މުއިއްޒުއަށް ކުރާ ދައުވާއާ ގުޅިގެން ހެކިބަސް ނެގުން ކުރިއަށް

ނޫމަޑި މައްސަލާގައި ދޮގު ބަޔާނެއް ދެއްވާފައިވާތީ, ކުރީގެ ހައުސިންގ މިނިސްޓަރ އަދި މިހާރުގެ މާލެ ސިޓީގެ މޭޔަރ ޑރ. މުހައްމަދު މުއިއްޒުގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ހޯމަ ދުވަހު ހާޒިރުވި ހެކިވެރިޔާ ވަނީ މުއިއްޒުގެ ސޮޔާ ބެހޭގޮތުން ހެކިބަސް ދީފައެވެ. އެގޮތުން އެ ހެކިވެރިޔާގެ ކުރިމަތީގައި ޑރ. މުއިއްޒު ކުރައްވާފައިވާ ސޮއިތަކާ ގުޅޭގޮތުން ހެކިބަސް ދީ، މުއިއްޒުގެ ސޮއި އަޅައިކިޔާފައިވެއެވެ. އެގޮތުން ދެ ލިއުމެއްގައިވާ ދެ ސޮޔެއް ތަފާތުކަން އެ ހެކިވެރިޔާ ވަނީ ފާހަގަކޮށްފައެވެ.

އެ ހެކިވެރިޔާއަކީ މީގެ ކުރިން ކޯޓަށް ހެކިބަހެއް ދިނުމަށް ހާޒިރުވި ފަރާތެއްނޫނެވެ. ވީއިރު މި މައްސަލައާ ގުޅިގެން ހުށަހެޅިފައިވާ ލިޔުންތަކުގެ ފޯލިއޯ ނަންބަރު ފަދަ މައުލޫމާތުތައް ހެކިވެރިޔާއަށް އެނގެނީ ކީއްވެތޯއާއި، ދިފާއުން ހެކިވެރިޔާއާ ބައްދަލުކުރީތޯ ދައުލަތުން ސުވާލުކުރިއެވެ. ނަމަވެސް އެ ހެކިވެރިޔާ ބުނެފައިވަނީ އޭނާ މީގެ ކުރިން މުއިއްޒުގެ ވަކީލުންގެ ޓީމާ ބައްދަލުވެފައި ނުވާނެކަމަށެވެ.

ދައުލަތުން ވަނީ އެ ހެކިވެރިޔާގެ ކްރެޑިބިލިޓީއާ ގުޅޭގޮތުން ސުވާލުކޮށްފައެވެ.

ދައުލަތުން އިތުރަށް ކުރި ސުވާލުތަކުގެ ޖަވާބުދެމުން ހެކިވެރިޔާ ބުނީ، ޑރ. މުއިއްޒު ގުޅުއްވިކަމަށާއި، އޭނާއާ ގުޅޭ މައްސަލައެއްގައި ހެކިބަހެއް ދޭން ޖެހިދާނެކަމަށް މުއިއްޒު ވިދާޅުވި ކަމަށެވެ.

މިދިޔަ ހަފުތާގައި މުއިއްޒު ގުޅުއްވިކަމަށް އެ ހެކިވެރިޔާ ބުންޏެވެ.

އޭނާ ބުނީ، ޑރ. މުއިއްޒު ސޮއިކުރައްވާނީ ކަނާތުން ވާތަށް ކަމަށެވެ. ދެ ސޮޔަށް ބަލާއިރު އެއް ސޮއިގެ ރޮނގުތައް ފަލަކަމަށާއި، އަނެއް ސޮއިގެ ރޮނގުތައް ހިމަކަމަށް އެ ހެކިވެރިޔާ ބުންޏެވެ.

ނަމަވެސް ދައުލަތުން ވަނީ، ބޭނުންކުރާ ގަލަމުގެ ސަބަބުންވެސް ސޮޔަށް އެފަދަ ބަދަލެއް އަތުވެދާނެ ނޫންތޯ ސުވާލުކުރައްވާފައެވެ.

ހެކިވެރިޔާ ބުނީ، މި މައްސަލައާ ގުޅޭ މައުލޫމާތު ލިބެނީ މީޑިއާ މެދުވެރިކޮށް ކަމަށެވެ. އެނޫން ވަސީލަތެއް މެދުވެރިކޮށް މި މައްސަލައާ ގުޅޭ މައުލޫމާތެއް ލިބިފައިނުވާކަމަށް ހެކިވެރިޔާ ބުންޏެވެ.

އެ ހެކިވެރިޔާ ހާޒިރުކުރި ކަންކަން ދިފާއަށް އެކަށީގެންވާ މިންވަރަށް ބަޔާންކޮށްދެވިފައިވާތީ، މުއިއްޒުގެ ސޮޔާ ބެހޭގޮތުން ހެކިބަސް ނެގުމަށް ދިފާއުން ދެން ހުށަހެޅި ހެކިވެރިޔާގެ ހެކިބަސް ނަގަން ބޭނުން ނުވާކަމަށް ދިފާއީ ވަކީލު ވިދާޅުވިއެވެ.

ޕްރޮޖެކްޓުތަކުގެ ޝެޑިއުލާ ގުޅޭގޮތުންވެސް ދިފާއީ ހެތްކެއްގެ ހެކިބަސް ނަގާފައިވެއެވެ. އެގޮތުން އާންމު އުސޫލުން، މައްސަލަތައް ލަސްވާ ހާލަތްތަކުގައި އިންޓަރނޭޝަނަލް ބެސްޓް ޕްރެކްޓިސްގެ ދަށުން އަމަލުކުރާ ގޮތް އެ ހެކިވެރިޔާ ވަނީ ކިޔައިދީފައެވެ.

އޭނާއަކީ މިހާރު މާލެ ސިޓީ ކައުންސިލުގެ ކޮންސަލްޓަންޓެކެވެ.

ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި)ން ދިވެހި ސަރުކާރުގެ މައްޗަށް ހުށަހެޅި އާރބިޓްރޭޝަން މައްސަލާގައި، އޭރުގެ ހައުސިންގ މިނިސްޓަރ ޑރ. މުހައްމަދު މުއިއްޒު ދޮގު ބަޔާން ދެއްވުމާ ގުޅިގެން ދައުލަތަށް ވަނީ ބޮޑެތި ގެއްލުންތަކެއް ކުރިމަތިވެފައެވެ. އެގޮތުން ހައުސިންގ ޔުނިޓް މަޝްރޫއާ ގުޅިގެން، ނޫމަޑިއާއެކު ދިވެހި ސަރުކާރުން 2011ގައި ވެފައިވާ ފޭސް 1ގެ އެއްބަސްވުމާއި، 2013ގައި ވެފައިވާ ފޭސް 2ގެ އެއްބަސްވުމުގެ މަސައްކަތް އެ ކުންފުނިން ޝެޑިއުލާ އެއްގޮތަށް ލަސްތަކެއްނުވެ ކުރަމުން ގެންދިޔަކަމަށް ވިދާޅުވިކަމަށް ޕީޖީ އޮފީހުން ބުނެއެވެ.

އަދި ނޫމަޑިއަށް ލަގްޜަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެވަޑައިގެންފައި ނުވާކަމަށް ވިދާޅުވެ، އެކަމުގައި ދޮގު ބާޔަނެއް ދެއްވާފައިވާކަންވެސް ޕީޖީ އޮފީހުން ފާހަގަކޮށްފައިވެއެވެ.