ކުޅުނު ތިން މެޗުން ވެސް ބަލިވެގެން އެންމެ ފުލުގައި އޮވެ ސެމީ ފައިނަލަށް ދިޔަ ސިންގަޕޫރު އަތުން ސީދާ ތިން ސެޓުން ބަލިވެ އެންމެ ގަދަ ކަމަށް ބެލެވުނު އަފްޢާނިސްތާން ފޯ ނޭޝަންސް ކަޕް ވޮލީބޯޅަ މުބާރާތުގެ ފައިނަލަށް ނުގޮސް ކަޓައިފި އެވެ.

މާދަމާ ރޭ ކުޅޭ ފައިނަލްގައި ސިންގަޕޫރާ ދެކޮޅަށް ނުކުންނާނީ މެލޭޝިޔާ އާއި ދިވެހާއްޖެ މިރޭ ކުޅޭ ސެމީ ފައިނަލް މެޗު ކާމިޔާބުކުރާ ބައެކެވެ.

މުބާރާތުގެ ޝެޑިއުލް ރާވާފައިވާ ގޮތުން އަފްގާނިސްތާން މެޗު އޮތީ މިރޭ ކުޅޭ ގޮތަށެވެ. ނަމަވެސް ދިވެހި ޓީމަށް ހޯމް އެޑްވާންޓޭޖް ހޯދައިދިނުމުގެ ގޮތުން ރާއްޖެ މިއަދު މެންދުރު ކުޅެން އޮތް މެޗު މިރެ އަށް ބަދަލުކޮށް އަފްގާނިސްތާން މެޗު މެންދުރު ކުޅެން ހަމަޖެއްސީ ރޭގެ މެޗަށް ފަހު އެވެ. އެހެންކަމުން މި މެޗަށް އެ ޓީމު ކުރިމަތިލީ އަރާމުކުރަން 18 ގަޑިއިރު ވެސް ނުލިބި އެވެ.

ރޭ ވަރުގަދަ މެޗެއް ކުޅެފައިވުމާއެކު އަފްގާނިސްތާން މި މެޗުގައި ފެނިގެންދިޔައީ ވަރަށް ވަރުބަލިކޮށެވެ. މިއާ ހިލާފަށް ސިންގަޕޫރުން ކުރީ ތިން މެޗަށްވުރެ މާ މޮޅަށް ކުޅުނެވެ.

އެ ޓީމުން ސެޓްތައް ގެންދިޔައީ 25-17، 25-20 އަދި 25-22 އިންނެވެ.

ހަތަރު ޓީމު ކުޅޭ މުބާރާތުގެ ސެމީ ފައިނަލަށް އަފްގާނިސްތާން ދަތުރުކުރީ ކުޅުނު ތިން މެޗުން ވެސް މޮޅުވެގެންނެވެ. އެއީ މި ސަރަހައްދުގެ ވޮލީގައި ވެސް އަރަމުން އަންނަ ޓީމެކެވެ.