ޤައުމީ ފިރިހެން އަދި އަންހެން ވޮލީ ޓީމަށް ޖާޒީ ހަވާލުކޮށްފި

ބުރާސްފަތި ދުވަހު ރާއްޖޭގައި ފަށާ ފޯ ނޭޝަންސް ކަޕް ވޮލީ މުބާރާތުގައި ވާދަކުރާ ރާއްޖޭގެ ފިރިހެން އަދި އަންހެން ޤައުމީ ޓީމުގެ ކުޅުންތެރިންނަށް ޖާޒީ ހަވާލުކޮށްފި އެވެ.

މިއީ މިއަހަރު ރާއްޖޭގައި ބާއްވާ ބައިނަލްއަޤުވާމީ ފުރަތަމަ މުބާރާތެވެ. މީގެ އިތުރުން މިއީ ރާއްޖޭގައި މިހާތަނަށް ބާއްވާ އިންވިޓޭޝަނަލް ފުރަތަމަ ވޮލީ މުބާރާތެވެ. މި މުބާރާތުގައި ރާއްޖޭގެ އިތުރުން ދެން ވާދަކުރަނީ އަފްޣާނިސްތާން، މެލޭޝިޔާ އަދި ސިންގަޕޫރު އެވެ. މުބާރާތަށް ތައްޔާރުވުމުގެ ގޮތުން ރާއްޖޭގެ ޤައުމީ ޓީމުތަކުން ވަނީ ތައިލެންޑުގައި ތަމްރީނު ކޭމްޕެއް ވެސް ކުރިއަށް ގެންގޮސްފަ އެވެ.

ޤައުމީ ޓީމުގެ ކުޅުންތެރިންނަށް ޖާޒީ ހަވާލުކޮށްދެއްވީ އެކަމަށްޓަަކައި ޒުވާނުންގެ މަރުކަޒުގައި ބުދަ ދުވަހުގެ ހަވީރު ބޭއްވި ޚާއްސަ ރަސްމިއްޔާތެއްގައި ޔޫތު މިނިސްޓަރު އަޙުމަދު މަޚްލޫފް އެވެ. އެ ރަސްމިއްޔާތުގައި ވަނީ ޤައުމީ ޓީމުގެ ކުޅުންތެރިންނަށް ހިތްވަރު ދިނުމަށް ޚާއްސަ ސެޝަނެއް ވެސް ކުރިއަށް ގެންގޮސްފަ އެވެ. އެ ސެޝަން ކުރިއަށް ގެންގޮސްދިނީ ޙުސެއިން ޢަފީފް އެވެ. އެ ސެޝަންގައި އޭނާާ ވަނީ ޓީމެއްގެ ގޮތުގައި ކުރިއަށް ގޮސް، ކާމިޔާބީ ހާސިލްކުރުމަށް ބޭނުންވާ ނަމަ، ސަމާލުކަން ދޭންވީ ކަންކަމާއި، ކޯޓު މަތީގައި ހުންނަ އިރު ކޮންމެ ކުޅުންތެރިޔަކު ވެސް ސަމާލުކަން ދޭންވީ ބައެއް ކަންކަމަށް އަލި އަޅުވައިފަ އެވެ. މި ރަސްމިއްޔާތުގައި މިނިސްޓަރު މަޚްލޫފް ވެސް ވަނީ ޤައުމީ ޓީމުގެ ކުޅުންތެރިންނަށް ހިތްވަރު ދެއްވައިފަ އެވެ.

މުބާރާތް ރާއްޖޭގައި ފަށާނީ ބުރާސްފަތި ދުވަހުގެ މެންދުރު އެވެ. ބުރާސްފަތި ދުވަހުގެ މެންދުރު 14:30 ގައި އޮންނަ ފިރިހެން މެޗުގައި ބައްދަލުކުރާނީ އަފްޣާނިސްތާނާއި ސިންގަޕޫރު އެވެ. އަދި 16:30 ގައި އޮންނަ އަންހެން މެޗުގައި ބައްދަލު ކުރާނީ ރާއްޖެ އާއި މެލޭޝިޔާ އެވެ. ބުރާސްފަތި ދުވަހުގެ ރޭ 20:30 ގައި ރާއްޖޭގެ ޤައުމީ ފިރިހެން ޓީމުން ވެސް ނުކުންނާނީ މެލޭޝިޔާއާ ދެކޮޅަށެވެ. މުބާރާތް ކުރިއަށް ގެންދިޔުމަށް ހަމަޖެހިފައި ވަނީ ރައުންޑްރޮބިން އުސޫލުންނެވެ.