ޖޭޕީގެ ނައިބު ލީޑަރުން ހޮވައިފި، އެންމެ ގިނަ ވޯޓު ނަހުލާއަށް
26 ފެބުރުއަރީ 2023 | އާދީއްތަ 03:15ޑެޕިއުޓީ ލީޑަރުކަމަށް އެންމެ ގިނަ ވޯޓު ލިބިވަޑައިގެންނެވީ ވެސް ނަހުލާއަށް
ޖުމްހޫރީ ޕާޓީގެ ޑެޕިއުޓީ ލީޑަރުގެ މަގާމަށް ނަހުލާ ވަނީ އިންތިހާބުވެވަޑައިގެންފައި --
ޖުމްހޫރީ ޕާޓީގެ ހަތަރުވަނަ ގައުމީ ކޮންގްރެސްގައި އެ ޕާޓީގެ ޑެޕިއުޓީ ލީޑަރުންގެ މަގާމަށް ފަސް ބޭފުޅަކު އިންތިހާބުކޮށްފިއެވެ.
ޖޭޕީގެ ގައުމީ ކޮންފަރެންސްގައި އެ ޕާޓީގެ ޑެޕިއުޓީ ލީޑަރުން، ޒުވާނުންގެ ލީގުގެ ސެކްރެޓަރީ، ޒުވާނުންގެ ލީގުގެ މެންބަރުން، އަންހެނުންގެ ލީގުގެ ރައީސް، އަންހެނުންގެ ލީގުގެ ނައިބު ރައީސްގެ އިތުރުން އަންހެނުންގެ ލީގުގެ މެންބަރުން، އަދި ގައުމީ ކޮންފަރެންސްއިން އިންތިހާބުކުރާ ޕާޓީގެ ކައުންސިލަށް 25 މެންބަރުން ހޮވަން އިންތިހާބު ބާއްވައިފައިވެއެވެ.
ޖޭޕީގެ ޑެޕިއުޓީ ލީޑަރުގެ މަގާމަށް ކުރިމަތިލައްވައިފައި ތިއްބެވި 12 ބޭފުޅުންގެ ތެރެއިން އެ މަގާމު އެންމެ ފުރަތަމަ ކާމިޔާބު ކުރެއްވީ އެ ޕާޓީގެ ލީޑަރު ގާސިމް އިބްރާހީމްގެ އަނބިކަނބަލުން އަދި ޓްރާންސްޕޯޓް މިނިސްޓަރު އައިޝަތު ނަހުލާއެވެ. އޭނާއަށް ކޮންގްރެސްގައި ބައިވެރިވެވަޑައިގެންނެވި 588 މަންދޫބުން ވޯޓުދެއްވިއެވެ. އަދި އެންމެ ގިނަ ވޯޓު ވެސް ލިބިވަޑައިގަތީ ނަހުލާއަށެވެ.
ނަހުލާގެ އިތުރުން ޑެޕިއުޓީ ލީޑަރުންގެ މަގާމަށް އިތުރު ހަތަރު ބޭފުޅަކު އިންތިހާބުކޮށްފައިވެއެވެ. އޭގެ ތެރޭގައި ކުރިން ވެސް ޑެޕިއުޓީ ލީޑަރުގެ މަގާމު ފުރައްވާފައިވާ އަމީން އިބްރާހީމް އާއި މިދިޔަ ދައުރުގައި ޖޭޕީގެ ނައިބު ރައީސްގެ މަގާމުގައި ފުރުއްވި އަހުމަދު ސައުދު ހިމެނެއެވެ. އިތުރަށް ހިމެނެނީ އިގުބާލު އާދަމް އާއި އަލީ ޝާހުއެވެ.
ހުކުރު ދުވަހު ފެށި ޖޭޕީގެ ގައުމީ ކޮންގްރެސްގައި ޑެޕިއުޓީ ލީޑަރުން އިންތިހާބުކުރަން ވޯޓުލުން ހޮނިހިރު ދުވަހު ހެނދުނު ފެށި ގޮތަށް އެ ރޭ ފަތިސްވަންދެން ވޯޓުގުނުން ކުރިއަށް ގެންދިޔައެވެ. އެންމެ ފަހު ފޮށީގެ ވޯޓުގެ ނަތީޖާ އިއުލާންކުރީ ފަތިސް ނަމާދު ބަންގީގެ ވެސް ފަހުންނެވެ.
ޖޭޕީގެ މަގާމުތަކުގެ ތެރެއިން ވޯޓަކާ ނުލައި ހަތަރު މަގާމަކަށް ބޭފުޅުން ވަނީ އިންތިހާބުވެފައެވެ. އެއީ އެ ޕާޓީގެ ލީޑަރުގެ މަގާމާއި ޒުވާނުންގެ ލީގުގެ ރައީސްގެ މަގާމާއި ނައިބު ރައީސްގެ މަގާމު އަދި އަންހެނުންގެ ލީގުގެ ސެކްރެޓަރީގެ މަގާމެވެ. ހަތަރުވަނަ ދައުރަކަށް ގާސިމް ވަނީ އެ ޕާޓީގެ ލީޑަރުގެ މަގާމަށް ހޮވިވަޑައިގެންފައެވެ. ޒުވާނުންގެ ލީގުގެ ރައީސަކަށް ޔާމީން ރަޝީދު އިންތިހާބު ވީއިރު ނައިބު ރައީސަކަށް ހޮވުނީ ޝުއައިބު ޝިފާޒް ޝަރީފެވެ. އަންހެނުންގެ ލީގުގެ ސެކްރެޓަރީއަކަށް ހޮވުނީ އައިޝަތު ޝޫޒާ އަޙްމަދުއެވެ.
