ބިންހެލުމުގެ އަސަރު ކުރި ސަރަހައްދުތަކަށް ތުރުކީގެ ރައީސް އުރުދުޣާން ޒިޔާރަތްކުރައްވައިފި

ހޯމަ ދުވަހުގެ ފަތިހު ތުރުކީއަށް އައި ބާރުގަދަ ބިންހެލުމުގެ އަސަރު ކުރި ސަރަހައްދުތަކަށް އެގައުމުގެ ރައީސް ރަޖަބް ތޮއްޔިބު އުރުދުޣާން ޒިޔާރަތްކުރައްވައިފިއެވެ.

ތުރުކީގެ ރައީސް އުރުދުޣާން ވަނީ ބިންހެލުމުގެ އަސަރު ކުރި ކަހްރަމަންމަރަސް ސިޓީއަށް ބުދަ ދުވަހު ޒިޔާރަތްކުރައްވާފައެވެ. އަދި ވަނީ އެސަރަހައްދުގައި ދިރިއުޅޭ މީހުންނާ ބައްދަލުކުރައްވާ ވާހަކަދައްކަވާފައެވެ. މީގެ އިތުރުން އެސިޓީގައި ގާއިމުކޮށްފައިވާ އިމަޖެންސީ ޓެންޓުތަކަށްވެސް އުރުދުޣާން ވަނީ ޒިޔާރަތްކުރައްވާފައެވެ.

ހޯމަ ދުވަހު ގެ ފަތިހު އެތާގަޑިން 4 ޖަހާއެހާކަންހާއިރު 7.8 މެގްނިޓިއުޑްގެ ބާރުމިނުގައި އައި ބިންހެލުން އަސަރު އެންމެ ބޮޑަށް ކޮށްފައި ވަނީ ތުރުކީގެ ދެކުނުއިރުމަތީގެ ސަރަހައްދުތަކަށެވެ.

މިބިންހެލުމަކީ ފާއިތުވި ގަރުނުގެ ތެރޭގައި ތުރުކީގެ މެދުތެރެއަށް އައި މިފަދަ އެންމެ ނުރައްކާތެރި ބިންހެލުމަށް ވެގެންދިޔަ އިރު، ހޯމަ ދުވަހުގެ މެންދުރުފަހުގެ ވަގުތެއްގައި 7.7 މެގްނިޓިއުޑްގެ ދެވަނަ ބިން ހެލުމެއްވެސް ތުރުކީއަށް ވަނީ އައިސްފައެވެ.

މިބިންހެލުމުގައި އެންމެ ބޮޑަށް އަސަރުކޮށްފައިވާ 10 ޕްރޮވިންސްގައި ރައީސް އުރުދުޣާން ވަނީ ތިން މަސް ދުވަހުގެ ސްޓޭޓް އޮފް އިމަރޖެންސީ އިއުލާންކުރައްވާފައެވެ.

ހޯމަ ދުވަހުގެ ބިންހެލުމުގައި އެންމެ ބޮޑަށް ގެއްލުންލިބުނު ސަރަހައްދުތަކުގައި ދިރިއުޅެމުންދިޔަ ބައެއް މީހުން ދަނީ ހާދިސާއާ ގުޅިގެން ސަރުކާރުގެ ރެސްޕޮންސް ވަރަށް ލަސްކަމަށާއި ދޯދިޔާކަމަށް ބުނެ އުރުދުޣާންގެ ސަރުކާރަށް ފާޑުކިޔަމުންނެވެ.

ސްޓޭޓް އޮފް އިމަރޖެންސީ އިއުލާންކުރެއްވީ ހާލުގައި ޖެހިފައިވާ މީހުންނަށް އެހީތެރިވުމުގެ މަސައްކަތް އަވަސްކުރުމުގެ ގޮތުންކަމަށް އުރުދުޣާން ވަނީ ވިދާޅުވެފައެވެ. އަދި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށްޓަކައި އިމަރޖެންސީ ގިނަ ފިޔަވަޅުތަކެއް އަޅުއްވާފައިވާއިރު، އިންސާނީ އެހީތެރިކަމަށް މަސައްކަތްކުރާ މީހުންނަށް ބިން ހެލުމުގެ އަސަރު ކޮށްފައިވާ ސަރަހައްދުތަކަށް ދިޔުމުގަޔާއި ފައިސާގެ ގޮތުން އެހީތެރިކަން ފޯރުކޮށްދިނުމަށް ފިޔަވަޅުތައް އަޅުއްވާނެކަމުގެ ޔަގީންކަން އުރުދުޣާން ވަނީ ދެއްވާފައެވެ.

ސްޓޭޓް އޮފް އިމަރޖެންސީ އާ ގުޅިގެން ގާނޫނު ހަދާ މަޖިލީހުންނާއި ރައީސް އޮފީހުން ފުރިހަމަކުރަންޖެހޭ ކަންކަން ވީއެންމެ އަވަހަށް ކޮށްނިންމަވާނެކަމަށްވެސް އުރުދުޣާން ވަނީ ވިދާޅުވެފައެވެ.

އުރުދުޣާން ވަނީ ހާލުގައި ޖެހިފައިވާ ފަރާތްތަކަށް އެހީތެރިވުމަށް 5.3 ބިލިއަން އެމެރިކާ ޑޮލަރު ހަމަޖައްސާފައިވާކަން ހާމަ ކުރައްވާފައެވެ.

އުރުދުޣާންގެ 20 އަހަރުވީ ވެރިކަމުގައި ކުރިމަތިވި ގުދުރަތީ އެންމެ ބޮޑު ކާރިސާ ކުރިމަތިވެފައިމިވަނީ އެގައުމުގެ ރިޔާސީ އަދި ގާނޫނު ހަދާ މަޖިލީހުގެ އިންތިޚާބު މެއި 14 ގައި ބޭއްވުމަށް ހަމަޖެހިފައިވަނިކޮށެވެ.