ބިންހެލުމަށް ފަހު ތުރުކީއަށް އެހީތެރިކަން ފޯރުކޮށްދޭ އެމެރިކާގެ ޓީމު މިއަދުގެ ވަގުތެއްގައި ތުރުކީގެ އަޑާނާއަށް ދާނެކަމަށް އެ ޓީމުގެ ލީޑަރު ސްޓީވަން އެލެން ވިދާޅުވެއްޖެއެވެ.

އެމެރިކާގެ އެޖެންސީ ފޯ އިންޓަނޭޝަނަލް ޑިވެލޮޕްމަންޓްގެ ޑިޒާސްޓާ އެސިސްޓެންސް ރިކަވަރީ ޓީމް (ޔޫއެސްއޭއައިޑީ ޑާޓް) ގައި ހިމެނެނީ ލޮސް އެންޖެލިސް އާއި ފެއާފެކްސްގެ ދެ ސަރޗް އެންޑް ރެސްކިއު ޓީމެކެވެ.

މިވަގުތު ފޯކަސް ކުރަނީ "ފުރާނަ ސަލާމަތް ކުރުމަށް" ކަމަށް އެލެން ވިދާޅުވިއެވެ. އަދި އެމެރިކާގެ ޓީމުތައް "އަދިވެސް ބޭނުންތެރި" ވާނެ ކަމަށާއި ފުރާނަ ސަލަމާތް ކުރުމުގެ މަސައްކަތަށް ރަނގަޅު ކުރިއެރުމެއް ލިބޭނެ ކަމަށް ވެސް ވިދާޅުވިއެވެ. އަޑާނާގައި މިވަގުތު އެއްވެސް ސާޗް އެންޑް ރެސްކިއު ޓީމެއް ނެތެވެ.

ސާޗް އެންޑް ރެސްކިއު ޓީމްތަކުގެ ތެރެއިން ކޮންމެ ޓީމެއްގައި ވެސް ގާތްގަނޑަކަށް 80 މީހުންނާއި، ކުއްތާތަކާއީ ގާތްގަނޑަކަށް 170،000 ޕައުންޑްގެ ހާއްސަ ޓޫލްސް އާއި އާލާތްތައް ހުންނާނެއެވެ. ހާއްސަ އިކުއިޕްމަންޓްތަކުގެ ތެރޭގައި ކޮންކްރީޓަށް ބޭނުންވާ ހައިޑްރޮލިކް ކީހާއި ބައްތިއާއި ޑްރިލް އަދި އެޑްވާންސް މެޑިކަލް ކެޕޭސިޓީތައް ހިމެނޭ ކަމަށް އެލެން ވިދާޅުވިއެވެ. އެމެރިކާގެ އަސްކަރީ އުޅަނދުތަކުގެ އެހީގައި ޓީމުތައް ތުރުކީއަށް ގެނައުމުގެ މަސައްކަތް ކުރަމުންދާ ކަމަށް ވެސް އޭނާ ވިދާޅުވިއެވެ.

ވަކިން ހާއްސަކޮށް ކެނައިން ޓީމުތައް ބޭނުންތެރި ވާނީ ތާށިވެފައިވާ މީހަކު އޮތީ ކޮންތާކުކަމެއް ނޭނގި ކޮނުމުގެ ބަދަލުގައި ކުއްތާތަކުގެ އެހީގައި ވެއްޓިފައިވާ ގެތަކުގެ ތެރެއިން މީހުން ސަލާމަތްކުރުމަށެވެ.

މިވަގުތު ބައިނަލްއަގްވާމީ ސަރުކާރުގެ ސަރޗް އެންޑް ރެސްކިއު ޓީމްގެ ގާތްގަނޑަކަށް ވިއްސަކަށް ޓީމް ހަރަކާތްތެރިވަމުންދާ ކަމަށާއި ޖުމްލަ ގާތްގަނޑަކަށް 2،000 މީހުން ތިބި ކަމަށް އެލެން ވިދާޅުވިއެވެ. އެ ޓީމުތަކުން ތުރުކީގެ ޓީމުތަކާ ގުޅިގެން މަސައްކަތް ކުރަމުންދާއިރު، ތުރުކީން ދަނީ ދެން ބޭނުންވާ ސަޕޯޓްގެ ފިޔަވަޅުތައް ކަނޑައަޅަމުންނެވެ.

މީހުން ހޯދުމާއި ސަލާމަތް ކުރުމުގެ މަސައްކަތްތަކަށް ކިހާ ދުވަހެއް ނަގާނެ ކަމެއް އަންދާޒާ ކުރަން ނޭނގޭ ކަމަށް ވެސް ޓީމުން ވަނީ ބުނެފައެވެ.