ތިން މެޗުން ވެސް ބަލިވެ، ސިންގަޕޫރު ފަހު ސެމީއަށް!

ކުޅުނު ތިން މެޗުން ވެސް ބަލިވެ، ފޯ ނޭޝަންސް ކަޕް ވޮލީބޯޅަ މުބާރާތުގެ އެންމެ ވަރުގަދަ ޓީމާ ދެކޮޅަށް ސެމީ ފައިނަލުގައި ސިންގަޕޫރު ކުޅެން ޖެހިއްޖެއެވެ.

ހަތަރު ގައުމު ވާދަކުރާ ފިރިހެން ޑިވިޝަނުގެ ގްރޫޕް ފިޔަވަހީގައި ސިންގަޕޫރު ކުޅުނު ފަހު މެޗުގައި މިއަދު ހަވީރު ބަލިވީ މެލޭޝިޔާ އަތުން 3-1 ސެޓުންނެވެ. މި މެޗުގެ ފުރަތަމަ ދެ ސެޓް މެލޭޝިޔާ ގެންދިޔައީ 52-22 އަދި 25-18ންނެވެ. ތިންވަނަ ސެޓްގައި އެޓޭކް ވަރުގަދަކޮށް ސިންގަޕޫރު ލީޑު ނެގިއެވެ. އަދި ރަނގަޅު ރިސީވްތަކަކާއި ޑިފެންސްތަަކާއެކު ސެޓް ކާމިޔާބުކުރީ، މެލޭޝިޔާއަށް 20 ޕޮއިންޓް ދީފައެވެ. ނަމަވެސް ޖެހިގެން އައި ސެޓްގައި ސިންގަޕޫރަށް އެ ކުޅުން ތަކުރާރެއް ނުކުރެވުނެވެ. އެމީހުންނަށް ސެޓް ގެއްލި، މެޗު ވެސް ގެއްލުނީ ހަތަރުވަނަ ސެޓް 25-17ން މެލޭޝިޔާ ކާމިޔާބު ކުރުމުންނެވެ.

މުބާރާތުގެ އެންމެ ގަދަ ޓީމަކަށް ވާނެކަމަށް ބެލެވެނީ އަފްޣާނިސްތާން ނުވަތަ ދިވެހިރާއްޖެ މއެވެ. ގްރޫޕްގެ ފަހު މެޗުގައި މިރޭ ވާދަކުރާނީ މި ދެ ގައުމެވެ. އެއްވަނަ ޓީމު، ސިންގަޕޫރާއެކު ސެމީފައިނަލް ކުޅެން ޖެހޭއިރު، ފައިނަލްގެ ފަހު ޖާގަ ލިބޭނީ ދެވަނަ އަދި ތިންވަނަ ޓީމު ކުޅެގެން މޮޅުވާ ބަޔަކަށެވެ.