ވަރުގަދަ ސްކޮޑަކާއެކު އާސީޒަނަށް އެންމެ ފުރަތަމަ ތައްޔާރުވާން ފެށި މާޒިޔާއިން މިއަދު ސައޫދީ އަރަބިއްޔާގައި ކޭމްޕްކޮށްފިއެވެ.
މާޒިޔާ ސައުދީއަށް ފުރީ މިއަދު ހެނދުނުއެވެ. އާއްމުގޮތެއްގައި ވަރަށް "އަޕްޑޭޓް" މާޒިޔާގެ ސޯޝަލް މީޑިޔާ އެކައުންޓްތަކުން ޓީމް ފުރިކަމަށް ބުނެފައި ނެތްނަމަވެސް, އެފްއޭއެމްގެ ރައީސް ބައްސާމް އަދީލް ޖަލީލް ވަނީ މާޒިޔާއަށް ކާމިޔާބު ކޭމްޕަކަށް އެދި ޓްވީޓް ކުރައްވާފައެވެ. ބައްސާމްގެ ޓްވީޓްގައި ވާގޮތުން މާޒިޔާއިން ސައުދީ އަރަބިޔާގައި ދެ ހަފުތާ ވަންދެން ތަމްރީނުތައް ކުރިއަށްގެންދާނެއެވެ. މާޒިޔާއަކީ މިއަހަރުވެސް އޭއެފްސީ ކަޕްގެ ސީދާ ޖާގަ ލިބި ގްރޫޕް ސްޓޭޖްގައި ރާއްޖެއިން ވާދަކުރާނެ ހަމައެކަނި ޓީމެވެ. އޭއެފްސީކަޕްގައި ވާދަކުރާ ޓީމްތަކަށް ބައްސާމް އިސްވެ, އެފްއޭއެމްއިން ބޭރުގައި ކޭމްޕްކުރުމުގެ ފުރުސަތު އަންނަނީ ފަހިކޮށްދެމުންނެވެ. އެފުރުސަތު ހޯދައިދެމުން އަންނަނީ ސައޫދީ އަރަބިއްޔާއިންނެވެ.
މާޒިޔާއިން އާސީޒަނަށް ތައްޔާރުވާން ފުރުމުގެ އެއްދުވަސް ކުރިން ވަނީ ޗައިނީޒް ސުޕަރ ލީގުގައި ކުޅެފައިވާ ސާބިޔާގެ ފޯވާޑެއްގެ ސޮއިވެސް ހޯދާފައެވެ. 28 އަހަރުގެ ސެޓެފަން މިހަލޮވިޗްއަކީ ސާބިއާ ލީގުގައިވެސް ކުޅެފައިވާ ތަޖުރިބާ ބޮޑު ފޯވާޑެކެވެ. ގައުމީ ޓީމްގެ ފޯވާޑުންކަމަށްވާ އަލީ ފާސިރު (ސެންޓޭ)އާއި, ހަމްޒާ މުހައްމަދު (ހަމްޕު)އާއި ނާއިޒު ހަސަން (ދާދު)އާއި ހަންނަވެސް ހުރީ މާޒިޔާގައެވެ. އެކަމަކު މިދިޔަ އަހަރުތަކުގައި މާޒިޔާގެ ކުރި ބެލެހެއްޓި ކެޕްޓަން އަސަދުﷲ އަބްދުﷲ ޓީމާއެކު ނުދެއެވެ. މައުލޫމާތު ލިބިފައިވާ ގޮތުގައި އަސަދުﷲ ކުރިއަށް އޮތް ސީޒަންގައި ފެންނާނީ ވެލެންސިޔާއިންނެވެ.
