ދާއޫދުގެ ގާނޫނީ ޓީމުގެ ރައްދު ނާޒިމް އަށް: ދާއޫދަށް އަމާޒުކޮށް ތި ދެއްކެވީ އެއްވެސް އަސާސެއް ނެތް ދޮގު ވާހަކަތަކެއް
ފުލުހުންގެ ބްލޫ ހައުސިންގ މަޝްރޫއުގެ އޮޑިޓް ރިޕޯޓު ދިރާސާކުރާ ކޮމިޓީގައި މުހައްމަދު ދާއޫދުގެ އެކައުންޓަށް ބޮޑު އަދަދެއްގެ ފައިސާ ޖަމާވެފައިވާކަމަށް މަޖިލީހުގެ ނައިބު ރައީސް ނާޒިމް ތުހުމަތުކުރި
އެސިސްޓެންޓް ކޮމިޝަނާ އޮފް ޕޮލިސް، މުހައްމަދު ދާއޫދު އަދި ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް
އެސިސްޓެންޓް ކޮމިޝަނާ އޮފް ޕޮލިސް، މުހައްމަދު ދާއޫދުގެ ބޮލުގައި ކޮރަޕްޝަނުގެ ބޮޑެތި ތުހުމަތުތަކެއް އަޅުވައި ރައްޔިތުންގެ މަޖިލީހުގެ ނައިބު ރައީސް، އަހުމަދު ނާޒިމް ދެއްކެވި ވާހަތައް ދޮގުކޮށް އޭނާގެ ގާނޫނީ ވަކީލުންގެ ޓީމުން ރައްދު ދީފި އެވެ.
ފުލުހުންގެ ބޯހިޔާވަހިކަމުގެ މަޝްރޫއު (ބްލޫ ހައުސިން)ގެ އޮޑިޓް ރިޕޯޓުތައް ދިރާސާކުރަން މަޖިލީހުން އުފައްދާފައިވާ ޚާއްސަ ސަބް ކޮމިޓީގައި، ދާއޫދަށް ބޮޑެތި ތުހުމަތުތަކެއް ކުރައްވައި ނާޒިމް ވިދާޅުވީ ދާއޫދާއި އޭނާގެ އަނބިކަނބަލުންގެ އެކައުންޓްތަކަށް، އާމްދަނީ ލިބުނު ގޮތް ނޭނގޭ، ގިނަ އަދަދެއްގެ ފައިސާ ޖަމާވެފައިވާކަން ފާހަގަވެފައިވާ ކަމަށެވެ.
އަދި ސޯސް އޮފް އިންކަމް ނޭނގޭ ގޮތަށް ގިނަ އަދަދެއްގެ ފައިސާ 2023 ވަނަ އަހަރާއި 2024 ވަނަ އަހަރާ ދޭތެރޭގައި މުހައްމަދު ދާއޫދުގެ އެކައުންޓަށް ޖަމާވެފައިވާ ކަމަށާއި، އެ ފައިސާއިން 14.6 މިލިއަން ރުފިޔާގެ އެސެޓް އުފައްދާފައިވާ ކަމަށާއި، އެއީ އެމްއެމްޕީއާރްސީގެ ފައިސާ ކަމަށް ބެލެވޭ ކަމަށްވެސް ނާޒިމް ވިދާޅުވިއެވެ.
ނާޒިމް ދެއްކެވި މި ވާހަތަކަށް ރައްދުދެއްވައި ދާއޫދު ތަމްސީލުކުރާ ލޯކްރާފްޓު ލޯފާމުން އަންގާރަ ދުވަހުގެ ރޭ ނެރުނު ބަޔާނެއްގައި ބުނީ ދާއޫދުގެ އެކައުންޓަށް، ކާކުކަން ނޭނގޭ ގޮތަށް ފައިސާތަކެއް ޖަމާ ކޮށްފައިވާ ކަމަށާއި އޭނާއާ ގުޅޭ ނުހައްގު މުއްސަނދިކަމުގެ މައްސަލަތަކެއް ހުރި ކަމަށް ބުނެ މަޖިލީހުގެ މާލިއްޔަތު ކޮމިޓީގައި ނާޒިމް ދެއްކެވީ ހަގީގަތެއް ނެތް ދޮގު ވާހަތަކެއް ކަމަށެވެ.
ދާއޫދަށް ކުރާ ތުހުމަތުތަކުގެ ދިފާއުގައި ވަކީލުންގެ ޓީމުން ނެރުނު ބަޔާނުގައި ބުނީ ދާއޫދުގެ އެކައުންޓަށް ގޮތް ނޭނގޭ އެއްވެސް ފައިސާއެއް ވެދެފައިނުވާނެ ކަމާއި، ގާނޫނާ ހިލާފު އެއްވެސް މުއާމަލާތެއް ދާއޫދުގެ އެކައުންޓް މެދުވެރިކޮށް ހިނގާފައި ނުވާނެކަމުގެ ޔަގީންކަން ދޭ ކަމަށެވެ.
ބަޔާނުގައި ބުނީ އެމްއެމްޕީއާރުސީ ހިޔާނާތުގެ ފައިސާ ލިބުނު މީހުންގެ ލިސްޓުގައި ދާއޫދު އޮތް ނަމަވެސް އޭގެން އެއްވެސް ފައިސާއެއް އޭނާއަށް ނުލިބޭކަން މި މައްސަލާގައި ކުރީގެ ނައިބު ރައީސް އަހުމަދު އަދީބު ތަހުގީގަށް ދިން ބަޔާންތަކުން އެނގޭނެ ކަމަށެވެ.
މީގެ އިތުރުން ގާނޫނު ތަންފީޒުކުރާ އިދާރާއެއްގެ އޮފިސަރަކާ ގުޅޭ ގޮތުން ނާޒިމް ހަގީގަތާ ހިލާފު ވާހަކަތަކެއް ދެއްކުމަކީ ރައްޔިތުންގެ މެދުގައި ތަންފީޒީ އިދާރާތަކާމެދު އޮންނަ އިތުބާރު ގެއްލިގެންދާނެ ކަމަކަށްވާތީ މިފަދަ ވާހަކަތައް ނުދެއްކުމަށް ވެސް ބަޔާނުގައި އިލްތިމާސްކޮށްފައި އެވެ.
އެމް.އެމް.ޕީ.އާރް.ސީ އާ ގުޅޭ އެއްވެސް ފައިސާއެއް އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ދާއޫދަށް ލިބިފައިނުވާކަން ދައުލަތުގެ ފަރާތުން އެމް.އެމް.ޕީ.އާރް.ސީ އާ ގުޅޭގޮތުން ކުރިއަށް ގެންދިޔަ ތަހުގީގުތަކުންނާއި، ތަހުގީގަށް އަހްމަދު އަދީބް އަބްދުލްޣަފޫރު ދީފައިވާ ބަޔާންތަކުން އެނގި ސާފުވާނެ. އަދި އިދާރީ ތަހުގީގުތަކާ ގުޅިގެން ޕޮލިސް ބޯޑުން މީގެ ކުރީގައި ނިންމާފައިވާ ނިންމުންތަކާ ގުޅިގެން ޝަރުޢީ މަރުހަލާގައި ނިންމާފައިވާ ނިންމުންތަކުން އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ދާއޫދުގެ ނަޒާހަތްތެރިކަމާމެދު ސުވާލު އުފެއްދޭނެ އެއްވެސް ޖާގައެއް ނެތްކަން ސާފުވާނެއެސިސްޓެންޓް ކޮމިޝަނާ އޮފް ޕޮލިސް، މުހައްމަދު ދާއޫދުގެ ގާނޫނީ ޓީމް
އޭގެއިތުރުން ވަކީލުންގެ ބަޔާނުގައި ބުނީ ތުހުމަތު ރައްދުވާ ފަރާތައް ޖަވާބުދާރީވުމުގެ ފުރުސަތު ނުދީ މަޖިލީހުގެ ކޮމިޓީއެއްގައި ލައިވްކޮށް ސާބިތުނުހިފޭ ދޮގު ވާހަކަތައް ދެއްކުމަކީ ޒިންމާދާރުކަމެއް ނޫން ކަމަށެވެ.
އަދި ރައްޔިތުންގެ މަޖިލީހުގައި ދައްކާ ވާހަކަތައް ވާންވާނީ ޒިންމާދާރު ކަމާއެކު އެއްވެސް ފަރާތެއްގެ ގާނޫނީ ހައްގު ނުގެއްލޭ ގޮތަށް ދައްކާ ވާހަކަތަކަކަށް ކަމަށް ވެސް ބަޔާން ނިންމާލަމުން ބުނެފައިވެ އެވެ.
