއެމް އޮސްޓްރޭލިއާ) 2023 ގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ބައިވެރިވެއްޖެއެވެ.
މި ފެއަރއަކީ ފެބްރުއަރީ މަހުގެ 23-24 ގައި އޮސްޓްރޭލިއާގެ ސިޑްނީގައި ބޭއްވި ފެއަރއެކެވެ. މި ފެއަރގައި ބައިވެރިވުމަކީ އޯޝިއެނިކް މާކެޓުގެ މަޝްހޫރު ނޫސްވެރިންނާއި މީޑިއާ ޕަބްލިކޭޝަންތަކާ ބައްދަލުކޮށް، ވިޒިޓް މޯލްޑިވްސް ސްޓޯރީޓެލަރސް ކޮންފަރެންސް 2023 ފަދަ ކުރިއަށް އޮތް އިވެންޓްތައް ޕްރޮމޯޓްކޮށް، ދިވެހިރާއްޖޭގެ ބްރޭންޑް ހަރުދަނާކޮށް، އޯޝިއެނިކް މާކެޓާ ބެހޭ އެންމެ ފަހުގެ މައުލޫމާތު ހޯދުމަށް ލިބޭ ވަރަށް ރަނގަޅު ފުރުސަތެކެވެ.
އެމްއެމްޕީއާރުސީއިން މި ފެެއަރގެ ފުރަތަމަ ދުވަހު ޓްރެވްމީޑިއާ ސަމިޓްގައި ބައިވެރިވިއެވެ. ޓްރެވްމީޑިއާ ސަމިޓަކީ އައިއެމްއެމް އޮސްޓްރޭލިއާގެ ތެރޭގައި ބޭއްވި ހާއްސަ ކޮންފެރެންސްއެކެވެ. ޕެނަލް ޑިސްކަޝަންތަކުގައި ފަތުރުވެރިކަމުގެ ދާއިރާގެ ތަޖުރިބާކާރުން ބްރޯޑްކާސްޓް މީޑިއާ އާއި އިންކްލޫސިވް ޓޫރިޒަމް ފަދަ މައުޟޫއުތަކާ ބެހޭ ގޮތުން ވާހަކަ ދެއްކިއެވެ. މިއަށް ފަހު އޯޝިއެނިކް ސަރަހައްދުގެ 150 އަށް ވުރެ ގިނަ މަގުބޫލު މީޑިއާއާ އެކު ނެޓްވޯކިން ސެޝަންތައް ކުރިއަށްދިޔައެވެ. މި ފެއަރގައި ބައިވެރިވާ ބައެއް މީޑިއާތަކުގެ ތެރޭގައި ބީބީސީ ޓްރެވަލް، ކޮންޑޭ ނާސްޓް ޓްރެވަލާ، ވޯގް މެގަޒިން، ނޭޝަނަލް ޖިއޮގްރަފިކް ޓްރެވަލާ ފަދަ މަޝްހޫރު މީޑިއާތައް ހިމެނެ އެވެ. އަދި 2023 ވަނަ އަހަރު ޑެސްޓިނޭޝަން މާކެޓިން އޯގަނައިޒޭޝަންތަކުގެ ދައުރާއި ޕަބްލިކް ރިލޭޝަންސް ފަދަ މައުޟޫއުތަކުގެ މައްޗަށް ތަގުރީރުތަކާއި މަޝްވަރާތައް ވެސް ކުރިއަށް ގެންދިޔައެވެ. ފެއަރގެ ދެވަނަ ދުވަހު އެމްއެމްޕީއާރުސީން ދިވެހިރާއްޖެއަށް ހާއްސަ ސްޓޭންޑެއްގައި އޯޝިއޭނިކް މާކެޓުގެ 22 ކުންފުންޏަކާއެކު ބައްދަލުކުރިއެވެ.
މި އިވެންޓުގައި ބައިވެރިވުމުގެ މައިގަނޑު މަގުސަދަކީ މި މާކެޓުގެ ފަތުރުވެރިން ޗުއްޓީ ހޭދަކުރުމަށް އިސްކަންދޭ މަންޒިލެއްގެ ގޮތުގައި ރާއްޖެ ޕްރޮމޯޓްކުރުމާއި، މަންޒިލުގެ އެންމެ ފަހުގެ މައުލޫމާތާއި ދަތުރުފަތުރުގެ ގައިޑްލައިންތަކާއެކު އޮސްޓްރޭލިއާގެ މީޑިޔާއަށް އަޕްޑޭޓް ކުރުމެވެ. އައިއެމްއެމްގައި ބައިވެރިވުމަކީ މި މާކެޓުގައި ޑެސްޓިނޭޝަން ޕްރެޒެންސް ދެމެހެއްޓުމަށާއި، މީޑިއާ ޕްރޮފެޝަނަލުންނަށް ފަތުރުވެރިކަމުގެ އެކި ސެގްމަންޓްތައް ރަނގަޅަށް ޕްރޮމޯޓް ކުރުމަށް އަޅުގަނޑުމެން ގެންގުޅޭ ސްޓްރެޓެޖީއާ އެއްގޮތައް ކުރިއަށްގެންދާ ހަރަކާތެކެވެ. މި ސްޓްރެޓެޖީގެ މަގުސަދަކީ ކުރިއަށް އޮތް ތަނުގައިވެސް އޮސްޓްރޭލިއާ އާއި ނިއުޒީލެންޑުން ލިބޭ ބުކިންތަކާއި އަންނަ ފަތުރުވެރިންގެ އަދަދު އިތުރުކުރުމެވެ.
29 ޖެނުއަރީ 2023 ގެ ނިޔަލަށް އޮސްޓްރޭލިޔާގެ 2،610 ފަތުރުވެރިން ވަނީ ދިވެހިރާއްޖެއަށް ޒިޔާރަތްކޮށްފައެވެ. އެމްއެމްޕީއާރުސީން މިދިޔަ އަހަރު ވެސް އައިއެމްއެމް އޮސްޓްރޭލިއާގައި ބައިވެރިވިއެވެ. އަދި މިދިޔަ އަހަރު މި މާކެޓަށް ގިނަ ކެމްޕޭންތަކެއް ހިންގާފައިވާއިރު އޭގެ ތެރޭގައި ޓްރެވްމީޑިއާގެ މެމްބަޝިޕް، ސްޓޭބް މެގަޒިން ފަދަ ކެމްޕޭންތައް ހިމެނެއެވެ. މި އަހަރުގެ ރޮބް ރިޕޯޓާއެކު ކެމްޕޭނެއް ކުރިއަށްދާއިރު، މި އަހަރުގެ ކުރީކޮޅަށް ގިނަ ހަރަކާތްތަކެއް ހިންގުމަށް ވަނީ ރާވާފައެވެ.
