ސައުދީ ލީގުގައި ރޮނަލްޑޯގެ ދެވަނަ ހެޓްރިކުން އަލް ނަސްރު މޮޅު
26 ފެބުރުއަރީ 2023 | އާދީއްތަ 02:37އަލް ނަސްރު އޮތީ ތާވަލްގެ އެއްވަނާގައި
ލަނޑުޖެހުމަށްފަހު ރޮނަލްޑޯ އުފާފާޅުކުރަނީ: ފޮޓޯ-އަލް ނަސްރު
ސައުދީ ޕްރޯ ލީގުގައު ކްރިސްޓިއާނޯ ރޮނަލްޑީ ހެދު ދެވަނަ ހެޓްރިކުން އޭނާ ކުޅެމުން އަންނަ އަލް ނަސްރު މޮޅުވެއްޖެއެވެ.
ލީގުގައި ޑަމަކް އަތުން އަލް ނަސްރު މޮޅުވީ ތިނެއް ސުމަކުންނެވެ. ޓީމްގެ ތިން ލަނޑުވެސް ފުރަތަމަ ހާފްގައި ޖެހީ ރޮނަލްޑޯއެވެ. ފުރަތަމަ ލަނޑު ޖެހީ ޕެނަލްޓީއަކުންނެވެ. ރޮނަލްޑޯ ދެވަނަ ގޯލް ޖެހީ އޭގެ ހަތަރު މިނެޓުފަހުން 23 ވަނަ މިނެޓުގައެވެ. ހެޓްރިކް ހެދީ ފުރަތަމަ ހާފްގެ ފަހު މިނެޓުގައި އަބުދުއްރަހުމާން ގަރީބް ދިން ބޯޅައިންނެވެ.
އަލް ނަސްރަށް ކުޅުނު ހަ މެޗުން ރޮނަލްޑޯ ވަނީ އަށް ގޯލް ޖަހާފައެވެ. މީގެތެރޭގައި ދެ ހެޓްރިކް ހިމެނެއެވެ. ދެގޯލް ޖަހަން ފުރުޞަތު ތަނަވަސްކޮށްދިނެވެ. 38 އަހަރުގެ ރޮނަލްޑީ އަލް ނަސްރާ ގުޅުނީ އެންމެ ފަހު ޓްރާސްފާގައެވެ. އަލް ނަސްރު އޮތީ ތިން ޕޮއިންޓްގެ ލީޑަކާ އެކު ތާވަލްގެ އެއްވަނާގައެވެ.
