ފީފާ އިން ހޮވި އަހަރުގެ އެންމެ މޮޅު ކޯޗަކަށް އާޖެންޓީނާގެ ލިއޮނަލް ސްކަލޯނީ ހޮވިއްޖެ އެވެ.
ހޯމަ ދުވަހުގެ ރޭ ކުރިއަށް ދިޔަ އެވޯޑު ހަފްލާގައި ސްކަލޯނީ މި އެވޯޑު ހާސިލްކުރީ ސްޕެއިންގެ ޕެޕް ގާޑިއޯލާ އާއި އިޓަލީގެ ކާލޯ އަންޗެލޮޓީ ފަހަތަށް ޖައްސައިލުމަށްފަހު އެވެ. އުމުރުން 44 އަހަރުގެ ސްކަލޯނީ ވަނީ އާޖެންޓީނާއާއެކު މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތް ކާމިޔާބުކޮށްފަ އެވެ. މީގެ އިތުރުން ވޯލްޑް ކަޕާ ހަމައަށް އައި އިރު، އާޖެންޓީނާ ވަނީ ބަލިނުވެ 36 މެޗު ހަމަކޮށްފަ އެވެ. ނަމަވެސް ވޯލްޑް ކަޕްގެ ފުރަތަމަ މެޗުގައި ސައުދީ އަރަބިޔާ އަތުން ބަލިވުމުން، އިޓަލީން ޤާއިމުކޮށްފައިވާ ރެކޯޑު މުގުރާލެވޭ ގޮތެއް ނުވި އެވެ. އާޖެންޓީނާގެ ކޯޗުކަމާ ސްކަލޯނީ ހަވާލުވި ފަހުން އެ ޓީމުން އައީ ރަނގަޅު ނަތީޖާތެއް ވެސް ނެރެމުންނެވެ. އޭނާގެ އިރުޝާދުގެ ދަށުން އާޖެންޓީނާ އިން ވަނީ ތިން ތައްޓެއް ކާމިޔާބުކޮށްފަ އެވެ. އެއީ ކޮޕަ އެމެރިކާ މުބާރާތާއި ފައިނަލިސިމާގެ އިތުރުން ވޯލްޑް ކަޕް މުބާރާތެވެ. މިއީ ސްކަލޯނީ މިއެވޯޑުގެ ގަދަ ތިނެއްގައި ވެސް ހިމެނުނު ފުރަތަމަ ފަހަރެވެ. ގަދަ ތިނެއްގައި ހިމެނުނު ގާޑިއޯލާ ވަނީ މީގެ ކުރިން ދެ އަހަރަކު މި އެވޯޑުގެ ގަދަ ތިނެއްގައި ހިމެނިފަ އެވެ.
އަހަރުގެ އެންމެ މޮޅު އަންހެން ކޯޗުކަމުގެ މަގާމު އިންގްލެންޑު ޤައުމީ ޓީމުގެ ކޯޗު ސަރީނާ ވިއެމަން ހޯދީ ލިއޯންގެ ސޯނިއާ ބޮމްޕަސްޓޯ އާއި ބްރެޒިލް ޤައުމީ ޓީމުގެ ޕިއާ ސުންދޭގާ ވާދަކޮށެވެ. މިއީ ސަރީނާ ވިއެމަން މި އެވޯޑު ކާމިޔާބު ކުރި ތިން ވަނަ ފަހަރެވެ. މިއީ ސޯނިއާ ބޮމްޕަސްޓޯ މި އެވޯޑުގެ ގަދަ ތިނެއްގައި ހިމެނުނު ފުރަތަމަ ފަަހަރެވެ. ޕިއާ ސުންދޭގް ވަނީ 2016 ވަނަ އަހަރު އޮތް އެވޯޑުގެ ގަދަ ތިނެއްގައި ހިމެނިފަ އެވެ.
