ކ. މާލެ
|
8 ފެބްރުއަރީ 2023 | ބުދަ 10:28
ސުންނާފަތިވެފައިވާ ގެތަކުގެ ދަށުން ފެނުނު ކުޑަކުއްޖާ
ސުންނާފަތިވެފައިވާ ގެތަކުގެ ދަށުން ފެނުނު ކުޑަކުއްޖާ
ރޮއިޓާސް
ތުރުކީ - ސީރިއާ ބިންހެލުން
މަރާއި ހަނގުރާމަކުރަމުންދިޔަ މައިމީހާ، ދަރިފުޅު ވިހާފައި ވަނީ ސުންނާފަތިވެފައިވާ ގެތަކުގެ ދަށުގައި
 
އެ ހާދިސާގައި އެތައް ހާސް ބަޔަކު ވަނީ މަރުވެފައި
 
ސީރިއާއަށް ރެކްޓަރ މިންގަނޑު 7.8 މެގްނިޓިއުޑްގެ ބިންހެލުމެއް އައީ ހޯމަ ދުވަހު

މައިމީހާގެ ލޯބީގެ ވާހަކައަކީ ދައްކާ ކޮޅުން ލާނެ ވާހަކައެއް ނޫނެވެ. އެއީ އެފަދަ ދެވަނަ އެއް ނެތް ލޯތްބެކެވެ. މަޔަކު ދަރިއެއް ދެކެ ވާ ލޮތްބަކީ އަގު ނުކުރެވޭ ފަދަ މުއްސަނދި ލޯތްބެކެވެ. މައެއްގެ ކުލުނަކީ ދަރިފުޅަށްޓަކައި މަރާއި ހަނގުރާމަކުރަން ޖެހިލުން ނުވާނެ ފަދަ ކުލުނެއްކަން ޔަގީނެވެ. ދަރިންނަށްޓަކައި މައިން ވާ ޤުރުބާނީ އާއި ދަރިންނަށްޓަކައި މައިން ކުރާ ހިއްވަރަކީ ވެސް ލާމަސީލު ވާހަކައެކެވެ. މައިންގެ ލޯބީގެ މިފަދަ މިސާލުތައް ފެންނަނީ ނާޒުކު ހާލަތުތައް މެދުވެރިވާ ހިނދުގައެވެ. އެފަދަ ޙާލަތުގައި މަންމައެއްގެ ފަރާތުން ފެންނަ މަންޒަރުތަކަކީ މުޅި ދުނިޔެ އެކަމަކުން އާޝޯހުކުރުވާ ފަދަ ކަންކަމެވެ.

ސީރިއާގައި ހޯމަ ދުވަހު ހިނގި ބިންހެލުމުގެ ހާދިސާގެ ތެރެއިން ވެސް މައިންގެ ހިއްވަރުގެ އެތައް ހިއްސާ އެއްގެ ވާހަކަ ކިޔާލަން ފުރުސަތު ލިބެއެވެ. ހޯމަ ދުވަހު ތުރުކީ އާއި ސީރިއާއަށް ރެކްޓަރ މިންގަނޑު 7.8 މެގްނިޓިއުޑްގެ ބިންހެލުމާއެކު ސީރިއާގެ އެތައް ހާސް އާއްމުންގެ ދިރިއުޅުން އެ ފުށް މިފުށަށް ވަނީ ޖެހިފައެވެ. ބަލަބަލާ ތިއްބާ ގެތައް ސުންނާފަތިވެ ބިމާއި ހަމަވި މަންޒަރު ދެކުނު އެތައް ބަޔަކު އެބަ ތިއްބެވެ. ހަފުސްވެފައިވާ ގެތަކުގެ ދަށުގައި ތާށިވެފައި ހިރަފުހުގެ ހާސްކަމުގައި އެތައް އާއިލާއެއް އެހީ އަކަށް އެދި އިންތިޒާރުކުރަމުން އެބަ ދެއެވެ. ކަން މިހެން އޮތް އިރު ސީރިއާގައި ހިނގި ބިންހެލުމުގައި ހާލުގައި ޖެހުނު މީހުން ސަލާމަތްކުރުމުގައި އުޅޭ ރެސްކިއު ގްރޫޕްތަކުން ހިއްސާ ކުރި މައުލޫމާތުތަކުން އަޖާއިބުކުރުވަނިވި ކަންކަން ވެސް ފެންނަން އެބަހުއްޓެވެ.

އޭގެ ތެރެއިން މީޑިއާގެ އެންމެ ބޮޑު ސަމާލުކަމެއް ހޯދި އެއް ވާހަކަ އަކީ ވެއްޓިފައިވާ އިމާރާތްތަކުގެ ދަށުން ސަލާމަތް ކުރި ކުޑަ ދަރިފުޅާއި އޭނާގެ ހިއްވަރު ގަދަ މައިމީހާގެ ވާހަކައެވެ. އިމާރާތުގެ ދަށުން އެ މައުސޫމް ފުރާނަ ސަލާމަތް ކުރި ވަގުތު އެ ކުއްޖާގެ މައިމީހާ އާއި ފޫޅު ދަނޑި އާއި އެއްކޮށް ފެނުން ވެގެން ދިޔައީ މީހުން ސަލާމަތްކުރުމުގެ މަސައްކަތުގައި އުޅުނު މީހުންނަށް ނޭވާ ހިފަހައްޓާލަން ޖެހޭ ކަމަކަށެވެ. އެ ތުއްތު ފުރާނަ ސަލާމަތުން ދިރި އޮއްވާ ފެނުން ވެގެން ދިޔައީ އެތައް ބަޔަކަށް ޖަޒުބާތީ ކަމަކަށެވެ. ކުޑަ ދަރިފުޅު ސަލާމަތުން ދިރިއޮއްވާ ސަލާމަތް ކުރެވުނު ނަމަވެސް އެ މައުސޫމް ދަރިފުޅުގެ މަންމަގެ ފުރާނަ ސަލާމަތެއް ނުވިއެވެ. އެ މަންމަގެ ފަހު ނޭވާ ހޭދަކުރީ ދަރިފުޅާއި އަމިއްލަ ފުރާނަ އަށް ވާނެ ގޮތެއް ނޭނގި ބިރުވެރިކަމެއްގެ ތެރޭގައެވެ. ވެއްޓިފައިވާ ގެތަކުގެ ދަށުގައި އަޅަމުން ދިޔަ ވޭނަށް ކެތް ކުރި ގޮތެއް ލިޔާ އިބާރާތުން ފަހުމުކޮށް ދެވިދާނެ ބާއެވެ؟ އެ މަންމަގެ އެންމެ ފަހު ހިއްވަރު ހޭދަކުރީ ދަރިފުޅުގެ ހައްގުގައި، ދަރިފުޅަށްޓަކައެވެ. އެ މަންމަގެ ހަށިގަނޑުގައި ހުރި އެންމެ ފަހުގެ ހަކަތަ ހޭދަކުރީ ތުއްތު ދަރިފުޅު މި ދުނިޔެ އަށް ގެނައުމަށްޓަކައެވެ. އެ ދަރިފުޅު ވިހެއުމަށެވެ. މިއީ މައިމީހާގެ ލޯބީގެ ކިހާ ލާމަސީލު މިސާލެއްތޯއެވެ؟

ސުންނާފަތިވެފައިވާ ގެތަކުގެ ދަށުން ފެނުނު ކުޑަކުއްޖާ - ރޮއިޓާސް

އެ އަންހެން މީހާ ވިހާފައި ވަނީ ލޯބިލޯބި އަންހެން ކުއްޖެކެވެ. އެ ތުއްތު ފުރާނަ ސަލާމަތް ކުރުމާއެކު ހޮސްޕިޓަލަށް ގެންގޮސް އެ ކުއްޖާއަށް ފަރުވާދެމުންދާއިރު އެ ކުއްޖާ އަށް މީޑިއާ އާއި އާއްމުންގެ ސަމާލުކަން ހުއްޓުނީ ސަބަބެއް ނެތިއެއް ނޫނެވެ. ހަތަރު މީހުންގެ އާއިލާއަކަށް ނިސްބަތްވާ އެ ކުޑަ އަންހެން ކުއްޖާ ފިޔަވައި އެއްވެސް މީހަކު މިހާރު މި ދުނިޔެއަކު ނެތެވެ. ވިހެއުމާއެކު އެ ދަރިފުޅު ޔަތީމުވީއެވެ. މަންމަ އާއި ބައްޕަ މި ދުނިޔެ އާއި އަލްވަދާއުކީ ދިމާވި ކުއްލި ހާދިސާގެ ޝިކާރައަކަށް ވެގެންނެވެ. އެއްބަނޑު އެއްބަފާ ހަތަރު ކުދިން މި ދުނިޔެ އާއި ވަކިވެދިޔައީ ވެސް އެ ބިންހެލުމުގެ ސަބަބުންނެވެ. އެ ވާހަކަ ވެގެން ދިޔައީ އެތައް ބަަޔަކު ފެންކަޅިކޮށްލި ވާހަކައަކަށެވެ.

މިއީ އެންމެ ފުރާނައެއްގެ ވާހަކައެކެވެ. އެންމެ އާއިލާއެއްގެ ވާހަކައެވެ. މިފަދަ އެތައް ކުދިންނެއް ސީރިއާގައި ހިނގި ބިންހެލުމަށް ފަހު އަޅާލާނެ އާއިލާ މީހެއް ނެތި ބިކަވެއްޖެއެވެ. މައިންނާއި ދަރިން ވަކިވެ، އެތައް ބަޔަކު ޔަތީމުވެއްޖެއެވެ. އެކަމަކު މި ހާދިސާގައި އަނިޔާވި މީހުންނާއި ހާލުގައި ޖެހުނު މީހުން ސަލާމަތްކުރުމުގައި ހޭދަކުރާ ކޮންމެ ވަގުތަކީ ވެސް އަޖާއިބުކުރުވަނިވި އެތައް ކަމެއް ފެންނަ ވަގުތެކެވެ. ވިއްސިވިހާލިވެފައިވާ ގެތަކުގެ ދަށުން އުމުރުން ދުވަސްވީ މީހުންނާއި ތުއްތު ކުދިން ތިރިތިއްބާ ސަލާމަތްކުރާ މަންޒަރަކީ ކުޅަދުންވަންތަކަމާމެދު ވިސްނާލަން މަޖުބޫރުކުރުވާ ކަންކަން ކަމީ ގައިމުކަމެކެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: މަރްޔަމް ދާނިޝް ނަޝީދު
9%
3%
74%
12%
2%
0%
ކޮމެންޓް