ފެބްރުއަރީ މަހު ތުރުކީއަށް އައި ބިންހެލުންތަކުގައި އިމާރާތްތައް ވެއްޓުމުގެ ޒިންމާ އުފުލަންޖެހޭކަމަށް ޝައްކު ކުރެވޭ 184 މީހަކު ހައްޔަރުކޮށްފައިވާކަމަށާއި މިކަމުގެ ތަހުގީގު ފުޅާވަމުންދާކަމަށް އެގައުމުގެ ޖަސްޓިސް މިނިސްޓަރ ބެކިރް ބޮޒްޑަގް ވިދާޅުވެއްޖެއެވެ.

ފެބްރުއަރީ ހަ ވަނަ ދުވަހު ތުރުކީ އަދި ސީރިއާއަށް އައި ބާރުގަދަ ބިންހެލުމުގައި ތުރުކީން މަރުވި މީހުންގެ އަދަދު 44،128ށް އަރާފައިވާއިރު، މި ބިންހެލުމުގައި ސީރިއާ އަދި ތުރުކީން މަރުވި މީހުންގެ ޖުމުލަ އަދަދު ވަނީ 50،000ން މައްޗަށް އަރައިފައެވެ.

ރިޕޯޓުތައް ބުނާގޮތުން ފެބްރުއަރީ މަހުގެ ބިންހެލުންތަކުގެ ސަބަބުން ތުރުކީން 520،000 އެޕާޓްމެންޓް ހިމެނޭ 160،000ށް ވުރެ ގިނަ އިމާރާތް ވަނީ ވެއްޓިފައެވެ.

މިހާ ގިނަ އަދަދެއްގެ އިމާރާތްތައް މިހާ ފަސޭހައިން ވެއްޓެން މެދުވެރިވި ސަބަބާއި މިކަމުގައި ޒިންމާވާ މީހުން ދެނެގަނެ ފިޔަވަޅު އެޅުމަށް ތުރުކީން ތަހުގީގުތައް ކުރަމުންދާއިރު، މިހާތަނަށް 600ށް ވުރެ ގިނަ މީހުން ތަހުގީގުކޮށްފައިވާނެ ކަމަށް އެގައުމުގެ ޖަސްޓިސް މިނިސްޓަރ ވަނީ ވިދާޅުވެފައެވެ.

އެގޮތުން، ހައްޔަރުކޮށް ބަންދުގައި ބަހައްޓާފައިވާ މީހުންގެ ތެރޭގައި ހިމެނެނީ 79 ކޮންސްޓްރަކްޝަން ކޮންޓްރެކްޓަރުންނާއި އިމާރާތްތަކުގެ ގާނޫނީ ޒިންމާ އުފުލާ 74 މީހުންނާއި 13 ޕްރޮޕަޓީ އޯނަރުންނާއި އިމާރާތްތަކަށް ބަދަލު ގެނެސްފައިވާ 18 މީހުންކަމަށް މިނިސްޓަރު ވިދާޅުވިއެވެ.

ތުރުކީގެ ގިނަ ބަޔަކު ވަނީ އިމާރާތްކުރުމުގެ ކޮރަޕްޓު އުސޫލުތަކާމެދު ނުރުހުން ފާޅުކޮށްފައެވެ. މިއާއެކު އެގައުމުގެ ރައީސް ތައްޔިބު އުރުދުޣާން ވަނީ މިކަންތައް ރަނގަޅަށް ތަހުގީގުކޮށް، މިކަމުގައި ޖަވާބުދާރީވާންޖެހޭ މީހުން ހޯދާނެކަމަށް ވައުދުވެވަޑައިގެންފައެވެ.

ގާޒިއަންޓެޕް ޕްރޮވިންސްގައި، ވެއްޓިފައިވާ އިމާރާތްތަކުގެ ތަހުގީގުގެ ތެރެއިން ހައްޔަރުކުރި މީހުންގެ ތެރޭގައި ނުރްޑަގީ އަވަށުގެ މޭޔަރުވެސް ހިމެނޭކަމަށް ތުރުކީގެ ދައުލަތުގެ މީޑިއާއިން ވަނީ ރިޕޯޓުކޮށްފައެވެ. އޭނާ އަކީ ރައީސް އުރުދުޣާންގެ ވެރިކަންކުރާ އޭކޭ ޕާޓީގެ މެންބަރެކެވެ.

މި ހިތާމަވެރި ކާރިސާއަށް ތިން ހަފްތާއެއްހާ ދުވަސް ވެފައިވާއިރު، ތުރުކީގައި މަރުވި މީހުންގެ ޖުމުލަ އަދަދެއް ނެތްއިރު، އަދިވެސް އިމާރާތްތަކުގެ ދަށުގައި ތާށިވެފައި އޮވެދާނެކަމަށް ލަފާކުރާ ހަށިގަނޑުތަކުގެ އަދަދެއް ވެސް އޮފިޝަލުން ބުނެފައެއް ނުވެއެވެ.