ތުރުކީ އާއި ސީރިއާއަށް އައި ބާރުގަދަ ބިންހެލުމުގައި މަރުވި މީހުންގެ މިހާރު މަދުވެގެން 8764 އަށް އަރާ ކަމަށް އޮފިޝަލުން ބުނެފިއެވެ.

ތުރުކީގައި ބުދަ ދުވަހު އިތުރު 349 މީހުން މަރުވެފައިވާއިރު، އެގައުމުގައި ޖުމްލަ 6،234 މީހުން މަރުވެފައިވާ ކަމަށް ތުރުކީގެ އޮފިޝަލުން ބުނެއެވެ. ތުރުކީގައި 34،810 މީހުން ޒަޚަމްވެފައިވާ ކަމަށް ތުރުކީގެ ނައިބު ރައީސް ފުއަތު އޮކްޓޭ ވިދާޅުވެފައިވެއެވެ.

ސީރިއާގައި ސަރުކާރުން ކޮންޓްރޯލްކުރާ ސަރަހައްދުތަކާއި ހަނގުރާމަވެރި ޖަމާތްތަކުގެ ބާރުގެ ދަށުގައިވާ ސަރަހައްދުތަކުން ވެސް ވަނީ 2،530 މީހުން މަރުވެފައެވެ. މުޅި ސީރިއާގައި ޖުމްލަ 4،654 މީހަކަށް އަނިޔާވެފައިވެއެވެ.

އެޖެންސީތަކާއި ރެސްކިއު ވޯކަރުން އިންޒާރު ދީފައި ވަނީ މި އަދަދުތައް އިތުރަށް މައްޗަށް ދިއުމުގެ ފުރުސަތު ބޮޑު ކަމަށާއި ހާއްސަކޮށް ސީރިއާގައި އަދިވެސް ގިނަ ބަޔަކު ތިބީ އިމާރާތްތަކުގެ ދަށުގައި ތާށިވެފައި ކަމަށެވެ.

ގާޒިއަންޓެޕްގައި ސަލާމަތްވި މީހުން ހޯދުމުގެ ބޮޑު މިޝަން ކުރިއަށްދާތާ 50 ގަޑިއިރަށް ވުރެ ގިނައިރު ވެފައިވާއިރު، ތުރުކީގެ ދެކުނުގެ ސިޓީގައި ކޮންކްރީޓާއި ކުނި ކޮނެގެން މީހުން ސަލާމަތްކުރާ މީހުން އަތް ފިޔަވައި އިތުރު އެއްޗެއް ބޭނުން ނުކުރެއެވެ.

ބިންމަތީގައި ތިބި ސީއެންއެންގެ ޓީމަކުން ބުނީ ސަލާމަތް ކުރާ މީހުންނަށް އަދިވެސް ދިރިއުޅުމުގެ އަލާމާތްތައް ލިބެމުން އަންނަނީ އެމީހުން ގަބޫލުކުރާ ގޮތުގައި ބޮޑު އިމާރާތެއްގެ ދަށުގައި ހުރި "ހުސްތަނެއް" ހުރުމުން ކަމަށެވެ.

ބުލްޑޯޒަރު ބޭނުންކުރަމުންދާ މީހުން ހެލްމެޓް އަޅައިގެން ތިބެ މަސައްކަތް ކުރަމުންދަނީ ފަރުބަދަތަކެއްގެ ގޮތަށް ޖަމާވެފައި ހުރި ކޮންކްރީޓްގެ ތެރެއިން މީހުން ސަލާމަތްކުރުމަށެވެ. އަދި މަސައްކަތަށް އިތުރު ގޮންޖެހުންތައް ދިމާވަނި ވެއްޓިފައިވާ އިމާރާތްތައް ކޮންނަވަރަކަށް ހިރަފުސްބޯވެ މަސައްކަތަށް ހުރަސްދިމާވާތިއެވެ.

މީހުން ސަލާމަތް ކުރުމުގައި ހަރަކާތްތެރިވަމުންްދާ މީހުން ކަންބޮޑުވަނީ ހޯމަ ދުވަހު އައި ބާރުގަދަ ބިންހެލުމާ ގުޅިގެން ވެއްޓިފައިވާ އިމާރާތްތަކުގެ ދެފަރާތުގައި ހުރި އިމާރާތްތައް ވެއްޓިދާނެކަމުގެ ބިރުއޮތުމުންނެވެ.

ބައިނަލްއަގްވާމީ ތާއީދާއި އެހީގެ ބޮޑު ބައެއް ތުރުކީއާއި ސީރިއާއަށް ފޮނުވާފައިވީ ނަމަވެސް، އެކަމުގެ އަސަރު ކުރި ގިނަ ސަރަހައްދުތަކަށް ވަނުމަށް އަދިވެސް ގޮންޖެހުން ބޮޑެވެ. ސަރޗް ޓީމުތަކަށް ބަންދުކޮށްފައިވާ މަގުތަކާއި ވެއްޓިފައިވާ އިމާރާތްތަކުގެ ތެރެއިން ދަތުރުކުރަން ދަތިވެފައިވާއިރު، ވަރުގަދަ އަފްޓާޝޮކްތަކެއް ކުރިމަތިވަމުންދާ ކަމަށް ބައިނަލްއަގުވާމީ މީޑިއާތަކުގައި ވަނީ ރިޕޯޓްކޮށްފައެވެ.