ތުރުކީ-ސީރިއާ ބިންހެލުމުގައި މަރުވި މީހުންގެ އަދަދު ބައިލައްކައަށް އަރައިފި

މި މަހުގެ ހަވަނަ ދުވަހު ތުރުކީ އާއި ސީރިއާ ބޯޑަރު ކައިރިއަށް އައި ބާރުގަދަ ބިންހެލުމުގައި މަރުވި މީހުންގެ އަދަދު ބައިލައްކައަށް އަރައިފިއެވެ.

ރޮއިޓަރސް އިން ރިޕޯޓް ކޮށްފައިވާ ގޮޮތުގައި ތުރުކީން އާއްމުކޮށްފައިވާ ގޮތުގައި އެ ކާރިސާގައި އެ ޤައުމުން ހުކުރު ދުވަހުގެ ނިޔަލަށް މަރުވި މީހުންގެ އަދަދު ވަނީ 44،000 އަށްވުރެ އިތުރުވެފައެވެ. އެގޮތުން އެ ޤައުމުގެ ޑިޒަރސްޓަރ އެންޑް އިމަރޖެންސީ މެނޭޖްމަންޓް އޮތޯރިޓީ (އޭއެފްއޭޑީ) އިން އާއްމު ކޮށްފައިވާ ގޮތުގައި ތުރުކީން 44،218 މީހުން ވަނީ މަރުވެފައެވެ.

މި ކާރިސާގައި ސީރިއާއިން މިހާތަނަށް މަރުވެފައިވާ ކަމަށް ރިޕޯޓް ކޮށްފައިވަނީ 5،914 މީހުންނެވެ. މިއާއެކު މި ކާރިސާގައި މަރުވި މީހުންގެ ޖުމްލަ އަދަދު މިހާރު ވަނީ ބައިލައްކައަށްވުރެ އިތުރުވެފައެވެ.

ތުރުކީ އާއި ސީރިއާ ބޯޑަރަށް އައި މި ބިންހެލުމަށްފަހު އެތައް އާފްޓަޝޮކެއް އެ ސަރަހައްދަށް އައިސްފައިވާއިރު އޭގެ ފަހުންވެސް ބާރުގަދަ ބިންހެލުމެއް ވަނީ އައިސްފައެވެ. އެގޮތުން މިދިޔަ ހަފުތާގައި އައި އެ ބިންހެލުމުގައި ވެސް މީހުން ވަނީ މަރުވެފައެވެ.

މި މަހުގެ ހަވަނަ ދުވަހު އައި ބިންހެލުމަކީ 7.8 މެގްނިޓިއުޑްގެ ބާރުގަދަ ބިންހެލުމެކެވެ. އެ ބިންހެލުމުގައި މިހާތަނަށް ބައިލައްކައަށްވުރެ ގިނަ މީހުން މަރުވެފައިވާއިރު އެތައް ހާސް އިމާރާތެއް ވަނީ ވެއްޓިފައެވެ.