ޔަހޫދީ ވަޒަންވެރިން ފަލަސްޠީނުގެ ގެތަކާ މުދަލަށް ދިން ގެއްލުން، ކުޑަކުއްޖެއްގެ ދުލުން!

ޔަހޫދީ އިޒްރޭލުން، ފަލަސްޠީނުގެ މުސްލިމުންނަށް އަމާޒުކޮށްގެން ދެމުންދާ ސިލްސިލާ ހަމަލާތަކުގެ ވާހަކައަކީ ދައްކާ ކޮޅުންލާނެ ވާހަކަތަކެއް ނޫނެވެ. ސިލްސިލާ ކަމަކަށް އެކަން ވެފައި ވާ އިރު، އިންސާނީ ޙައްޤުތަކާ ޑިމޮކްރަސީގެ ރޭހުގައި ކުރިއަރާ ގޮސްފައި ވާ ކަމަށް ބުނާ 21 ވަނަ ޤަރުނުގެ ތަހުޒީބު ޤައުމުތަކުންވެސް އެކަމާ ދެކޮޅަށް ކުރި ކަމެއް ނެތޭވެސް ދެންނެވިދާނެއެވެ. އަނިޔާވެރިކަމުގައި އިޒްރޭލުން ފަސްނުޖެހޭ އެންމެ ބޮޑު އެއް ސަބަބަކީވެސް އެއީ ކަމުގައި ދެންނެވުމަކުން ގޯހެއް ނެތެވެ. ދުވަހަކަށް ވުރެ ދުވަހެއް، އެ އަނިޔާތައް ދަނީ ގަދަވަމުންނެވެ. ލާއިންސާނީ އެ އަމަލުތަކުގެ ސިލްސިލާއަށް އަނެއްކާވެސް ބޮޅެއް އިތުރުވީ، މުޅި ދުނިޔެ، ބަލަބަލާ އޮއްވައެވެ.

ފެބުރުއަރީ 27 ވަނަ ދުވަހުގެ އިރު، އުދަރެހަށް އަރައިގެން އައީ، އިޒްރޭލުން ވެރިވެގެންފައިވާ ހުޅަނގު އައްސޭރީގެ ނާބްލުސް ސިޓީގެ އަވަށެއް ކަމަށް ވާ ހުވާރާގައި ފަލަސްޠީނުގެ އާންމު ރައްޔިތުން ދިރިއުޅެމުން ދިޔަ ގިނަ ޢަދަދެއްގެ ގެތަކާ، އާންމުންގެ މީހުން ބޭނުން ކުރަމުން ދިޔަ ގިނަ ޢަދަދެއްގެ އެއްގަމު އުޅަނދުތަކުގައި، އިޒްރޭލުގެ ވަޒަންވެރިން ހުޅުޖަހާ އަންދާލި ޚަބަރާއެކީގައެވެ. މި ހަމަލާއަކީ، މި ފަހުގެ ތާރީޚުގައި، އިޒްރޭލުގެ ވަޒަންވެރިން ހިންގި މިފަދަ އެންމެ ލާއިންސާނީ ޖަރީމާއެވެ.

ދަންވަރުގެ ވަގުތުގައި ހިންގި ހުޅުޖެހުމުގެ ޖަރީމާގައި 30 ގެއަކާއި ކާރުތަކެއް ރޯކޮށްލާފައި ވާ ކަމަށް ފަލަސްޠީނުގެ މީޑިއާއިން ވަނީ ރިޕޯޓްކޮށްފައެވެ. މީގެ 2 ދުވަހެއް ކުރިން، އިޒްރޭލުގެ 2 ވަޒަންވެރިއަކު މަރާލާފައި ވާ އިރު، މިމަހު ކުރީކޮޅު، އިޒްރޭލުގެ އަސްކަރިއްޔާއިން ނާބްލުސްގައި ހިންގި ރެއިޑެއްގައި، ފަލަސްޠީނުގެ 11 މީހަކު ވަނީ މަރާލާފައެވެ.

ފަލަސްޠީނުގެ ސިއްހަތާ ބެހޭ ވުޒާރާއިން ބުނާ ގޮތުގައި އިޒްރޭލުން އާދީއްތަ ދުވަހު ދިން ބަޑީގެ ހަމަލާއެއްގައި ޢުމުރުން 37 އަހަރުގެ ފިރިހެނަކު ވަނީ މަރާލާފައެވެ. ޕަލަސްޓީނިއަން ރެޑް ކްރެސެންޓުން ބުނި ގޮތުގައި، އިތުރު 2 މީހަކަށް ބަޑީގެ ހަމަލާ އަމާޒުވެ، ވަނީ، ޒަޚަމްވެފައެވެ. 3 ވަނަ މީހަކަށް ތޫނު އެއްޗަކުން ހަމަލާ ދީފައި ވާ އިރު، 4 ވަނަ މީހެއްގެ ގައިގައި ދަގަނޑުގަނޑަކުން ތަޅާފައި ވާ ކަމަށްވެސް މައުލޫމާތު ލިބެއެވެ. ކަރުނަ ގޭހުގެ އަސަރުކޮށްގެން އިތުރު 95 މީހަކަށް ފަރުވާ ދީފައި ވާ ކަމަށްވެސް ޚަބަރު ލިބެއެވެ.

ނާބްލުސްގައި އިޒްރޭލުން ވަޒަންވެރިވެ އުޅޭ ސަރަޙައްދުގެ ކަންކަން މޮނިޓަރ ކުރަމުންދާ ފަލަސްޠީނުގެ އޮފިޝަލެއް ކަމަށްވާ ޣައްސާން ޑަގްލަސް ވިދާޅުވީ، ފަލަސްޠީނުގެ ޢާންމު ރައްޔިތުންނަށް ގެއްލުން ދިނުމަށް އާދީއްތަ ދުވަހުގެ ރޭ ހިންގި ޖަރީމާގައި، ޔަހީދީ ވަޒަންވެރިންގެ 400 އެއްހާ މީހުން ބައިވެރިވި ކަމަށެވެ. މަސްރަހު ފިނި ކުރުމަށް އިޒްރޭލުގެ ކަމާ ބެހޭ ފަރާތްތަކުން މަސައްކަތް ކުރާނެ ކަމަށް އެ ފަރާތްތަކުން ބުނެފައި ވާ ކަމަށް، ފަލަސްޠީނު ސަރުކާރާ ހަވާލާދީ، އަލް ޖަޒީރާއިން ވަނީ ރިޕޯޓް ކޮށްފައެވެ.

ނަމަވެސް، އާދީއްތަ ދުވަހުގެ ދަންވަރުގެ ވަގުތުގައި ހިންގި އެ ނާމާން ޖަރީމާގެ މަންޒަރުތަކަކީ، ފަލަސްޠީނުގެ ރައްޔިތުންގެ ހިތްތަކުން މިއިން ދުވަހަކު ފިލާދާނެ ބިރުވެރި ކަމެއް ނޫނެވެ. އެކަން ތަޖުރިބާކާރި ކުޑަކުދިންވެސް އެބަތިއްބެވެ. އެފަދަ އެއް ކުއްޖަކީ ލަމާރް އަބޫސަރީސްއެވެ. ހަމަލާގެ މަންޒަރުތައް އޭނާ ދުށީ ހަމަލޮލުންނެވެ.

ޢުމުރުން އެންމެ 10 އަހަރުގެ ލަމާރް އެކަންޏެއް ނޫނެވެ. ޖޫދް އަބޫސަރީސްއަކީވެސް ޔަހޫދީ ވަޒަންވެރިންގެ ލާއިންސާނީ ޖަރީމާ ހަމަ ލޮލުން ދުށް ކުއްޖެކެވެ.

ލަމާރް އަބޫސަރީސްގެ ބައްޕަ، ސުލްޠާން އަބޫސަރީސް ބުނި ގޮތުގައި، އެ ޢާއިލާއިން ދިރިއުޅެމުން ދިޔަ ގޭގެ ތެރެއަށްވެސް ކަރުނަގޭސް ޖެހިއެވެ. އިޒްރޭލުގެ އަސްކަރިއްޔާއިން ދިޔައީ ޔަހޫދީ ވަޒަންވެރިންނަށް އެއްބާރުލުން ދެމުން ކަމަށްވެސް ސުލްޠާން ކިޔައިދިނެވެ.

ސުލްޠަން އަބޫ ސަރީސް ބުނި ގޮތުން ނަމަ، 200 އެއްހާ ކާރު ވަނީ އަންދާލާފައެވެ. އޭނާ މިއަދު ބޭނުންވަނީ މުޅި ދުނިޔެއަށް އެ މަންޒަރުތައް ދައްކާށެވެ.

ކޮންމެ އަހަރަކުމެހެން، ބަރަކާތްތެރި ރަމަޟާން މަހާ ދިމާކޮށް އިޒްރޭލުން ފަލަސްޠީނަށް ކުރަމުންދާ ޖެއްސުންތައް އިތުރުކޮށް، ހަމަލާތައް ވަރުގަދަ ކުރެއެވެ. 1444 ވަނަ އަހަރުގެ ރަމަޟާން މަހާ ބައްދަލު ކުރަން، މަސް ދުވަހަށް ވުރެ ވަގުތު ކުޑަތަންވެފައި ވާ މި ދަނޑިވަޅަކީވެސް، އިޒްރޭލުން ފަލަސްޠީނަށް އަމާޒުކޮށް، އެކި ކަހަލަ ހަމަލާތައް ދެމުންދާ ދަނޑިވަޅެއްކަން ފާހަގަ ކުރަން ޖެހެއެވެ.