އޮފީސް އިމާރާތް ހަދަން ހުޅުމާލެއިން ބިން ވިއްކަނީ
އޮފީސް އިމާރާތްތައް އަޅަން ބިން ވިއްކުމަށް ހަމަޖެހިފައިވަނީ ޓްރީ ޓޮޕް ސަރަހައްދުން
ހުޅުމާލެ
ހުޅުމާލޭގައި އޮފީސް އިމާރާތް ހަދަން ބޭނުންވާ ފަރާތްތަކަށް ބިން ވިއްކުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.
އެ ކުންފުނިން ނެރުނު އިއުލާނެއްފައި ބުނެފައިވާ ގޮތުގައި އޮފީސް އިމާރާތް އެޅުމަށް ފަސް ބިމެއް ވިއްކުމަށް ވަނީ ހަމަޖެހިފައެވެ. އެގޮތުން ހުޅުމާލެއިން 6،100 އަކަފޫޓުގެ 3 ޕްލޮޓަކާއި 9،600 އަކަފޫޓުގެ 2 ޕްލޮޓު އޮފީސް އިމާރާތް ހަދަން ވަނީ ހުޅުވާލާފައެވެ.
އޮފީސް އިމާރާތްތައް އަޅަން ބިން ވިއްކުމަށް ހަމަޖެހިފައިވަނީ ޓްރީ ޓޮޕް ސަރަހައްދުންނެވެ.
އެޗްޑީސީން ބުނީ މި ބިންތައް ވިއްކުމަށް ހަމަޖެހިފައިވަނީ 100 އިންސައްތަ ދިވެހި ވިޔަފާރިތަކަށް ކަމަށެވެ. އަދި ބިން ވިއްކުމަށް ހަމަޖެހިފައިވަނީ އަކަފޫޓަކަށް އެންމެ ކުޑަ ވެގެން 4،500 ރުފިޔާގެ މަގުން ކަމަށް އެ ކުންފުނިން ބުންޏެވެ.
އޮފީސް އިމާރާތް އެޅުމަށް 6،100 އަކަފޫޓުގެ ބިމަކަށް އެދޭނަމަ ބިޑް ސެކިއުރިޓީގެ ގޮތުގައި 500،000 (ފަސް ލައްކަ) ރުފިޔާ ދައްކަން ޖެހެއެވެ. އަދި 9،600 އަކަފޫޓުގެ ބިމަކަށް ނަމަ ބިޑް ސެކިއުރިޓީގެ ގޮތުގައި 1،000،000 (އެއް މިލިއަން) ރުފިޔާ ދައްކަން ޖެހެއެވެ.
އޮފީސް އިމާރާތް ހަދާއިރު ކޮމާޝަލް ބައެއްވެސް ހިމަނަން ވަނީ ކަނޑައަޅާފައެވެ. އަދި ބޭސްމެންޓް ޕާކިން އޭރިއާއެއް ހިމަނަން ޖެހޭއިރު ކެފޭ އާއި ރެސްޓޯރެންޓްތައް ވެސް އެ އިމާރާތުގައި ހުންނަން ޖެހެއެވެ.
މި ފުރުސަތުގެ ދަށުން ބިން ގަންނަން ބޭނުންވާ ފަރާތްތަކުން އެކަމަށް ޝައުގުވެރިކަން ފާޅުކޮށް، ޕްރޮޕޯސަލް ހުށަހެޅުމަށް ވަނީ 10 ދުވަހުގެ މުއްދަތެއްދީފައެވެ. އެކަމަށް އެދި ބިޑަށް ހުށަހަޅަން ޖެހެނީ އެޗްޑީސީގެ ވެބްސައިޓުގައިވާ ޕޯޓަލް މެދުވެރިކޮށެވެ.
